അക്ഷരം വെളിച്ചമാണെങ്കില്‍ അനോകായിരം ഭാവി തലമുറയ്ക്കായി വലിയ വെളിച്ചം പകര്‍ന്ന് ആ അമ്മ പോയി. ഒരു ഗ്രാമത്തിന്റെ ചിരകാല സ്വപ്നമായിരുന്ന അംഗന്‍വാടിക്ക് സ്ഥലം നല്‍കിയാണ് ആ അമ്മ നാട്ടില്‍ അറിയപ്പെട്ടത്. ആ അംഗന്‍വാടിയുടെ ഉദ്ഘാടന സമയത്താണ് സ്വന്തം നാട്ടുകാരുടെ മുമ്പില്‍ വച്ച് ആ പ്രിയപ്പെട്ട അമ്മ യാത്രയായത്.
മലയാലപ്പുഴ ഗ്രാമത്തിന്റെ ചിരകാല സ്വപ്നമായിരുന്ന അംഗന്‍വാടി . കഴിഞ്ഞ വര്‍ഷം ഗ്രാമസഭയില്‍ ഈ വിഷയം ചര്‍ച്ചയായപ്പോള്‍ ആരും സ്ഥലം വിട്ടുകൊടുക്കാന്‍ തയ്യാറായില്ല. അവസാനം തന്റെ ഉടമസ്ഥതയിലുള്ള മൂന്ന് സെന്റ് സ്ഥലം സൗജന്യമായി നല്‍കാമെന്ന് മലയാലപ്പുഴ താഴം നവജീവ കേന്ദ്രത്തിന് സമീപം ഇളവുംതുണ്ടില്‍ വീട്ടില്‍ ഇ.ജി. കുഞ്ഞമ്മ (80) ഗ്രാമസഭയിലെ പ്രഖ്യാപിക്കുകയായിരുന്നു. 
തുടര്‍ന്ന് കോന്നി ബ്‌ളോക്ക് പഞ്ചായത്ത് പ്രസിഡന്റ് എലിസബത്ത് അബുവിന്റെ ഫണ്ടില്‍ നിന്ന് 7 ലക്ഷം രൂപ ചെലവഴിച്ചാണ് കെട്ടിടം നിര്‍മ്മിച്ചത്. വന്‍ ജനാവലിയുടെ സാന്നിദ്ധ്യത്തിലായിരുന്നു ഇന്നലെ ഉദ്ഘാടന ചടങ്ങ് നടന്നത്.
സമ്മേളനത്തിന് മുന്നോടിയായി ഈശ്വര പ്രാര്‍ത്ഥന ചൊല്ലിയതും കുഞ്ഞമ്മയാണ്. തുടര്‍ന്ന് മന്ത്രി അടൂര്‍ പ്രകാശ് നിലവിളക്ക് കൊളുത്തി ഉദ്ഘാടനം ചെയ്യുന്നതിനിടെ കുഞ്ഞമ്മ കുഴഞ്ഞ് വീഴുകയായിരുന്നു. മന്ത്രിയുടെ നിര്‍ദ്ദേശ പ്രകാരം പൊലീസ് വാഹനത്തില്‍ ഉടന്‍ തന്നെ സമീപത്തെ സ്വകാര്യ ആശുപത്രിയില്‍ എത്തിച്ചെങ്കിലും മരണം സംഭവിച്ചിരുന്നു. 
പരേതനായ ഗോപാലപിള്ളയാണ് കുഞ്ഞമ്മയുടെ ഭര്‍ത്താവ്. മക്കള്‍ : ലത, ഗോപി, ശശി, വിജയലക്ഷ്മി (മദ്രാസ്), ബാലന്‍. മരുമക്കള്‍ : രവി, ശ്യാളമ, ചന്ദ്രിക, സെല്‍വരാജ് (മദ്രാസ്). സംസ്‌കാരം ഇന്ന് ഉച്ചക്ക് വീട്ടുവളപ്പില്‍ നടക്കും.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha