പ്രധാനമന്ത്രിയായി അധികാരമേറ്റെടുക്കുന്ന നരേന്ദ്ര മോദിക്ക് അപ്രതീക്ഷിതമായി ഒരു അഭ്യര്‍ഥന. മഹീന്ദ്ര ആന്‍ഡ് മഹീന്ദ്രകമ്പനിയുടെ സിഎംഡി. ആനന്ദ്‌ മഹീന്ദ്രയുടേതാണ്‌ കത്ത്. കമ്പനിയുടെ സ്‌കോര്‍പിയോ കാര്‍ പ്രധാനമന്ത്രിയുടെ ഔദ്യോഗിക വാഹനമായി ഉപയോഗിക്കണമെന്ന് അഭ്യര്‍ഥിച്ചായിരുന്നു കത്ത്. അടുത്തകാലത്തായി പ്രധാനമന്ത്രിമാര്‍ ഉപയോഗിക്കുന്നത് ബിഎംഡബ്ല്യു കാറായിരുന്നു. മന്‍മോഹന്‍ സിംഗും പതിവ് തെറ്റിച്ചില്ല.

എന്നാല്‍ ഈ പതിവ് തെറ്റിക്കണമെന്നും പ്രധാനമന്ത്രിയുടെ ഔദ്യോഗിക വാഹനമായി ഇന്ത്യയില്‍ നിര്‍മിക്കുന്ന സ്‌കോര്‍പിയോ ഉപയോഗിക്കണമെന്നുമാണ് ആനന്ദ് ആവശ്യപ്പെട്ടത്. പ്രധാനമന്ത്രിയുടെ വാഹനത്തിന് മതിയായ സുരക്ഷ ഒരുക്കി വാഹനം പരിഷ്‌കരിച്ചു നല്‍കാമെന്ന ഉറപ്പും കമ്പനി നല്‍കിയിട്ടുണ്ട്. തെരഞ്ഞെടുപ്പ് പ്രചാരണ വേളകളില്‍ മോദിയുടെ യാത്രകളെല്ലാം തന്റെ പ്രിയപ്പെട്ട സ്‌കോര്‍പിയോ വാഹനത്തിലായിരുന്നു. ഒപ്പമുണ്ടായിരുന്ന വാഹന വ്യൂഹങ്ങളും സ്‌കോര്‍പിയോ തന്നെയായിരുന്നു.

രാഷ്ട്രപതി ഭവനില്‍ മോദി സത്യപ്രതിജ്ഞയ്ക്ക് എത്തിയതും സ്‌കോര്‍പിയോ കാറുകളുടെ വന്‍ നിരയുടെ അകമ്പടിയോടെയായിരുന്നു. ഇതൊക്കെയാണ് ഇത്തരമൊരു അഭ്യര്‍ഥന നടത്താന്‍ കമ്പനിയെ പ്രേരിപ്പിച്ചത്. തങ്ങളുടെ കമ്പനിക്കും രാജ്യത്തിനും ഇത് അഭിമാനമായിരിക്കുമെന്നും കത്തിലൂടെ കമ്പനി ഓര്‍മിപ്പിക്കുന്നു. ട്വിറ്ററിലൂടെയും ആനന്ദ് മഹീന്ദ്ര ഇക്കാര്യം അഭ്യര്‍ഥിച്ചു. ട്വീറ്റില്‍ വന്‍ ജനപിന്തുണയും ലഭിക്കുന്നുണ്ട്.

ഇതേക്കുറിച്ച് പ്രധാനമന്ത്രിയുടെ ഓഫീസ് ഇതുവരെ പ്രതികരിച്ചിട്ടില്ല. എസ്പിജിയാകും പ്രധാനമന്ത്രിയുടെ വാഹനം സംബന്ധിച്ച് അന്തിമ തീരുമാനം  എടുക്കുന്നത്. അതുകൊണ്ടുതന്നെ അവരുടെ അംഗീകാരമായിരിക്കും ഇതിന് ആദ്യം ലഭിക്കേണ്ടത്. അതേസമയം ചുമതലയേല്‍ക്കാന്‍ മോദി ഓഫീസിലെത്തിയത് പ്രധാനമന്ത്രിമാരുടെ സ്ഥിരം വാഹനമായ കറുത്ത ബിഎംഡബ്ല്യു കാറിലാണ്. ഇതു മാറി ഇന്ത്യന്‍ നിര്‍മിത വാഹനം മോദി സ്വീകരിക്കുമോ എന്നു കണ്ടറിയേണ്ടതാണ്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha