ഇന്നലെ ഉച്ചയോടെ ഉണ്ടായ ഹൃദയാഘാതത്തെത്തുടര്‍ന്ന് ഓസ്ട്രേലിയന്‍ ക്രിക്കറ്റ് താരവും കോച്ചും കമന്റേറ്ററുമായ ഡീന്‍ ജോണ്‍സ് (59) അന്തരിച്ചു. ഇന്ത്യന്‍ പ്രീമിയര്‍ ലീഗ് ട്വന്റി20 ക്രിക്കറ്റിന്റെ 13-ാം സീസണില്‍ സ്റ്റാര്‍ ഇന്ത്യക്കു വേണ്ടി കമന്റേറ്ററായി പ്രവര്‍ത്തിക്കുകയായിരുന്നു. മുംബൈയിലിരുന്നായിരുന്നു ജോണ്‍സും സംഘവും കമന്ററി നല്‍കിയിരുന്നത്.

രാവിലെ പ്രഭാത ഭക്ഷണത്തിനു ശേഷം നടന്ന കമന്റേറ്ററര്‍മാരുടെ യോഗത്തില്‍ ജോണ്‍സ് പങ്കെടുത്തിരുന്നു. ബുധനാഴ്ച നടന്ന മത്സരത്തിലും ജോണ്‍സ് കമന്റേറ്ററായിരുന്നു. സഹപ്രവര്‍ത്തകര്‍ക്കൊപ്പം ഹോട്ടല്‍ മുറിയിലേക്കു നടക്കുന്നതിനിടെ ഇടനാഴിയില്‍ കുഴഞ്ഞു വീഴുകയായിരുന്നു. ഹോട്ടലില്‍ തന്നെയുണ്ടായിരുന്ന ആംബുലന്‍സില്‍ ഹര്‍കിസന്ദാസ് ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല. ഓസ്ട്രേലിയയുടെ മുന്‍ താരം ബ്രെറ്റ് ലീ ജോണ്‍സിനൊപ്പമുണ്ടായിരുന്നു. ഹൃദയാഘാതം ഉണ്ടായുടന്‍ പ്രഥമ ശുശ്രൂഷ നല്‍കിയെന്നു ബ്രെറ്റ് ലീ പറഞ്ഞു. ജോണ്‍സിന്റെ മൃതദേഹം കോവിഡ് -19 വൈറസ് പരിശോധനകള്‍ക്കു ശേഷം നാട്ടിലേക്കു കൊണ്ടു പോകുമെന്നാണ് സൂചന.

1987-ലെ ഏകദിന ലോകകപ്പ് കിരീടം നേടിയ ഓസ്ട്രേലിയന്‍ ടീമില്‍ അംഗമായിരുന്നു. ഓസ്ട്രേലിയയ്ക്കു വേണ്ടി 59 ടെസ്റ്റുകളും 164 ഏകദിനങ്ങളും കളിച്ച താരമാണ്. 1986-ലെ ചെന്നൈ ടെസ്റ്റ് ജോണ്‍സിന്റെ പ്രകടനത്തിന്റെ പേരിലാണ് ക്രിക്കറ്റ് പ്രേമികള്‍ ഓര്‍മിക്കുന്നത്. മത്സരം ടൈയായെങ്കിലും ഡീന്‍ ജോണ്‍സ് നേടിയ ഇരട്ട സെഞ്ചുറി (330 പന്തില്‍ രണ്ട് സിക്സറും 27 ഫോറുമടക്കം 210) ചരിത്രമാണ്.

1961 മാര്‍ച്ച് 24-നു വിക്ടോറിയയിലെ കോബര്‍ഗില്‍ ജനിച്ച ഡീന്‍ മെര്‍വിന്‍ ജോണ്‍സ് 52 ടെസ്റ്റുകളിലായി 46.55 ശരാശരിയില്‍ 3631 റണ്ണും 11 സെഞ്ചുറികളും 14 അര്‍ധ സെഞ്ചുറികളും നേടി. 164 ഏകദിനങ്ങളിലായി 44.61 ശരാശരിയില്‍ 6068 റണ്ണും ഏഴ് സെഞ്ചുറികളും 46 അര്‍ധ സെഞ്ചുറികളും നേടി. ഫസ്റ്റ് ക്ലാസ് ക്രിക്കറ്റില്‍ ട്രിപ്പിള്‍ സെഞ്ചുറിയും (324) നേടിയിട്ടുണ്ട്.

ജോണ്‍സിന്റെ അന്ത്യം സ്റ്റാര്‍ ഇന്ത്യയാണ് ഔദ്യോഗികമായി പുറത്തുവിട്ടത്. രാജ്യാന്തര ക്രിക്കറ്റ് കൗണ്‍സിലും ഓസ്ട്രേലിയന്‍ ക്രിക്കറ്റ് ടീം കോച്ച് ജസ്റ്റിന്‍ ലാംഗറും ജോണ്‍സിന്റെ വിയോഗത്തില്‍ നടുക്കം രേഖപ്പെടുത്തി. ഇന്ത്യന്‍ ടീം നായകന്‍ വിരാട് കോഹ്ലി, കോച്ച് രവി ശാസ്ത്രി, മാസ്റ്റര്‍ ബ്ലാസ്റ്റര്‍ സച്ചിന്‍ തെണ്ടുല്‍ക്കര്‍, വിരേന്ദര്‍ സേവാഗ് എന്നിവരും ജോണ്‍സിന്റെ വിയോഗത്തില്‍ അനുശോചിച്ചു.

പാകിസ്താന്‍ സൂപ്പര്‍ ലീഗില്‍ ഇസ്ലാമാബാസ് യുണൈറ്റഡിന്റെ കോച്ചായി 2015 മുതല്‍ 2019 വരെ പ്രവര്‍ത്തിച്ചു. 2017-ല്‍ കുറച്ചുനാള്‍ അഫ്ഗാനിസ്ഥാന്‍ ടീമിനെയും പരിശീലിപ്പിച്ചു. ഡീന്‍ ജോണ്‍സിന്റെ വേര്‍പാട് ഉള്‍ക്കൊള്ളാനാകുന്നില്ലെന്നു ഭാര്യ ജെയ്ന്‍, മക്കളായ ഇസബെല്ല, ഫോയ്മ എന്നിവര്‍ക്കുള്ള അനുശോചന സന്ദേശത്തില്‍ ക്രിക്കറ്റ് ഓസ്ട്രേലിയ ചെയര്‍മാന്‍ ഏള്‍ എഡിങ്സ് പറഞ്ഞു.