കഴിഞ്ഞ ദിവസം മുബൈക്കെതിരായ ഐ.പി.എല്‍ മത്സരത്തില്‍ റോയല്‍ ചലഞ്ചേഴ്​സ്​ ബാംഗ്ലൂരും മുംബൈ ഇന്ത്യൻസും തീപാറുന്ന പോരാട്ടമാണ് കാഴ്ചവച്ചത്. ഗ്ലെന്‍ മക്​സ്​വെലും (56) എ.ബി ഡിവില്ലിയേഴ്​സും (11) അടുത്തടുത്ത പന്തുകളിലാണ്​ ഔട്ടായത്. ഇത് റോയൽ ചലഞ്ചേഴ്സിന് തീരാനഷ്ടമാണ് സമ്മാനിച്ചത്​. നിലവിലെ ജേതാക്കളായ മുംബൈയെ നേരിടുമ്പോള്‍ വന്‍ സ്​കോര്‍ ലക്ഷ്യമിടുകയായിരുന്ന ബാംഗ്ലൂര്‍ ജസ്​പ്രീത്​ ബൂംറയുടെ 19ാം ഓവറില്‍​ രണ്ട്​ വെടിക്കെട്ട്​ താരങ്ങളെ നഷ്​ടപ്പെട്ട കടുത്ത നിരാശയിലായിരുന്നു.

എന്നാൽ ചർച്ചയായത് മറ്റൊന്നായിരുന്നു. ബൂംറയുടെ പന്തില്‍ വിക്കറ്റ്​ കീപ്പര്‍ക്ക്​ ക്യാച്​ സമ്മാനിച്ച്‌​ ഡിവില്ലിയേഴ്​സ്​ തിരികെ നടക്കുമ്പോള്‍ ഗാലറിയില്‍ ഏറെ നിരാശയിലായ മറ്റൊരാള്‍ കൂടിയുണ്ടായിരുന്നു. ഡിവില്ലിയേഴ്‌സിന്‍റെ മകൻ​. ഡിവില്ലിയേഴ്‌സ് പുറത്തായ നിരാശയില്‍ സമീപത്തുണ്ടായിരുന്ന കസേരയില്‍ അടിക്കുന്ന മകന്‍റെ ദൃശ്യങ്ങള്‍ ക്യാമറകൾ ഒപ്പിയെടുത്തതോടെ കാണികളുടെ ശ്രദ്ധയും അതിലേക്കായിരുന്നു.

ഇടിയുടെ ആഘാതത്തിൽ വേദനിച്ചതോടെ ഉടന്‍ തന്നെ കൈ വലിക്കുന്നതും അമ്മ ഡാനിയേല ആശ്വസിപ്പിക്കുകയും ചെയ്യുന്ന വിഡിയോ ഇപ്പോൾ സാമൂഹിക മാധ്യമങ്ങളില്‍ വൈറലായി മാറിയിരിക്കുകയാണ്. ഈ സീസണില്‍ 10 മത്സരങ്ങളില്‍ ആര്‍.സി.ബി ജഴ്​സിയണിഞ്ഞ ദക്ഷിണാഫ്രിക്കന്‍ താരം 230 റണ്‍സ്​ നേടിയിട്ടുണ്ട്​.

അതോടൊപ്പം തന്നെ നിശ്ചിത ഓവറില്‍ ആര്‍.സി.ബി ആറുവിക്കറ്റ്​ നഷ്​ടത്തില്‍ 165 റണ്‍സെടുത്തു. 18.1ഓവറില്‍ മുംബൈയെ 111 റണ്‍സിന്​ എറിഞ്ഞിട്ട ബാംഗ്ലൂര്‍ സീസണിലെ ആറാം ജയം സ്വന്തമാക്കിയിരുന്നു. ഹാട്രിക്കടക്കം നാലുവിക്കറ്റ്​ വീഴ്​ത്തിയ ഹര്‍ഷല്‍ പട്ടേലാണ്​ ടീമിന്​ മിന്നുന്ന ജയം സമ്മാനിച്ചിരുന്നത്​.