ട്വന്റി 20 ലോകകപ്പ് ഗ്രൂപ്പ് ഘട്ടത്തിന് ആവേശകരമായ തുടക്കം. ഗീലോംഗില്‍ നടന്ന ഉദ്ഘാടന മത്സരത്തില്‍ ഏഷ്യന്‍ ചാമ്പ്യന്മാരായ ശ്രീലങ്കയ്‌ക്കെതിരെ നമീബിയക്ക് അട്ടിമറി വിജയം. 55 റണ്‍സിനാണ് കുട്ടി ക്രിക്കറ്റിലെ കുഞ്ഞന്മാര്‍ ലങ്കന്‍ കരുത്തിനെ കടപുഴക്കിയത്.

നേരത്തേ, ടോസ് നഷ്ടമായി ബാറ്റിംഗിനിറങ്ങിയ നമീബിയ, 20 ഓവറില്‍ 7 വിക്കറ്റ് നഷ്ടത്തില്‍ 163 റണ്‍സ് നേടി. 28 പന്തില്‍ 44 റണ്‍സ് നേടിയ ജാന്‍ ഫ്രൈലിങ്കും 16 പന്തില്‍ 31 റണ്‍സ് നേടിയ ജെ ജെ സ്മിത്തുമാണ് നമീബിയക്ക് വേണ്ടി തിളങ്ങിയത്.

ശ്രീലങ്കയുടെ മറുപടി ഒരു ഓവര്‍ ബാക്കിനില്‍ക്കെ 108 റണ്‍സില്‍ അവസാനിച്ചു. നമീബിയയുടെ വിജയം 55 റണ്‍സിന്. 23 പന്തില്‍ രണ്ടു ഫോറും ഒരു സിക്‌സും സഹിതം 29 റണ്‍സെടുത്ത ക്യാപ്റ്റന്‍ ദസൂന്‍ ഷനകയാണ് ശ്രീലങ്കയുടെ ടോപ് സ്‌കോറര്‍. ക്യാപ്റ്റനു പുറമെ ലങ്കന്‍ നിരയില്‍ രണ്ടക്കത്തിലെത്തിയത് ഭാനുക രജപക്‌സെ (21 പന്തില്‍ 20), മഹീഷ് തീക്ഷണ (11 പന്തില്‍ പുറത്താകാതെ 11), ധനഞ്ജയ ഡിസില്‍വ (11 പന്തില്‍ 12) എന്നിവര്‍ മാത്രം. പാത്തും നിസ്സങ്ക (10 പന്തില്‍ 9), കുശാല്‍ മെന്‍ഡിസ് (ആറു പന്തില്‍ ആറ്), ധനുഷ്‌ക ഗുണതിലക (0), വാനിന്ദു ഹസരംഗ (എട്ടു പന്തില്‍ നാല്), ചാമിക കരുണരത്‌നെ (എട്ട് പന്തില്‍ അഞ്ച്), പ്രമോദ് മധുഷന്‍ (0), ദുഷ്മന്ത ചമീര (15 പന്തില്‍ എട്ട്) എന്നിവര്‍ നിരാശപ്പെടുത്തി.

നമീബിയയ്ക്കായി ഡേവിഡ് വീസ് നാല് ഓവറില്‍ 16 റണ്‍സ് വഴങ്ങിയും ബെര്‍ണാര്‍ഡ് സ്‌കോള്‍ട്‌സ് നാല് ഓവറില്‍ 18 റണ്‍സ് വഴങ്ങിയും രണ്ടു വിക്കറ്റ് വീതം വീഴ്ത്തി. ബെന്‍ ഷികോംഗോ മൂന്ന് ഓവറില്‍ 22 റണ്‍സ് വഴങ്ങിയും യാന്‍ ഫ്രൈലിങ്ക് നാല് ഓവറില്‍ 26 റണ്‍സ് വഴങ്ങിയും രണ്ടു വിക്കറ്റ് വീതം സ്വന്തമാക്കി. ഒരു വിക്കറ്റ് സ്മിത്തിനും ലഭിച്ചു.

നേരത്തെ, യാന്‍ ഫ്രൈലിങ്ക് – സ്മിത്ത് സഖ്യം അവസാന 5 ഓവറില്‍ അടിച്ചെടുത്ത 68 റണ്‍സാണ് ശ്രീലങ്കയ്‌ക്കെതിരെ നമീബിയയ്ക്ക് മികച്ച സ്‌കോര്‍ സമ്മാനിച്ചത്. 15–ാം ഓവറിലെ മൂന്നാം പന്തില്‍ ഒരുമിച്ച ഫ്രൈലിങ്ക് – സ്മിത്ത് സഖ്യം 34 പന്തില്‍ അടിച്ചെടുത്തത് 70 റണ്‍സാണ്. ഫ്രൈലിങ്ക് 28 പന്തില്‍ നാലു ഫോറുകളോടെ 44 റണ്‍സെടുത്ത് അവസാന പന്തില്‍ പുറത്തായി. സ്മിത്ത് 16 പന്തില്‍ രണ്ടു വീതം സിക്‌സും ഫോറും സഹിതം 31 റണ്‍സുമായി പുറത്താകാതെ നിന്നു.

ലോഫ്ടി–ഈട്ടണ്‍ (12 പന്തില്‍ 20), ബാര്‍ഡ് (24 പന്തില്‍ 26), ക്യാപ്റ്റന്‍! ജെറാര്‍ദ് ഇറാസ്മസ് (24 പന്തില്‍ 20) എന്നിവരും നമീബിയയ്ക്കായി ഭേദപ്പെട്ട പ്രകടനം കാഴ്ചവച്ചു. ശ്രീലങ്കയ്ക്കായി പ്രമോദ് മധുഷന്‍ രണ്ടു വിക്കറ്റ് വീഴ്ത്തി. മഹീഷ് തീക്ഷണ, ദുഷ്മന്ത ചമീര, ചാമിക കരുണരത്‌നെ, വാനിന്ദു ഹസരംഗ എന്നിവര്‍ ഓരോ വിക്കറ്റ് വീഴ്ത്തി.
ന്മ ഗ്രൂപ്പ് ഘട്ടത്തില്‍ മത്സരിക്കാന്‍ ശ്രീലങ്ക, വിന്‍ഡീസ്

രണ്ട് തവണ ചാംപ്യന്‍മാരായ വെസ്റ്റിന്‍ഡീസും ഒരു തവണ കിരീടമുയര്‍ത്തിയ ശ്രീലങ്കയും മത്സരിക്കുന്നുവെന്നതാണ് ഗ്രൂപ്പ് മത്സരങ്ങളുടെ ആവേശമുയര്‍ത്തുന്ന ഘടകം. ഗ്രൂപ്പ് റൗണ്ടിലെ 8 ടീമുകളില്‍ നിന്ന് 4 ടീമുകള്‍ സൂപ്പര്‍ 12 റൗണ്ടിലേക്കു മുന്നേറും.