ദക്ഷിണാഫ്രിക്കയ്‌ക്കെതിരായ വെടിക്കെട്ടിന് പിന്നാലെ കേരളാ ടീമില്‍ തിരിച്ചെത്തിയ സഞ്ജു സാംസന് മികച്ച ബാറ്റിംഗ് പുറത്തെടുക്കാനായിരുന്നില്ല. മുപ്പതില്‍ കൂടുതല്‍ റെണ്‍ നേടിയ മത്സരത്തില്‍ കേരളാ ടീം വിജയിച്ചതുമില്ല. താരത്തിന്റെ നാലാം മത്സരത്തില്‍ സച്ചിന്‍ ബേബിയെയും കൂട്ടുപിടിച്ച് വെടിക്കെട്ട് പ്രകടനമാണ് സഞ്ജു പുറത്തെടുത്തത്. കേരളത്തിന് ഗംഭീര വിജയമാണ് ഇരുവരും ചേര്‍ന്ന് സമ്മാനിച്ചത്.

സയ്യിദ് മുഷ്താഖ് അലി ട്രോഫിയില്‍ ജമ്മു കശ്മീരിനെ 62 റണ്‍സിനാണ് കേരളം കീഴടക്കിയത്. അങ്ങനെ ടീം കേരളാ നോക്കൗട്ട് പ്രതീക്ഷയും സജീവമാക്കി. എലൈറ്റ് ഗ്രൂപ്പ് സിയില്‍ തുടര്‍ച്ചയായ രണ്ടു തോല്‍വികള്‍ക്കു ശേഷമുള്ള നായകന്‍ സഞ്ജു സാംസണിന്റെയും സച്ചിന്‍ ബേബിയുടേയും ബാറ്റിങ് ഷോയാണ് കേരളത്തിന് മികച്ച വിജയം സമ്മാനിച്ചത്.

മത്സരത്തില്‍ ടോസ് നേടി ബാറ്റിങ് തിരഞ്ഞെടുത്ത കേരളം നിശ്ചിത 20 ഓവറില്‍ നാലു വിക്കറ്റ് നഷ്ടത്തില്‍ നേടിയത് 184 റണ്‍സ്. ജമ്മു കശ്മീരിന്റെ മറുപടി 19 ഓവറില്‍ 122 റണ്‍സില്‍ അവസാനിച്ചു. ടൂര്‍ണമെന്റിലെ ആദ്യ മൂന്നു കളികളും ജയിച്ച് പ്രതീക്ഷ നല്‍കിയ കേരളം, തുടര്‍ന്നുള്ള രണ്ടു കളികള്‍ തോറ്റത് തിരിച്ചടിയായിരുന്നു. ഇനി ശനിയാഴ്ച മേഘാലയയ്‌ക്കെതിരെയാണ് കേരളത്തിന്റെ അടുത്ത മത്സരം.

കേരളം ഉയര്‍ത്തിയ് 185 റണ്‍സ് വിജയലക്ഷ്യം പിന്തുടര്‍ന്ന ജമ്മു കശ്മീരിന് ഓപ്പണര്‍മാര്‍ മികച്ച തുടക്കമാണ് സമ്മാനിച്ചത്. 25 പന്തില്‍ 42 റണ്‍സ് നേടിയ ശേഷമാണ് ഓപ്പണിങ് കൂട്ടുകെട്ട് പിരിഞ്ഞത്. പിന്നീട് കൃത്യമായ ഇടവേളകളില്‍ വിക്കറ്റുകള്‍ കണ്ടെത്തിയ കേരള ബോളര്‍മാര്‍ ടീമിനു വിജയം സമ്മാനിച്ചു. നാല് ഓവറില്‍ 21 റണ്‍സ് വഴങ്ങി മൂന്നു വിക്കറ്റ് വീഴ്ത്തിയ ബേസില്‍ തമ്പി, മൂന്ന് ഓവറില്‍ 15 റണ്‍സ് വഴങ്ങി മൂന്നു വിക്കറ്റെടുത്ത കെ.എം.ആസിഫ് എന്നിവര്‍ ചേര്‍ന്നാണ് ജമ്മു കശ്മീരിനെ തകര്‍ത്തത്. വൈശാഖ് ചന്ദ്രന്‍ നാല് ഓവറില്‍ 23 റണ്‍സ് വഴങ്ങി രണ്ടു വിക്കറ്റെടുത്തു. സിജോമോന്‍ ജോസഫ്, എസ്. മിഥുന്‍ എന്നിവര്‍ ഓരോ വിക്കറ്റ് വീഴ്ത്തി.

14 പന്തില്‍ തകര്‍ത്തടിച്ച് 30 റണ്‍സെടുത്ത ഓപ്പണര്‍ ശുഭം ഖജൂരിയയാണ് ജമ്മു കശ്മീരിന്റെ ടോപ് സ്‌കോറര്‍. ഹെനന്‍ നസീര്‍ (17), അബ്ദുല്‍ സമദ് (19), വിവ്രാന്ത് ശര്‍മ (11) എന്നിവരും ഭേദപ്പെട്ട പ്രകടനം കാഴ്ചവച്ചു. ഉംറാന്‍ മാലിക്ക് 12 പന്തില്‍ ഓരോ സിക്‌സും ഫോറും സഹിതം 16 റണ്‍സുമായി പുറത്താകാതെ നിന്നു.

വേഗം കൊണ്ട് വിസ്മയിപ്പിച്ച ഇന്ത്യന്‍ യുവപേസ് ബോളര്‍ ഉംറാന്‍ മാലിക്കിനെ ഉള്‍പ്പെടെ തകര്‍ത്തടിച്ചാണ് ജമ്മു കശ്മീരിനെതിരെ കേരളം മികച്ച സ്‌കോര്‍ കുറിച്ചത്. മൊഹാലിയിലെ പഞ്ചാബ് ക്രിക്കറ്റ് അസോസിയേഷന്‍ സ്റ്റേഡിയത്തില്‍ നടന്ന മത്സരത്തില്‍ ടോസ് നേടി ബാറ്റിങ് തിരഞ്ഞെടുത്ത കേരളം, നിശ്ചിത 20 ഓവറില്‍ നാലു വിക്കറ്റ് നഷ്ടത്തിലാണ് 184 റണ്‍സെടുത്തത്. ക്യാപ്റ്റന്‍ സഞ്ജു സാംസണ്‍, സച്ചിന്‍ ബേബി എന്നിവരുടെ അര്‍ധസെഞ്ചറികളുടെ കരുത്തിലാണ് കേരളം മികച്ച സ്‌കോറിലെത്തിയത്. അവസാന ഓവറുകളില്‍ അബ്ദുല്‍ ബാസിതിന്റെ ബാറ്റിങ് വെടിക്കെട്ടും കേരളത്തിന് മികച്ച സ്‌കോര്‍ സമ്മാനിക്കുന്നതില്‍ നിര്‍ണായകമായി.

32 പന്തില്‍ 62 റണ്‍സെടുത്ത സച്ചിന്‍ ബേബിയാണ് കേരളത്തിന്റെ ടോപ് സ്‌കോറര്‍. ഏഴു ഫോറും മൂന്നു സിക്‌സും ഉള്‍പ്പെടുന്നതാണ് സച്ചിന്റെ ഇന്നിങ്‌സ്. കരുതലോടെ ബാറ്റു ചെയ്ത ക്യാപ്റ്റന്‍ സഞ്ജു, 56 പന്തില്‍ 61 റണ്‍സെടുത്ത് പുറത്തായി. ആറു ഫോറും ഒരു സിക്‌സും ഉള്‍പ്പെടുന്നതാണ് സഞ്ജുവിന്റെ ഇന്നിങ്‌സ്. അവസാന ഓവറില്‍ റണ്‍നിരക്ക് ഉയര്‍ത്താനുള്ള ശ്രമത്തിലാണ് സഞ്ജു പുറത്തായത്. അബ്ദുല്‍ ബാസിത് 11 പന്തില്‍ ഒരു ഫോറും രണ്ടു സിക്‌സും സഹിതം 24 റണ്‍സുമായി പുറത്താകാതെ നിന്നു. വിഷ്ണു വിനോദ് ഒരു പന്തില്‍ ഒരു റണ്ണെടുത്ത് ബാസിതിനു കൂട്ടുനിന്നു. ഓപ്പണര്‍ രോഹന്‍ എസ്.കുന്നുമ്മല്‍ 20 പന്തില്‍ അഞ്ച് ഫോറും ഒരു സിക്‌സും സഹിതം 29 റണ്‍സെടുത്തു. നിരാശപ്പെടുത്തിയത് നേരിട്ട ആദ്യ പന്തില്‍ പുറത്തായ ഓപ്പണര്‍ മുഹമ്മദ് അസ്ഹറുദ്ദീന്‍ മാത്രം.

ഇന്നിങ്‌സിലെ ആദ്യ പന്തില്‍ത്തന്നെ ഓപ്പണര്‍ മുഹമ്മദ് അസ്ഹറുദ്ദീന്റെ വിക്കറ്റ് നഷ്ടമായ കേരളത്തിന് രണ്ട്, മൂന്ന്, നാല് വിക്കറ്റുകളില്‍ യഥാക്രമം രോഹന്‍ എസ് കുന്നുമ്മല്‍, സച്ചിന്‍ ബേബി, അബ്ദുല്‍ ബാസിത് എന്നിവരെ കൂട്ടുപിടിച്ച് പടുത്തുയര്‍ത്തിയ മികച്ച കൂട്ടുകെട്ടുകളാണ്. ഇതില്‍ ആദ്യ രണ്ടും അര്‍ധസെഞ്ചറി കൂട്ടുകെട്ടുകളായിരുന്നു.

രണ്ടാം വിക്കറ്റില്‍ സഞ്ജു രോഹന്‍ സഖ്യം 44 പന്തില്‍ 50 റണ്‍സ് കൂട്ടിച്ചേര്‍ത്തു. മൂന്നാം വിക്കറ്റില്‍ സഞ്ജു സച്ചിന്‍ വെറും 55 പന്തില്‍നിന്ന് അടിച്ചെടുത്തത് 90 റണ്‍സാണ്. പതുക്കെ ബാറ്റിങ് തുടങ്ങിയ ഇരുവരും പിന്നീട് തകര്‍ത്തടിച്ചാണ് കേരള ഇന്നിങ്‌സിന് കരുത്തു പകര്‍ന്നത്. സച്ചിന്‍ ബേബി പുറത്തായ ശേഷം അബ്ദുല്‍ ബാസിതിനെ കൂട്ടുപിടിച്ച് സഞ്ജു ആക്രമണം തുടര്‍ന്നു. നാലാം വിക്കറ്റില്‍ വെറും 18 പന്തില്‍ 42 റണ്‍സടിച്ചുകൂട്ടിയ സഞ്ജു അബ്ദുല്‍ ബാസിത് സഖ്യത്തിന്റെ ബാറ്റിങ് വിസ്‌ഫോടനമാണ് കേരള സ്‌കോര്‍ 180 കടത്തിയത്.

ജമ്മു കശ്മീരിനായി മുസ്തഫ യൂസഫ് നാല് ഓവറില്‍ 47 റണ്‍സ് വഴങ്ങി രണ്ടു വിക്കറ്റ് വീഴ്ത്തി. ഉംറാന്‍ മാലിക്ക് നാല് ഓവറില്‍ 41 റണ്‍സ് വഴങ്ങിയും ആബിദ് മുഷ്താഖ് നാല് ഓവറില്‍ 34 റണ്‍സ് വഴങ്ങിയും ഓരോ വിക്കറ്റ് വീഴ്ത്തി.