ആകാംക്ഷയോടെ ആരാധകര്‍.... ട്വന്റി 20 ക്രിക്കറ്റ് ലോകകപ്പില്‍ ഇന്ത്യക്ക് ഇന്ന് സെമി പരീക്ഷ.... ട്വന്റി20 ലോകകപ്പില്‍ ഫൈനല്‍ ലക്ഷ്യമിട്ട് ഇന്ത്യ ഇന്ന് നടക്കുന്ന സെമിയില്‍ ഇംഗ്ലണ്ടിനെ നേരിടും.

അഡ്ലെയ്ഡില്‍ നടക്കുന്ന സെമിഫൈനലില്‍ ഇംഗ്ലണ്ടിനെ നേരിടുമ്പോള്‍ ചുവട് പിഴയ്ക്കാതിരിക്കാന്‍ രോഹിത് ശര്‍മയും സംഘവും ജാഗരൂകരായേ മതിയാവൂ. ഗ്രൂപ്പുഘട്ടത്തില്‍ ഇംഗ്ലണ്ടിനേക്കാള്‍ മികച്ച പ്രകടനമായിരുന്നു ലോക ഒന്നാം നമ്പര്‍ ടീമായ ഇന്ത്യയുടേത്. ഇന്ത്യ ഗ്രൂപ്പു ജേതാക്കളായപ്പോള്‍ രണ്ടാം സ്ഥാനക്കാരായാണ് ലോക രണ്ടാം നമ്പര്‍ ടീമായ ഇംഗ്ലണ്ട് സെമിയിലെത്തിയത്.

അന്താരാഷ്ട്ര ക്രിക്കറ്റ് കൗണ്‍സിലിന്റെ ടൂര്‍ണമെന്റുകളില്‍ പലപ്പോഴും ഇന്ത്യക്ക് സെമിയിലും ഫൈനലിലും കാലിടറിയിട്ടുണ്ട്. 2014 ട്വന്റി 20 ലോകകപ്പ് ഫൈനല്‍, 2016 ട്വന്റി 20 ലോകകപ്പ് സെമിഫൈനല്‍, 2017 ചാമ്പ്യന്‍സ് ട്രോഫി ഫൈനല്‍, 2019 ഏകദിന ലോകകപ്പ് ഫൈനല്‍ എന്നിവയിലെല്ലാം ഇന്ത്യ പരാജയപ്പെട്ടു.

ആ മത്സരങ്ങളിലെല്ലാം രോഹിത് ശര്‍മ കളിച്ചിട്ടുണ്ട്. ക്യാപ്റ്റനായിരുന്നില്ലെന്നുമാത്രം. കിരീടവരള്‍ച്ചയാണ് വിരാട് കോലിയുടെ ക്യാപ്റ്റന്‍സിക്ക് പ്രതിസന്ധിയുണ്ടാക്കിയത്.

ഇംഗ്ലണ്ടിനെതിരേ ക്യാപ്റ്റന്റെ ഇന്നിങ്സ് ആരാധകര്‍ പ്രതീക്ഷിക്കുന്നു. ദിനേഷ് കാര്‍ത്തിക്കിന് പകരം ഋഷഭ് പന്തും അക്സര്‍ പട്ടേലിന് പകരം യുസ്വേന്ദ്ര ചാഹലും കളിക്കുമോ എന്നാണ് ഇന്ത്യന്‍ ക്യാമ്പിലെ ആകാംക്ഷ. കഴിഞ്ഞമത്സരത്തില്‍ ഋഷഭ് കളിച്ചെങ്കിലും ശോഭിച്ചില്ല. അഞ്ചാം നമ്പറില്‍ ഇറങ്ങി ആക്രമിച്ചുകളിക്കണോ പ്രതിരോധിക്കണോ എന്ന ആശയക്കുഴപ്പത്തിലാണ് ഋഷഭ്.


അതേസമയം ഇംഗ്ലണ്ടിനെതിരെ അവസാനം കളിച്ച നാല് ട്വന്റി-20 പരമ്പരകളിലും ജയിക്കാനായത് ഇന്ത്യയുടെ ആത്മവിശ്വാസം വര്‍ദ്ധിപ്പിക്കുന്നു. ഇന്നലെ നടന്ന ആദ്യ സെമിയില്‍ ന്യൂസിലന്‍ഡിനെ 7 വിക്കറ്റിന് തോല്‍പ്പിച്ച് പാകിസ്ഥാന്‍ ഫൈനലിലെത്തി.

ആദ്യം ബാറ്റ് ചെയ്ത ന്യൂസിലന്‍ഡ് 20 ഓവറില്‍ 4 വിക്കറ്റ് നഷ്ടത്തില്‍152 റണ്‍സ് നേടി. മറുപടിക്കിറങ്ങിയ പാകിസ്ഥാന്‍ 5 പന്ത് ശേഷിക്കെ 3 വിക്കറ്റ് മാത്രം നഷ്ടപ്പെടുത്തി വിജയലക്ഷ്യത്തില്‍ എത്തുകയും ചെയ്തു.