വമ്പന്‍ ലക്ഷ്യത്തിനായി പൊരുതിയ ബംഗ്ലാദേശ് ഒടുവില്‍ ഇന്ത്യക്കു മുന്നില്‍ കീഴടങ്ങി. ഒന്നാം ടെസ്റ്റില്‍ 188 റണ്‍സിന്റെ ജയവുമായി ഇന്ത്യ പരമ്പരയില്‍ മുന്നിലെത്തി.


സ്‌കോര്‍: ഇന്ത്യ -404, രണ്ടു വിക്കറ്റ് നഷ്ടത്തില്‍ 258 (ഡിക്ലെയര്‍). ബംഗ്ലാദേശ് -150, 324. ജയത്തിന് 513 റണ്‍സ് ആവശ്യമുള്ള ആതിഥേയരുടെ രണ്ടാം ഇന്നിങ്‌സ് 324 റണ്‍സില്‍ അവസാനിച്ചു.

അഞ്ചാം ദിനം ആറു വിക്കറ്റിന് 272 റണ്‍സെന്ന നിലയില്‍ ബാറ്റിങ് പുനരാരംഭിച്ച ആതിഥേയര്‍ക്ക്, 52 റണ്‍സ് കൂടി കൂട്ടിച്ചേര്‍ക്കാനെ കഴിഞ്ഞുള്ളു. 13 റണ്‍സെടുത്ത മെഹ്ദി ഹസനെ പുറത്താക്കി മുഹമ്മദ് സിറാജാണ് വിക്കറ്റ് വേട്ടക്ക് തുടക്കമിട്ടത്. പൊരുതിനിന്ന നായകന്‍ ഷക്കീബുല്‍ ഹസനെ കുല്‍ദീപ് യാദവ് പുറത്താക്കി. താരം 108 പന്തില്‍നിന്ന് 84 റണ്‍സെടുത്തു.

പിന്നാലെയെത്തിയ തെയ്ജുല്‍ ഇസ്ലാമും (15 പന്തില്‍ നാല് റണ്‍സ്) ഇബാദത്ത് ഹൊസ്സൈനും (പൂജ്യം) വേഗത്തില്‍ മടങ്ങി. റണ്ണൊന്നുമെടുക്കാതെ ഖാലിദ് അഹ്മദ് പുറത്താകാതെ നിന്നു.നാലു വിക്കറ്റെടുത്ത അക്‌സര്‍ പട്ടേലും മൂന്നു വിക്കറ്റെടുത്ത കുല്‍ദീപ് യാദവുമാണ് ഇന്ത്യന്‍ ജയം എളുപ്പമാക്കിയത്. മുഹമ്മദ് സിറാജ്, ഉമേഷ് യാദവ്, ആര്‍. ആശ്വിന്‍ എന്നിവര്‍ ഓരോ വിക്കറ്റ് വീതം നേടി.

224 പന്തില്‍ നൂറ് റണ്‍സെടുത്ത അരങ്ങേറ്റക്കാരന്‍ ഓപണര്‍ സാക്കിര്‍ ഹസനാണ് ബംഗ്ലാദേശിന്റെ ടോപ് സ്‌കോറര്‍.