ഇന്ത്യ ബംഗ്ലാദേശ് രണ്ടാം ക്രിക്കറ്റ് ടെസ്റ്റിന് ധാക്കയില്‍ തുടക്കം. ടോസ് നേടി ബാറ്റിങ് തിരഞ്ഞെടുത്ത ബംഗ്ലാദേശ് മൂന്ന് ഓവറില്‍ വിക്കറ്റ് നഷ്ടം കൂടാതെ എട്ടു റണ്‍സ് എന്ന നിലയിലാണ്.


ഓപ്പണര്‍മാരായ സാകിര്‍ ഹസന്‍, നജ്മുല്‍ ഹുസൈന്‍ ഷാന്റോ എന്നിവര്‍ നാലു റണ്‍സ് വീതമെടുത്ത് ക്രീസില്‍. ആദ്യ മത്സരത്തില്‍ 188 റണ്‍സിന് ജയിച്ച ഇന്ത്യ പരമ്പരയില്‍ 10ന് മുന്നിലാണ്. പരുക്കു ഭേദമാകാത്ത രോഹിത് ശര്‍മയുടെ അഭാവത്തില്‍ കെ.എല്‍.രാഹുലാണ് ഇന്ത്യയെ നയിക്കുന്നത്.

ആദ്യ ടെസ്റ്റ് കളിച്ച ഇന്ത്യന്‍ നിരയില്‍ ഒരു മാറ്റമുണ്ട്. രണ്ട് ഇന്നിങ്‌സിലുമായി എട്ടു വിക്കറ്റെടുത്ത് ആദ്യ ടെസ്റ്റില്‍ തിളങ്ങിയ കുല്‍ദീപ് യാദവിനു പകരം ജയ്‌ദേവ് ഉനദ്കട് ഇന്ത്യന്‍ നിരയിലെത്തുകയും ചെയ്തു.


ബംഗ്ലാദേശ് നിരയില്‍ രണ്ടു മാറ്റങ്ങളുണ്ട്. യാസിറിനു പകരം മോമിനുല്‍ ഹഖും എബാദത്ത് ഹുസൈനു പകരം ടസ്‌കിന്‍ അഹമ്മദും ടീമിലെത്തി

ഒരു പതിറ്റാണ്ടു പിന്നിട്ട കാത്തിരിപ്പിനൊടുവിലാണ് ജയ്‌ദേവ് ഉനദ്കട് വീണ്ടും ഇന്ത്യന്‍ ജഴ്‌സി അണിയുന്നത്.

ഉനദ്കട് ഇതിനു മുന്‍പ് ടെസ്റ്റ് കളിച്ച ശേഷം ഇന്ത്യ കളിച്ചത് 118 ടെസ്റ്റ് മത്സരങ്ങളാണ്. ഇതിനു മുന്‍പ് 2010ലാണ് ഉനദ്കട് ഇന്ത്യയ്ക്കായി ടെസ്റ്റ് കളിച്ചത്. ഇതോടെ, ഏറ്റവും കൂടുതല്‍ മത്സരങ്ങള്‍ നീണ്ട ഇടവേളയ്ക്കുശേഷം ഇന്ത്യയ്ക്കായി ടെസ്റ്റ് കളിക്കുന്ന താരമെന്ന റെക്കോര്‍ഡ് ഉനദ്കടിനായി.

2010നും 2018നും ഇടയില്‍ 87 ടെസ്റ്റുകളുടെ ഇടവേളയ്ക്കു ശേഷം കളത്തിലിറങ്ങിയ ദിനേഷ് കാര്‍ത്തിക്കിന്റെ റെക്കോര്‍ഡാണ് വഴിമാറിയത്.