തുടക്കം വിജയകരം.... വനിതാ ട്വന്റി 20 ലോകകപ്പ് മത്സരത്തില്‍ പാകിസ്ഥാനെ ഏഴ് വിക്കറ്റിന് തകര്‍ത്ത് ഇന്ത്യക്ക് വിജയത്തുടക്കം..
പാകിസ്ഥാന്‍ വനിതകള്‍ മുന്നോട്ടുവെച്ച 150 റണ്‍സ് വിജയലക്ഷ്യം 19 ഓവറില്‍ മൂന്ന് വിക്കറ്റ് നഷ്ടപ്പെടുത്തിയാണ് ഇന്ത്യന്‍ വനിതകള്‍ സ്വന്തമാക്കിയത്.



ജെമീമ റോഡ്രിഗസിന്റെ ബാറ്റിംഗ് മികവിലാണ് ഇന്ത്യന്‍ വിജയം. ഓപ്പണര്‍ ഷെഫാലി വര്‍മ്മ 25 പന്തില്‍ 33 റണ്‍സെടുത്ത് പുറത്തായപ്പോള്‍ 38 പന്തില്‍ 53 റണ്‍സുമായി ജെമീമ റോഡ്രിഗസും 20 പന്തില്‍ 31 നേടി റിച്ച ഘോഷും ടീമിനെ ത്രില്ലര്‍ ജയത്തിലെത്തിക്കുകയുെ ചെയ്തു. 19-ാം ഓവറില്‍ മൂന്ന് ബൗണ്ടറികളോടെ് ജമീമ മത്സരം ഫിനിഷ് ചെയ്തു. ജമീമ-റിച്ച സഖ്യം 31 പന്തില്‍ 50 തികച്ചത് നിര്‍ണായകമായി മാറി. മറുപടി ബാറ്റിംഗില്‍ മോശമല്ലാത്ത തുടക്കമാണ് ഇന്ത്യ നേടിയത്.

സ്ഥിരം ഓപ്പണറും വൈസ് ക്യാപ്റ്റനുമായ സ്മൃതി മന്ഥാന പരിക്ക് കാരണം കളിക്കാത്തതിനാല്‍ യാഷ്തിക ഭാട്യയാണ് ഷെഫാലി വര്‍മ്മയ്ക്കൊപ്പം ഇന്ത്യന്‍ ഇന്നിംഗ്സ് ഓപ്പണ്‍ ചെയ്തത്.

20 പന്തില്‍ 17 റണ്‍സെടുത്ത യാഷ്തികയെ ഇന്ത്യക്ക് നഷ്ടമാവുമ്പോള്‍ 5.3 ഓവറില്‍ സ്‌കോര്‍ 38. സാദിയ ഇക്ബാലിനായിരുന്നു വിക്കറ്റ്. ജെമീമാ റോഡ്രിഗസിനൊപ്പം രണ്ടാം വിക്കറ്റില്‍ ഒന്നിച്ച ഷെഫാലി വര്‍മ്മ ഇന്ത്യന്‍ വനിതകളെ അനായാസം 50 കടത്തി.


എന്നാല്‍ ലോംഗ് ഓഫില്‍ സിദ്രാ അമീന്റെ വണ്ടര്‍ ക്യാച്ച് ഷെഫാലിക്ക് മടക്ക ടിക്കറ്റ് നല്‍കി. 10-ാം ഓവറിലെ ആദ്യ പന്തില്‍ നഷ്ര സന്ധു പുറത്താക്കുമ്പോള്‍ ഷെഫാലി 25 പന്തില്‍ നാല് ബൗണ്ടറികളോടെ 33 റണ്‍സ് നേടിയിട്ടുണ്ടായിരുന്നു.