ബോര്‍ഡര്‍-ഗാവസ്‌കര്‍ ട്രോഫിക്കുവേണ്ടിയുള്ള ഇന്ത്യ-ഓസ്‌ട്രേലിയ മൂന്നാം ടെസ്റ്റ് ക്രിക്കറ്റ് മത്സരം ബുധനാഴ്ചമുതല്‍ ഇന്ദോറില്‍. രാവിലെ 9.30-നാണ് മത്സരം ആരംഭിക്കുക.

നാലു മത്സരങ്ങളുള്ള ടെസ്റ്റില്‍ ആദ്യരണ്ടു കളികളും ജയിച്ച ഇന്ത്യ പരമ്പര സ്വന്തമാക്കിട്ടുണ്ട്. ബോര്‍ഡര്‍-ഗാവസ്‌കര്‍ ട്രോഫിയിലെ നിലവിലെ ജേതാക്കളായതുകൊണ്ടാണ് ഇന്ത്യ രണ്ടു മത്സരങ്ങള്‍ ജയിച്ചപ്പോള്‍ തന്നെ നാലു മത്സരങ്ങളുള്ള പരമ്പര നേടാനായത്. വരാനിരിക്കുന്ന മത്സരങ്ങളും ജയിച്ച് ലോകടെസ്റ്റ് ചാമ്പ്യന്‍ഷിപ്പിന്റെ ഫൈനലില്‍ കടക്കുകയാണ് ഇന്ത്യ ലക്ഷ്യമിടുന്നത്.

ഫോമില്ലാതെ വലയുന്ന കെ.എല്‍. രാഹുലിനു പകരം ശുഭ്മാന്‍ ഗില്‍ ഇന്ത്യന്‍സംഘത്തില്‍ ഇടംപിടിച്ചേക്കും. തുടര്‍ച്ചയായി നിറംമങ്ങിയ രാഹുല്‍ ആദ്യരണ്ടു കളികളില്‍ വൈസ് ക്യാപ്റ്റനായിരുന്നു. എന്നാല്‍ മൂന്ന്, നാല് ടെസ്റ്റുകള്‍ക്കുള്ള ടീം പ്രഖ്യാപിച്ചപ്പോള്‍ രാഹുലിന്റെ വൈസ് ക്യാപ്റ്റന്‍ പദവി ഒഴിവാക്കി. ഇതോടെ രാഹുലിന് പുറത്തേക്കുള്ള വഴിതെളിഞ്ഞിട്ടുണ്ട്.

സ്പിന്നര്‍മാരുടെ മേധാവിത്വമാണ് പരമ്പരയില്‍. രവീന്ദ്ര ജഡേജ, ആര്‍. അശ്വിന്‍, അക്ഷര്‍ പട്ടേല്‍ സ്പിന്‍ത്രയത്തിന്റെ മികവാണ് ഇന്ത്യയുടെ പ്രതീക്ഷ. ഇവര്‍ക്കൊപ്പം മുഹമ്മദ് ഷമിയും മുഹമ്മദ് സിറാജും തിളങ്ങുന്നതും പ്രതീക്ഷയുയര്‍ത്തുന്നു.

ബാറ്റര്‍മാരില്‍ രോഹിത് ശര്‍മയാണ് തിളങ്ങുന്നത്. ഈ പരമ്പരയില്‍ സെഞ്ചുറിനേടിയ ഏകതാരവും ഇന്ത്യന്‍ ക്യാപ്റ്റന്‍ മാത്രമാണ്. ഓസ്‌ട്രേലിയ തകര്‍ന്നടിഞ്ഞ ആദ്യടെസ്റ്റിലാണ് രോഹിത് 212 പന്തില്‍ 120 റണ്‍സെടുത്ത് ആതിഥേയരുടെ പ്രതീക്ഷ കാത്തത്. വിരാട് കോലി, ചേതേശ്വര്‍ പുജാര എന്നിവര്‍ മികച്ച ഫോമിലേക്കുയര്‍ന്നാല്‍ ഇന്ത്യയുടെ കരുത്തുകൂടിയേക്കും.