ഐപിഎല്ലില് സഞ്ജു സാംസണിന്റെ രാജസ്ഥാന് റോയല്സ് കൊല്ക്കത്ത നൈറ്റ് റൈഡേഴ്സിനെതിരെ ഇന്ന് പോരിനിറങ്ങും
ഐപിഎല്ലില് സഞ്ജു സാംസണിന്റെ രാജസ്ഥാന് റോയല്സിന് ഇന്ന് ജീവന്മരണ പോരാട്ടം. ഹാട്രിക് ജയം ലക്ഷ്യമിടുന്ന കൊല്ക്കത്ത നൈറ്റ് റൈഡേഴ്സാണ് എതിരാളികള്. വൈകിട്ട് ഏഴരയ്ക്ക് കൊല്ക്കത്ത ഈഡന് ഗാര്ഡന്സിലാണ് മത്സരം. പന്ത്രണ്ടാം പോരിനിറങ്ങുമ്പോള് 11 കളിയില് 10 പോയിന്റുമായി രാജസ്ഥാനും കൊല്ക്കത്തയും ഒപ്പത്തിനൊപ്പമാണ്.
ശേഷിക്കുന്ന മൂന്ന് കളിയും ജയിച്ചാലെ ഇരു ടീമുകള്ക്കും പ്ലേ ഓഫില് എത്താനാവൂ. ഇന്ന് തോല്ക്കുന്നവരുടെ ഭാവി പ്രതിസന്ധിയിലാവും. മറ്റ് ടീമുകളുടെ പ്രകടനത്തെക്കൂടി ആശ്രയിച്ചായിരിക്കും ശേഷിക്കുന്ന സാധ്യത. ഇതൊഴിവാക്കുകയാണ് ഇരുടീമുകളുടേയും ലക്ഷ്യം. സീസണില് ആദ്യ അഞ്ച് കളികളില് നാലിലും ജയിച്ച് തുടങ്ങിയ രാജസ്ഥാന് അവസാനം കളിച്ച ആറ് കളികളില് അഞ്ചിലും തോറ്റ് കിതയ്ക്കുകയാണ്.
അശ്വിനും ഹോള്ഡര്ക്കും സ്ഥാനക്കയറ്റം നല്കിയതും ഡെത്ത് ഓവര് ബൗളിംഗുമെല്ലാം വിമര്ശനത്തിന് കാരണമായി. ഇംപാക്ട് പ്ലേയറെ ഉപയോഗിച്ച രീതിയും വിമര്ശിക്കപ്പെട്ടു. രണ്ടാംഘട്ടത്തില് രാജസ്ഥാന് ജയിച്ചത് ഒരേ ഒരു മത്സരത്തില് മാത്രമാണ്. ജയിക്കാവുന്ന രണ്ട് കളികള് അവസാന ഓവറില് കൈവിട്ടു.
ഒന്ന് മുംബൈക്കെതിരെയും കഴിഞ്ഞ മത്സരം ഹൈദരാബാദിനെതിരെയും. ടൂര്ണമെന്റിലെതന്നെ ഏറ്റവും മികച്ച താരനിരയാണ് മലയാളിനായകന് സഞ്ജു സാംസണ് കിട്ടിയിരിക്കുന്നത്.
വ്യക്തിഗത മികവിനപ്പുറം ടീമെന്ന നിലയിലേക്ക് ഉയരാന് കഴിയാത്തതാണ് തിരിച്ചടിയാവുന്നു. ട്രെന്റ് ബോള്ട്ട് പരിക്ക് മാറിയെത്തുന്നത് രാജസ്ഥാന് കരുത്താവും. കൊല്ക്കത്തയാണെങ്കില് തുടര്വിജയങ്ങളുടെ ആത്മവിശ്വാസത്തിലും. അവസാനം കളിച്ച ആറ് കളികളില് നാലിലും കൊല്ക്കത്ത ജയിച്ചു. വരുണ് ചക്രവര്ത്തി, ആന്ദ്രേ റസല്, റിങ്കു സിംഗ് എന്നിവര് ഫോമില് തിരിച്ചെത്തിയതോടെയാണ് കൊല്ക്കത്തയുടെ വഴിതെളിഞ്ഞത്.
"
https://www.facebook.com/Malayalivartha
