ഏഷ്യാ കപ്പ് ഫൈനല്‍ ഉറപ്പിച്ച് ടീം ഇന്ത്യ. സൂപ്പര്‍ ഫോറിലെ രണ്ടാം മത്സരത്തില്‍ ശ്രീലങ്കയ്‌ക്കെതിരെ 41 റണ്‍സ് വിജയമാണ് ഇന്ത്യ നേടിയത്. ഇന്ത്യ ഉയര്‍ത്തിയ 214 റണ്‍സ് വിജയ ലക്ഷ്യം പിന്തുടര്‍ന്ന ശ്രീലങ്ക 41.3 ഓവറില്‍ 172 റണ്‍സെടുത്തു പുറത്താകുകയായിരുന്നു.

കുല്‍ദീപ് യാദവ് നാലു വിക്കറ്റ് വീഴ്ത്തി. സൂപ്പര്‍ ഫോറിലെ ആദ്യ മത്സരത്തില്‍ ഇന്ത്യ പാക്കിസ്ഥാനെതിരെ വമ്പന്‍ വിജയം സ്വന്തമാക്കിയിരുന്നു. വെള്ളിയാഴ്ച ബംഗ്ലദേശിനെതിരെയാണ് അടുത്ത മത്സരം നടക്കുക.

മറുപടി ബാറ്റിങ്ങില്‍ തുടക്കത്തില്‍ തന്നെ ശ്രീലങ്കയ്ക്കു മുന്‍നിരയെ നഷ്ടമായി. പതും നിസംഗ (ഏഴു പന്തില്‍ ആറ്), ദിമുത് കരുണരന്തെ (18 പന്തില്‍ രണ്ട്), കുശാല്‍ മെന്‍ഡിസ് (16 പന്തില്‍ 15) എന്നിവരുടെ പുറത്താകല്‍ ലങ്കയെ പ്രതിരോധത്തിലാക്കി.

സധീര സമരവിക്രമയും ചരിത് അസലങ്കയും ചേര്‍ന്നു രക്ഷാപ്രവര്‍ത്തനത്തിനു ശ്രമിച്ചെങ്കിലും ഈ കൂട്ടുകെട്ടും അധികനേരം നീണ്ടില്ല. സ്‌കോര്‍ 68 ല്‍ നില്‍ക്കെ സമരവിക്രമയെ വിക്കറ്റ് കീപ്പര്‍ കെ.എല്‍. രാഹുല്‍ സ്റ്റംപ് ചെയ്തു പുറത്താക്കി. 31 പന്തില്‍ 17 റണ്‍സെടുത്ത സമരവിക്രമയുടെ വിക്കറ്റ് കുല്‍ദീപ് യാദവിനായിരുന്നു. തൊട്ടുപിന്നാലെ അസലങ്കയെയും (35 പന്തില്‍ 22) കുല്‍ദീപ് യാദവ് മടക്കി. 13 പന്തില്‍ ഒന്‍പതു റണ്‍സെടുത്ത ലങ്കന്‍ ക്യാപ്റ്റന്‍ ദസുന്‍ ശനാകയെ രവീന്ദ്ര ജഡേജ രോഹിത് ശര്‍മയുടെ കൈകളിലെത്തിച്ചു. 25.2 ഓവറുകളിലാണ് (152 പന്തുകള്‍) ശ്രീലങ്ക 100 കടന്നത്. എന്നാല്‍ ധനഞ്ജയ ഡിസില്‍വയും ദുനിത് വെല്ലാലഗെയും ചേര്‍ന്നതോടെ ലങ്കന്‍ സ്‌കോര്‍ 150 പിന്നിട്ടു മുന്നേറി. ഏഴാം വിക്കറ്റില്‍ 63 റണ്‍സാണ് ഇവര്‍ കൂട്ടിച്ചേര്‍ത്തത്.

ഈ കൂട്ടുകെട്ട് പൊളിക്കുകയെന്ന വെല്ലുവിളി നടപ്പാക്കിയത് രവീന്ദ്ര ജഡേജ. 66 പന്തില്‍ 41 റണ്‍സെടുത്ത ധനഞ്ജയയെ ജഡേജയുടെ പന്തില്‍ ശുഭ്മന്‍ ഗില്‍ ക്യാച്ചെടുത്തു പുറത്താക്കി. വാലറ്റത്തിനു തിളങ്ങാന്‍ സാധിക്കാതിരുന്നതോടെ ലങ്ക 172നു പുറത്തായി.