ഏകദിന ലോകകപ്പില്‍ തുടര്‍ച്ചയായ രണ്ടാം മത്സരത്തിലും ഇന്ത്യയ്ക്ക് തകര്‍പ്പന്‍ ജയം. നായകന്‍ രോഹിത് ശര്‍മ്മ ഒരുപിടി റെക്കോര്‍ഡുകളോടെ മുന്നില്‍ നിന്ന് നയിച്ച മത്സരത്തില്‍ എട്ട് വിക്കറ്റുകള്‍ക്കാണ് ഇന്ത്യ അഫ്ഗാനിസ്ഥാനെ തകര്‍ത്തത്. രോഹിത് ശര്‍മ്മ സെഞ്ചുറി നേടിയപ്പോള്‍ രണ്ടാം മത്സരത്തിലും അര്‍ധ സെഞ്ചുറിയുമായി കിംഗ് കോഹ്ലി കളം നിറഞ്ഞു.

ആദ്യം ബാറ്റ് ചെയ്ത അഫ്ഗാന്‍ ഇന്ത്യയെ ഞെട്ടിച്ചുകൊണ്ട് മികച്ച സ്‌കോര്‍ പടുത്തുയര്‍ത്തി തങ്ങളുടെ പോരാട്ടവീര്യം കാണിച്ചുതന്നു. ഹഷ്മത്തുള്ള ഷാഹിദിയും (80), ഒമര്‍സായും (62) ചേര്‍ന്നാണ് അഫ്ഗാന്‍ ഇന്നിംഗ്സിന് കരുത്തുപകര്‍ന്നത്. ഇന്ത്യയുടെ സ്റ്റാര്‍ പേസര്‍ ജസ്പ്രീത് ബുമ്ര നാല് വിക്കറ്റുകളുമായി മികച്ച പ്രകടനം പുറത്തെടുത്തത് വരും മത്സരങ്ങളിലും ഇന്ത്യയ്ക്ക് പ്രതീക്ഷയാകും.

അഫ്ഗാന്‍ ഉയര്‍ത്തിയ 273 റണ്‍സ് വിജയലക്ഷ്യം പതിനഞ്ച് ഓവറുകള്‍ ബാക്കി നില്‍ക്കെയാണ് ഇന്ത്യ മറികടന്നത്. രോഹിത് ശര്‍മ്മയും ഗില്ലിന്റെ അഭാവത്തില്‍ യുവതാരം ഇഷാന്‍ കിഷനും ഓപ്പണ്‍ ചെയ്ത മത്സരത്തില്‍ ഇന്ത്യയുടെ തുടക്കം മികച്ചതായിരുന്നു. തുടക്കം തന്നെ അക്രമണകാരിയായ രോഹിത് തന്റെ നിലപാടറിയിച്ചു. വെറും 84 പന്തുകളില്‍ നിന്ന് അഞ്ച് സിക്സറും 16 ഫോറിന്റെയും അകമ്പടിയോടെ 131 റണ്‍സുമായി ഹിറ്റ്മാന്‍ മടങ്ങുമ്പോള്‍ ഇന്ത്യ ജയം ഉറപ്പിച്ചിരുന്നു.

1983 ലോകകപ്പില്‍ സിംബാബ്വെയ്ക്ക് എതിരെ കപില്‍ 72 പന്തില്‍ സെഞ്ചുറി നേടിയതായിരുന്നു ഇതുവരെ റെക്കോര്‍ഡ്. ഇതാണ് രോഹിത് ശര്‍മ്മ മറികടന്നത്. ഇന്നത്തെ ജയത്തോടെ പോയിന്റ് പട്ടികയില്‍ രണ്ടാമതെത്താനും ഇന്ത്യയ്ക്കായി. ചിരവൈരികളായ പാകിസ്ഥാന് എതിരെ ഒക്ടോബര്‍ 14നാണ് ഇന്ത്യയുടെ അടുത്ത മത്സരം.

ഡല്‍ഹിയിലെ അരുണ്‍ ജെയ്റ്റ്ലി സ്റ്റേഡിയത്തില്‍ നടന്ന മത്സരത്തില്‍ നിരവധി റെക്കോര്‍ഡുകളാണ് രോഹിത് ശര്‍മ്മ കടപുഴക്കിയത്. ലോകകപ്പില്‍ ഏറ്റവുമധികം സെഞ്ചുറിയെന്ന സച്ചിന്റെ റെക്കോര്‍ഡ് താരം മറികടന്നു. ഇതിന് പുറമെ ലോകകപ്പിലെ ഒരു ഇന്ത്യന്‍ താരത്തിന്റെ വേഗമേറിയ സെഞ്ചുറിയെന്ന കപില്‍ ദേവിന്റെ നാല്‍പ്പത് വര്‍ഷം പഴക്കമുള്ള റെക്കോര്‍ഡും രോഹിതിന് മുന്നില്‍ വീണു.