ഏകദിന ലോകകപ്പില്‍ പാക്കിസ്ഥാനെ 7 വിക്കറ്റിനു തകര്‍ത്ത് ഇന്ത്യ. നായകന്‍ മുന്നില്‍നിന്നു നയിച്ചപ്പോള്‍ പാക്കിസ്ഥാന്‍ ഉയര്‍ത്തിയ 192 റണ്‍സ് വിജയലക്ഷ്യം ഇന്ത്യ 30.3 ഓവറില്‍ 3 വിക്കറ്റു നഷ്ടത്തില്‍ മറികടന്നു. പാക്കിസ്ഥാന്റെ ബാറ്റിങ് സമയത്ത് ഇന്ത്യന്‍ ബോളര്‍മാര്‍ തകര്‍പ്പന്‍ പ്രകടനമാണ് കാഴ്ചവച്ചത്. ഒരുഘട്ടത്തില്‍ 2ന് 155 എന്ന നിലയിലായിരുന്ന പാക്കിസ്ഥാന്‍ 42.5 ഓവറില്‍ 191ന് പുറത്തായി. 36 റണ്‍സ് കൂട്ടിച്ചേര്‍ക്കുന്നതിനിടെ പാക്കിസ്ഥാന് 8 വിക്കറ്റ് നഷ്ടമായി. അര്‍ധ സെഞ്ചറി നേടിയ ക്യാപ്റ്റന്‍ ബാബര്‍ അസമാണ് (50) അവരുടെ ടോപ് സ്‌കോറര്‍. ഇന്ത്യയ്ക്കു വേണ്ടി ജസ്പ്രീത് ബുമ്ര, മുഹമ്മദ് സിറാജ്, ഹാര്‍ദിക് പാണ്ഡ്യ, കുല്‍ദീപ് യാദവ്, രവിന്ദ്ര ജഡേജ എന്നിവര്‍ രണ്ടു വിക്കറ്റു വീതം വീഴ്ത്തി.

മറുപടി ബാറ്റിങ്ങിനിറങ്ങിയ ഇന്ത്യ തുടക്കം മുതല്‍ തകര്‍ത്തടിച്ചാണ് ഇന്നിങ്‌സ് പടുത്തുയര്‍ത്തിയത്. ഷഹീന്‍ അഫ്രീദി എറിഞ്ഞ ആദ്യ ഓവറില്‍ 10 റണ്‍സ് നേടിയാണ് ഇന്ത്യ തുടങ്ങിയത്. ഹസന്‍ അലിയുടെ രണ്ടാം ഓവറില്‍ മൂന്ന് ഫോറാണ് ഗില്‍ നേടിയത്. മൂന്നാം ഓവറില്‍ 16 റണ്‍സുമായി ഗില്‍ മടങ്ങിയെങ്കിലും പിന്നാലെയെത്തിയ വിരാട് കോലി രോഹിത്തിന് മികച്ച പിന്തുണ നല്‍കി. ഇരുവരും ചേര്‍ന്ന് 7-ാം ഓവറില്‍ ടീം സ്‌കോര്‍ 50 കടത്തി. രണ്ടാം വിക്കറ്റില്‍ 56 റണ്‍സാണ് ഇരുവരും കൂട്ടിച്ചേര്‍ത്തത്.

ഇതിനിടെ ഏകദിനത്തില്‍ 300 സിക്‌സര്‍ നേടുന്ന ആദ്യ ഇന്ത്യന്‍ താരമെന്ന നേട്ടം രോഹിത് സ്വന്തം പേരില്‍ കുറിച്ചു. ഷഹീദ് അഫ്രീദി, ക്രിസ് ഗെയില്‍ എന്നിവര്‍ക്കു ശേഷം ഈ നേട്ടം കൈവരിക്കുന്ന താരമാണ് രോഹിത്. സ്‌കോര്‍ 79ല്‍ നില്‍ക്കേ വിരാട് കോലി പുറത്തായി. ഹസന്‍ അലിയുടെ പന്തില്‍ മുഹമ്മദ് നവാസ് പിടിച്ച് പുറത്താക്കുകയായിരുന്നു, 18 പന്തില്‍ 16 റണ്‍സാണ് കോലിയുടെ സംഭാവന.

നാലാമനായി ക്രീസിലെത്തിയ ശ്രേയസ് അയ്യരെ കൂട്ടുപിടിച്ച് രോഹിത് 14-ാം ഓവറില്‍ ടീം സ്‌കോര്‍ 100 കടത്തി. 22-ാം ഓവറില്‍ സ്‌കോര്‍ 156ല്‍ നില്‍ക്കേ രോഹിത് പുറത്തായി. 63 പന്തില്‍ 6 ഫോറും 6 സിക്‌സും ഉള്‍പ്പെടെ 86 റണ്‍സാണ് താരം നേടിയത്. 36 പന്തില്‍നിന്നാണ് രോഹിത് അര്‍ധ സെഞ്ചറി പൂര്‍ത്തിയാക്കിയത്. ഷഹീന്‍ അഫ്രിദിയുടെ പന്തില്‍ ഇഫ്തിഖര്‍ അഹമ്മദിന് ക്യാച്ച് നല്‍കിയാണ് രോഹിത് മടങ്ങിയത്.