വിജയത്തിലേക്ക് ബാറ്റേന്തിയ ഓസീസ് തുടക്കത്തില്‍ പതറി.....ശ്രീലങ്കക്കെതിരെ അഞ്ച് വിക്കറ്റ് വിജയം സ്വന്തമാക്കി ഓസ്ട്രേലിയ.
ഒടുവില്‍ ഓസ്ട്രേലിയ ഈ ലോകകപ്പിലെ ആദ്യ വിജയം സ്വന്തമാക്കി. ശ്രീലങ്ക തുടര്‍ച്ചയായ മൂന്നാം തോല്‍വിയിലേക്കും കൂപ്പുകുത്തി.

ആദ്യം ബാറ്റ് ചെയ്ത അവര്‍ 43.3 ഓവറില്‍ 209 റണ്‍സില്‍ ഓള്‍ ഔട്ടായി. ഓസ്ട്രേലിയ 35.2 ഓവറില്‍ അഞ്ച് വിക്കറ്റ് മാത്രം നഷ്ടത്തില്‍ 215 റണ്‍സ് കണ്ടെത്തിയാണ് വിജയ വഴിയിലേക്ക് എത്തിയത്. 24 റണ്‍സിനിടെ അവര്‍ക്ക് രണ്ട് വിക്കറ്റുകള്‍ നഷ്ടമായി.

എന്നാല്‍ മിച്ചല്‍ മാര്‍ഷ്, ജോഷ് ഇംഗ്ലിസ് എന്നിവരുടെ അര്‍ധ സെഞ്ച്വറികളും മര്‍നസ് ലബുഷെയ്നിന്റെ ചെറുത്തു നില്‍പ്പും ഗ്ലെന്‍ മാക്സ്വെല്‍, മാര്‍ക്കസ് സ്റ്റോയിനിസ് എന്നിവരുടെ വെടിക്കെട്ടും ഓസീസ് ജയം അനായാസമാക്കി. 21 പന്തില്‍ നാല് ഫോറും രണ്ട് സിക്സും സഹിതം 31 റണ്‍സെടുത്ത് മാക്സ്വെലും സ്റ്റോയിനിസ് പത്ത് പന്തില്‍ രണ്ട് ഫോറും ഒരു സിക്സും സഹിതം സ്റ്റോയിനിസ് 20 റണ്‍സും എടുത്തു. 209ല്‍ നില്‍ക്കെ സ്റ്റോയിനിസ് സിക്സടിച്ച് ഓസ്ട്രേലിയ വിജയം തൊട്ടു.

മിച്ചല്‍ മാര്‍ഷ് ഒന്‍പത് ഫോറുകള്‍ സഹിതം 51 പന്തില്‍ 52 റണ്‍സെടുത്തു. ഇംഗ്ലിസ് 59 പന്തില്‍ അഞ്ച് ഫോറും ഒരു സിക്സും സഹിതം 58 റണ്‍സെടുത്ത് ടോപ് സ്‌കോററായി. വാര്‍ണര്‍ 11 റണ്‍സില്‍ പുറത്തായപ്പോള്‍ സ്റ്റീവ് സ്മിത്ത് സംപൂജ്യനായും മടങ്ങി.

ടോസ് നേടി ശ്രീലങ്ക ബാറ്റിങ് തിരഞ്ഞെടുക്കുകയായിരുന്നു. വിക്കറ്റ് നഷ്ടമില്ലാതെ 125 റണ്‍സെന്ന ശക്തമായ നിലയിലായിരുന്നു ശ്രീലങ്ക. എന്നാല്‍ പിന്നീട് അവിശ്വസനീയമാം വിധം തകര്‍ന്നു. 84 റണ്‍സ് ചേര്‍ക്കുന്നതിനിടെയാണ് അവരുടെ പത്ത് വിക്കറ്റുകളും നിലംപൊത്തിയത്. ഇടയ്ക്ക് മഴ പെയ്തു കളി നിര്‍ത്തി. അപ്പോള്‍ നാല് വിക്കറ്റുകളായിരുന്നു അവര്‍ക്ക് നഷ്ടമായത്. പിന്നീട് മഴ മാറി കളി വീണ്ടും തുടങ്ങി. പിന്നാലെ ക്ഷണത്തില്‍ തന്നെ അവരുടെ ഇന്നിങ്‌സിനും തിരശ്ശീല വീണു.