ലോകകപ്പില്‍ തുടര്‍ച്ചയായ ആറാം ജയം സ്വന്തമാക്കി ഇന്ത്യ സെമി സാദ്ധ്യതകള്‍ സജീവമാക്കി. ഇന്ന് നടന്ന മത്സരത്തില്‍ 230 റണ്‍സ് വിജയലക്ഷ്യവുമായി ബാറ്റിംഗിനിറങ്ങിയ ഇംഗ്‌ളണ്ട് 34. 5 ഓവറില്‍ എല്ലാവരും പുറത്തായി. നാല് വിക്കറ്റ് വീഴ്ത്തിയ മുഹമ്മഗ് ഷമിയും രണ്ട് വിക്കറ്റ് വീഴ്ത്തിയ ബുമ്രയും കുല്‍ദീപ് യാദവും ഒരു വിക്കറ്റ് വീഴ്ത്തിയ ജഡേജയുമാണ് ഇംഗ്ലണ്ടിനെ പിടിച്ചുകെട്ടിയത്.

ടോസ് നഷ്ടപ്പെട്ട് ബാറ്റിംഗിനിറങ്ങിയ ഇന്ത്യ ഒന്‍പത് വിക്കറ്റ് നഷ്ടത്തിലാണ് 229 റണ്‍സെടുത്തത്. രോഹിത് ശര്‍മ്മ(87), സൂര്യകുമാര്‍ യാദവ്(49), കെ.എല്‍ രാഹുല്‍ (39) എന്നിവരുടെ പോരാട്ടമാണ് ഇന്ത്യയെ ഈ സ്‌കോറിലെത്തിച്ചത്. ടോസ് നേടിയ ഇംഗ്‌ളണ്ട് നായകന്‍ ജോസ് ബട്ട്ലര്‍ ഇന്ത്യയെ ബാറ്റിംഗിനയക്കുകയായിരുന്നു.

ക്രീസിലൊരുമിച്ച രോഹിതും കെ.എല്‍ രാഹുലും ചേര്‍ന്ന് ഇന്ത്യയെ മികച്ച സ്‌കോറിലേക്ക് നയിച്ചത്. 25 ഓവര്‍ പൂര്‍ത്തിയായതും ഇന്ത്യ 100 റണ്‍സിലെത്തിയതും ഒരുമിച്ചായിരുന്നു.ഇതിന് ശേഷം ഇന്ത്യയുടെ റണ്‍റേറ്റ് പതിയെ ഉയരാന്‍ തുടങ്ങി.
31-ാം ഓവറില്‍ കെ.എല്‍ രാഹുല്‍ പുറത്തായത് പക്ഷേ ഇന്ത്യയ്ക്ക് ആഘാതമായി. 58 പന്തുകളില്‍ മൂന്ന് ബൗണ്ടറികള്‍ പായിച്ച സൂര്യകുമാറിനെ ബൗളിംഗ് ചേഞ്ചിനെത്തിയ വില്ലി ക്രിസ് വോക്‌സിന്റെ കയ്യിലെത്തിക്കുകയായിരുന്നു.131 റണ്‍സാണ് രാഹുല്‍ മടങ്ങുമ്പോള്‍ ഇന്ത്യയുടെ സ്‌കോര്‍ ബോര്‍ഡില്‍ ഉണ്ടായിരുന്നത്. 91 റണ്‍സാണ് രാഹുലും രോഹിതും കൂട്ടിച്ചേര്‍ത്തത്.
രാഹുലിന് പകരമിറങ്ങിയ സൂര്യകുമാര്‍ യാദവും രോഹിതും ചേര്‍ന്ന് ടീമിനെ മികച്ച സ്‌കോറിലെത്തിക്കുമെന്ന് കരുതിയെങ്കിലും സെഞ്ച്വറിയിലേക്ക് കുതിച്ച രോഹിതിന് 37-ാം ഓവറില്‍ മടങ്ങേണ്ടിവന്നത് തിരിച്ചടിയായി. 101 പന്തുകളില്‍ പത്തുഫോറും ഒരു സിക്‌സുമടക്കം 87 റണ്‍സടിച്ച ഇന്ത്യന്‍ നായകന്‍ ആദില്‍ റഷീദിന്റെ ബൗളിംഗില്‍ ലിയാം ലിവിംഗ്സ്റ്റണിന് ക്യാച്ച് നല്‍കി മടങ്ങിയതോടെ ഇന്ത്യ 164/5 എന്ന നിലയിലായി.
ഒരറ്റത്ത് സൂര്യകുമാര്‍ ആഞ്ഞടിക്കാന്‍ ശ്രമിച്ചെങ്കിലും രോഹിതിന്റെ പുറത്താകലോടെ മറ്റേ അറ്റം തകര്‍ന്നത് ഇന്ത്യയ്ക്ക് തിരിച്ചടിയായി. 182ല്‍ വച്ച് ജഡേജയും 183ല്‍ ഷമിയും മടങ്ങിയെങ്കിലും സൂര്യ 47 പന്തുകളില്‍ നാലുഫോറും ഒരു സിക്‌സുമടക്കം 49 റണ്‍സുമായി 208ലെത്തിച്ചാണ് പുറത്തായത്. തുടര്‍ന്ന് ബുംറയും (16)കുല്‍ദീപും (9) ചേര്‍ന്നാണ് 229ലെത്തിച്ചത്.