ലോകകപ്പില്‍ ന്യൂസിലാന്‍ഡിന് എതിരായ മത്സരത്തില്‍ ദക്ഷിണാഫ്രിക്കയ്ക്ക് വമ്പന്‍ വിജയം. പൂനെയില്‍ ടോസ് നഷ്ടപ്പെട്ട് ആദ്യ ബാറ്റിംഗിനിറങ്ങിയ ദക്ഷിണാഫ്രിക്ക നാലുവിക്കറ്റ് നഷ്ടത്തില്‍ 357 റണ്‍സാണ് നേടിയത്. മറുപടിക്കിറങ്ങിയ ദക്ഷിണാഫ്രിക്ക 35.3 ഓവറില്‍ 167 റണ്‍സിന് ആള്‍ഔട്ടാവുകയായിരുന്നു. നാലുവിക്കറ്റ് വീഴ്ത്തിയ കേശവ് മഹാരാജും മൂന്ന് വിക്കറ്റ് വീഴ്ത്തിയ മാര്‍ക്കോ യാന്‍സനും രണ്ട് വിക്കറ്റ് വീഴ്ത്തിയ ജെറാള്‍ഡ് കോട്‌സെയും ചേര്‍ന്നാണ് കിവീസിന്റെ ചിറകരിഞ്ഞത്.

ഇതോടെ ഏഴുകളികളില്‍ നിന്ന് 12 പോയിന്റുമായി ദക്ഷിണാഫ്രിക്ക പോയിന്റ് പട്ടികയില്‍ ഇന്ത്യയെ മറികടന്ന് ഒന്നാമതെത്തി. ഏഴുകളികളില്‍ മൂന്നാം തോല്‍വി വഴങ്ങിയ ന്യൂസിലാന്‍ഡ് എട്ടു പോയിന്റുമായി നാലാം സ്ഥാനത്താണ്. പാകിസ്ഥാനുമായാണ് കിവീസിന്റെ അടുത്ത മത്സരം. കിവീസിന്റെ ഇന്നലത്തെ തോല്‍വി പാകിസ്ഥാന്റെ സെമി പ്രതീക്ഷയ്ക്കും തെളിച്ചം പകര്‍ന്നിട്ടുണ്ട്. നായകന്‍ ടെംപ ബൗമയെ(24) ടീം സ്‌കോര്‍ 38ല്‍ വച്ച് നഷ്ടമായശേഷം ഡി കോക്കും റാസിയും ചേര്‍ന്ന് രണ്ടാം വിക്കറ്റില്‍ കൂട്ടിച്ചേര്‍ത്ത 200 റണ്‍സാണ് ദക്ഷിണാഫ്രിക്കന്‍ ഇന്നിംഗ്‌സിന് അടിത്തറയിട്ടത്.

27 പന്തുകളില്‍ നാലുഫോറും ഒരു സിക്‌സുമടിച്ച ബൗമയെ ഒന്‍പതാം ഓവറില്‍ ബൗള്‍ട്ടിന്റെ ബൗളിംഗില്‍ മിച്ചലാണ് പിടികൂടിയത്. തുടര്‍ന്ന് ക്രീസിലൊരുമിച്ച ഡി കോക്കും റാസിയും ചേര്‍ന്ന് കിവീസ് ബൗളര്‍മാരെ പ്രഹരിച്ച് മുന്നോട്ടുനീങ്ങി. 12-ാം ഓവറില്‍ 50 കടന്ന ടീം 21-ാം ഓവറിലാണ് 100 തികച്ചത്. ഇതിന് പിന്നാലെ ഡി കോക്ക് അര്‍ദ്ധ സെഞ്ച്വറിയും തികച്ചു. 36-ാം ഓവറില്‍ ടീം 200ലെത്തി. ക്വിന്റണ്‍ തന്റെ കരിയറിലെ 21-ാം ഏകദിന സെഞ്ച്വറി തികയ്ക്കുകയും ചെയ്തു.103 പന്തുകളാണ് ഡികോക്കിന് ഇതിനായി വേണ്ടിവന്നത്.

116 പന്തുകളില്‍ 10 ഫോറുകളും മൂന്ന് സിക്‌സുമടക്കം 114 റണ്‍സടിച്ച ഡി കോക്കിനെ 40-ാം ഓവറിലാണ് കിവീസിന് പുറത്താക്കാന്‍ കഴിഞ്ഞത്. സൗത്തിയുടെ പന്തില്‍ ബാക്ക്വേഡ് പോയിന്റില്‍ ഫിലിപ്പ്‌സാണ് ഡി കോക്കിനെ പിടികൂടിയത്. തുടര്‍ന്ന് ക്രീസിലെത്തിയ ഡേവിഡ് മില്ലറെ കൂട്ടുനിറുത്തി റാസി തന്റെ ഈ ലോകകപ്പിലെ രണ്ടാം സെഞ്ച്വറിയിലേക്ക് കുതിച്ചു. നേരിട്ട 101-ാമത്തെ പന്തിലാണ് റാസി മൂന്നക്കം കടന്നത്. തുടക്കത്തില്‍ പ്രതിരോധിച്ച് കളിച്ച മില്ലറും കത്തിപ്പടരാന്‍ തുടങ്ങിയതോടെ അവസാന ഓവറുകളില്‍ സ്‌കോര്‍ ഉയരാന്‍ തുടങ്ങി.118 പന്തുകളില്‍ ഒന്‍പത് ഫോറുകളും അഞ്ചുസിക്‌സുകളും പായിച്ച റാസി 48-ാം ഓവറില്‍ പുറത്താകുമ്പോള്‍ ടീം 316ലെത്തിയിരുന്നു. 30 പന്തുകള്‍ നേരിട്ട് രണ്ടു ഫോറും നാലു സിക്‌സും പായിച്ച മില്ലര്‍ 53 റണ്‍സുമായി 49.5-ാം ഓവറിലാണ് പുറത്തായത്.