ടോസ് നേടി ആദ്യം ബാറ്റിംഗിനിറങ്ങിയ ഇന്ത്യ ശുഭ്മാന്‍ ഗില്‍, വിരാട് കൊഹ്ലി, ശ്രേയസ് അയ്യര്‍ എന്നിവരുടെ ബാറ്റിംഗ് മികവില്‍ നിശ്ചിത ഓവറില്‍ എട്ട് വിക്കറ്റ് നഷ്ടത്തില്‍ 357 റണ്‍സെടുത്തു. അവസാന ഓവറുകളില്‍ തകര്‍ത്തടിച്ച രവീന്ദ്ര ജഡേജയുടെ ഇന്നിംഗ്‌സും നിര്‍ണായകമായി. ജഡേജ 24 പന്തില്‍ 35 റണ്‍സെടുത്തു. 92 റണ്‍സെടുത്ത ശുഭ്മാന്‍ ഗില്‍ ആണ് ഇന്ത്യയുടെ ടോപ് സ്‌കോറര്‍. കൊഹ്ലി 88 റണ്‍സും ശ്രേയസ് അയ്യര്‍ 82 റണ്‍സുമെടുത്തു ആദ്യ ഓവറില്‍ത്തന്നെ രോഹിത് ശര്‍മ്മയെ(4) നഷ്ടമായതിന്റെ നടുക്കം ഒട്ടുമറിയാതെയാണ് ഇന്ത്യ 357ലേക്കെത്തിയത്. വാലറ്റത്ത് ജഡേജയുടെ സംഭാവനകളും ഇന്ത്യയുടെ സ്‌കോര്‍ ഉയര്‍ത്താന്‍ സഹായകമായി. പത്തോവറില്‍ 80 റണ്‍സ് വഴങ്ങിയെങ്കിലും ലങ്കന്‍ പേസര്‍ ദില്‍ഷന്‍ മധുഷങ്കയ്ക്ക് ഇന്ത്യയുടെ അഞ്ചുവിക്കറ്റുകള്‍ വീഴ്ത്താനായി.

മറുപടിക്കിറങ്ങിയ ലങ്കയെ ഇന്ത്യന്‍ പേസര്‍മാരായ ജസ്പ്രീത് ബുംറയും മുഹമ്മദ് സിറാജും ചേര്‍ന്ന് മാരകമായാണ് പ്രഹരിച്ചത്. ആദ്യപന്തില്‍ത്തന്നെ ബുംറ പാത്തും നിസംഗയെ (0) എല്‍.ബിയില്‍ കുരുക്കി. ലങ്ക അപ്പീല്‍ നല്‍കിയെങ്കിലും ക്ഷയുണ്ടായില്ല. രണ്ടാം ഓവറിന്റെ ആദ്യ പന്തില്‍ സിറാജ് ദിമുത്ത് കരുണരത്‌നയെ (0) എല്‍.ബിയില്‍ കുരുക്കിയപ്പോഴും ലങ്ക അപ്പീല്‍ ചെയ്തു. പക്ഷേ വിക്കറ്റ് വിധിച്ചു. അടുത്തപന്തില്‍ സദീര സമരവിക്രമയെ(0) അമ്പയര്‍ കീപ്പര്‍ ക്യാച്ച് വിധിച്ചെങ്കിലും ഡി.ആര്‍.എസിലൂടെ ലങ്ക അത് മാറ്റി. പക്ഷേ അഞ്ചാം പന്തില്‍ സദീരയെ സെക്കന്‍ഡ് സ്‌ളിപ്പില്‍ ശ്രേയസ് പിടികൂടുകതന്നെ ചെയ്തു. നാലാം ഓവറിന്റെ ആദ്യ പന്തില്‍ സിറാജ് ലങ്കന്‍ നായകന്‍ കുശാല്‍ മെന്‍ഡിസിന്റെ കുറ്റി പിഴുതെറിയുകകൂടി ചെയ്തതോടെ ലങ്ക നാലുവിക്കറ്റിന് മൂന്ന് റണ്‍സ് എന്ന നിലയിലായി.

ഫസ്റ്റ് ബൗളിംഗ് ചേഞ്ചിനെത്തിയ മുഹമ്മദ് ഷമിയും ആക്രമണം കടുപ്പിച്ചതോടെ ലങ്ക തരിപ്പണമായി. പത്താം ഓവറിലെ അടുത്തടുത്ത രണ്ട് പന്തുകളില്‍ ചരിത് അസലങ്കയേയും (1) ദുഷാന്‍ ഹേമന്തയേയും കൂടാരം കയറ്റുകയായിരുന്നു ഷമി. അസലങ്ക ജഡേജയ്ക്കും ഹേമന്ത രാഹുലിനുമാണ് ക്യാച്ച് നല്‍കിയത്. 11.3-ാം ഓവറില്‍ ഷമി ചമീരയേയും രാഹുലിന്റെ കയ്യിലെത്തിച്ചു. 14-ാം ഓവറിന്റെ ആദ്യപന്തില്‍ ഏന്‍ജലോ മാത്യൂസ് ഷമിയുടെ പന്തില്‍ ബൗള്‍ഡായതോടെ ലങ്ക 35/8 എന്ന നിലയിലായി.

ആദ്യ ഓവറിലെ രണ്ടാം പന്തില്‍ത്തന്നെ നായകന്‍ രോഹിത് ശര്‍മ്മയെ നഷ്ടമായതിന്റെ ആഘാതത്തിലാണ് ഇന്ത്യ തുടങ്ങിയത്. ആദ്യ പന്തില്‍ ബൗണ്ടറിയടിച്ച രോഹിതിന്റെ കുറ്റി രണ്ടാം പന്തില്‍ മധുഷങ്ക തെറിപ്പിക്കുകയായിരുന്നു. എന്നാല്‍ തുടര്‍ന്ന് ക്രീസിലൊരുമിച്ച വിരാടും ശുഭ്മാനും കൂട്ടിച്ചേര്‍ത്ത 189 റണ്‍സ് ഇന്ത്യന്‍ ഇന്നിംഗ്‌സിന് അടിത്തറ പാകി. ആദ്യ ഓവറില്‍ ക്രീസില്‍ ഒരുമിച്ച ഇരുവരും ലങ്കന്‍ ബൗളര്‍മാര്‍ക്ക് അവസരം നല്‍കാതെ മികച്ച രീതിയില്‍ മുന്നോട്ടുനീങ്ങി. 16 ഓവര്‍ പൂര്‍ത്തിയായപ്പോഴേക്കും ഇന്ത്യ 100 റണ്‍സ് തികച്ചു. പിന്നാലെ വിരാട് അര്‍ദ്ധസെഞ്ച്വറിയും തികച്ചു. അധികം വൈകാതെ ഗില്ലും അര്‍ദ്ധശതകം പിന്നിട്ടു.