ടെസ്റ്റ് ക്രിക്കറ്റിന്റെ ആവേശപ്പോരാട്ടത്തില്‍ നിലവിലെ ചാംപ്യന്‍മാരായ ഓസ്‌ട്രേലിയയെ തകര്‍ത്ത് ദക്ഷിണാഫ്രിക്കയ്ക്ക് കന്നി ലോക ടെസ്റ്റ് ചാംപ്യന്‍ഷിപ്പ് കിരീടം. പേസ് ബോളര്‍മാരുടെ സര്‍വാധിപത്യം കണ്ട മത്സരത്തില്‍ അഞ്ച് വിക്കറ്റിനാണ് ദക്ഷിണാഫ്രിക്ക ഓസീസിനെ വീഴ്ത്തിയത്. ഓസ്‌ട്രേലിയ ഉയര്‍ത്തിയ 282 റണ്‍സ് വിജയലക്ഷ്യം അഞ്ച് വിക്കറ്റ് നഷ്ടത്തില്‍ മറികടന്നാണ് ദക്ഷിണാഫ്രിക്ക കിരീടത്തില്‍ മുത്തമിട്ടത്. സ്‌കോര്‍: ഓസ്‌ട്രേലിയ– 212, 207. ദക്ഷിണാഫ്രിക്ക–138, അഞ്ചിന് 282.

പേസ് ബോളര്‍മാരുടെ തകര്‍പ്പന്‍ പ്രകടനത്തിനൊപ്പം, ഉജ്വല സെഞ്ചറിയുമായി കരുത്തുകാട്ടിയ ഓപ്പണര്‍ എയ്ഡന്‍ മാര്‍ക്രം, ഉറച്ച പിന്തുണ നല്‍കിയ ക്യാപ്റ്റന്‍ ടെംബ ബാവുമ എന്നിവരുടെ ഇന്നിങ്‌സുകളാണ് ദക്ഷിണാഫ്രിക്കന്‍ വിജയത്തിന്റെ ആണിക്കല്ല്. മാര്‍ക്രം 207 പന്തില്‍ 14 ഫോറുകള്‍ സഹിതം 136 റണ്‍സെടുത്തു മടങ്ങി. ക്യാപ്റ്റന്‍ ടെംബ ബാവുമ 134 പന്തില്‍ അഞ്ച് ഫോറുകള്‍ സഹിതം 66 റണ്‍സെടുത്തു പുറത്തായി. ഡേവിഡ് ബേഡിങ്ങാമും (49 പന്തില്‍ 21), കൈല്‍ വെരെയ്‌നെയും (13 പന്തില്‍ നാല്) പുറത്താകാതെനിന്നു.56 ഓവറില്‍ രണ്ടു വിക്കറ്റ് നഷ്ടത്തില്‍ 213 റണ്‍സുമായി മത്സരത്തിന്റെ നാലാം ദിനമായ ഇന്ന് ബാറ്റിങ് പുനരാരംഭിച്ച ദക്ഷിണാഫ്രിക്ക, ആദ്യ സെഷനില്‍ത്തന്നെ വിജയത്തിലെത്തി. നാലാം ദിവസം ബാറ്റിങ് തുടങ്ങിയതിനു പിന്നാലെ ദക്ഷിണാഫ്രിക്കയ്ക്ക് ക്യാപ്റ്റന്‍ ടെംബ ബാവുമയെ നഷ്ടമായി. പാറ്റ് കമിന്‍സ് എറിഞ്ഞ 59–ാം ഓവറിലെ അവസാന പന്തില്‍ അലക്‌സ് ക്യാരി ക്യാച്ചെടുത്തു ബാവുമയെ പുറത്താക്കുകയായിരുന്നു. എട്ടു റണ്‍സെടുത്ത ട്രിസ്റ്റന്‍ സ്റ്റബ്‌സിനെ മിച്ചല്‍ സ്റ്റാര്‍ക്ക് ബോള്‍ഡാക്കി. പിന്നാലെയെത്തിയ ഡേവിഡ് ബേഡിങ്ങാം മാര്‍ക്രത്തിന് പിന്തുണയുമായി നിലയുറപ്പിച്ചതോടെ ദക്ഷിണാഫ്രിക്ക വിജയത്തിലേക്കു സാവധാനം മുന്നേറി. ജയിക്കാന്‍ ആറു റണ്‍സ് കൂടി മതിയെന്ന ഘട്ടത്തിലെത്തിച്ച ശേഷമാണ് ജോഷ് ഹെയ്‌സല്‍വുഡിന്റെ പന്തില്‍ മാര്‍ക്രം പുറത്തായത്. ഒടുക്കം ബേഡിങ്ങാമും വെരെയ്‌നെയും ചേര്‍ന്ന് 83.4 ഓവറില്‍ ദക്ഷിണാഫ്രിക്കയുടെ വിജയ റണ്‍സ് കുറിച്ചു.

1998ലെ ചാംപ്യന്‍സ് ട്രോഫി വിജയത്തിനു ശേഷം ഐസിസി ടൂര്‍ണമെന്റുകളില്‍ പറയത്തക്ക കിരീട നേട്ടങ്ങളൊന്നുമില്ലാതെ വിഷമിച്ച ദക്ഷിണാഫ്രിക്കയുടെ രാജകീയ തിരിച്ചുവരവാണ് ലോഡ്‌സിലെ ഈ കിരീടവിജയം. ടെസ്റ്റ് ചാംപ്യന്‍ഷിപ് കാലയളവില്‍ നടന്ന 12 മത്സരങ്ങളില്‍ 8 എണ്ണം ജയിച്ച് പോയിന്റ് ടേബിളില്‍ ഒന്നാം സ്ഥാനക്കാരായി ലോഡ്‌സില്‍ ഫൈനല്‍ കളിക്കാനെത്തിയ ദക്ഷിണാഫ്രിക്ക, ആ മുന്നേറ്റത്തിനൊത്ത രാജകീയ വിജയത്തോടെയാണ് കിരീടം ചൂടിയത്. ഈ കാലയളവില്‍ 19 മത്സരങ്ങളില്‍ 13 എണ്ണവും ജയിച്ച് രണ്ടാം സ്ഥാനക്കാരായാണ് നിലവിലെ ചാംപ്യന്‍മാരായ ഓസ്‌ട്രേലിയ ഫൈനലില്‍ കടന്നത്.