കേരളാ ബ്ലാസേ്റ്റഴ്സും എ.ടി.കെ. മോഹന്‍ ബഗാനും തമ്മില്‍ ഏറ്റുമുട്ടുന്ന മത്സരത്തോടെ ഇന്ത്യന്‍ സൂപ്പര്‍ ലീഗിന്റെ ഫുട്ബോള്‍ ആരവങ്ങളുടെ ഏഴാം സീസണിന് ഇന്ന് തിരശ്ശീല ഉയരും. വൈകിട്ട് 7.30 മുതലാണ് ഉദ്ഘാടനമല്‍സരം. ബംബോലിനിലെ ജി.എം.സി. സ്റ്റേഡിയത്തിലാണു മത്സരം.

ഇത്തവണ കിരീടത്തിനായി മല്‍സരിക്കുന്നത് 11 ടീമുകളാണ്. ഐ ലീഗ് മുന്‍ ചാമ്പ്യന്‍ ഈസ്റ്റ് ബംഗാളാണു പുതിയ ടീം. എസ്. സി. ഈസ്റ്റ് ബംഗാള്‍ എന്ന പേരിലാണ് അവര്‍ ഐ.എസ്.എല്ലില്‍ കളിക്കുന്നത്്.

ബംഗളുരു എഫ്.സി., ചെന്നൈയിന്‍ എഫ്.സി., എഫ്.സി. ഗോവ, ഹൈദരാബാദ് എഫ്.സി., ജംഷഡ്പൂര്‍ എഫ്.സി., കേരളാ ബ്ലാസേ്റ്റഴ്സ് എഫ്.സി., മുംബൈ സിറ്റി എഫ്.സി., ഒഡിഷ എഫ്.സി., നോര്‍ത്ത് ഈസ്റ്റ് യുണൈറ്റഡ് എന്നിവരാണ് ടൂര്‍ണമെന്റില്‍ പങ്കെടുക്കുന്നത്.

കോവിഡ്-19 വൈറസ് മഹാമാരിയുടെ പശ്ചാത്തലത്തില്‍ ബയോ ബബിള്‍ സുരക്ഷയില്‍ നടക്കുന്ന ടൂര്‍ണമെന്റായതിനാല്‍ കാണികള്‍ക്കു പ്രവേശനമില്ല.

ഗോവയിലെ മൂന്ന് മൈതാനങ്ങളിലായി ടൂര്‍ണമെന്റ്. ഹോം, എവേ രീതി പിന്തുടര്‍ന്നാണു മത്സരങ്ങള്‍.

നിലവില്‍ ആദ്യ 11 റൗണ്ടുകളുടെ മത്സര ക്രമമാണു പുറത്തുവിട്ടത്. 95 മത്സരങ്ങളായിരുന്നു കഴിഞ്ഞ സീസണ്‍ വരെയുണ്ടായിരുന്നത്. ഇത്തവണ ആകെ 115 മത്സരങ്ങള്‍ നടക്കും.

ബ്ലാസ്റ്റേഴ്സും എ.ടി.കെയും തമ്മില്‍ ഇതുവരെ 14 തവണ ഏറ്റുമുട്ടിയതില്‍ കൊല്‍ക്കത്തക്കാര്‍ അഞ്ചു തവണയും ബ്ലാസ്റ്റേഴ്സ് നാലു തവണയും ജയിച്ചു. അഞ്ച് മത്സരങ്ങള്‍ വീതം സമനിലയായി. എ.ടി.കെ. ബ്ലാസ്റ്റേഴ്സിനെതിരേ 15 ഗോളുകളും ബ്ലാസ്റ്റേഴ്സ് എ.ടി.കെയ്ക്കെതിരേ 16 ഗോളുകളുമടിച്ചു.

ബ്ലാസേ്റ്റഴ്സിനാണ് സാമൂഹിക മാധ്യമങ്ങളില്‍ ഏറ്റവും കൂടുതല്‍ പിന്തുണ. 4.73 ദശലക്ഷമാണ് ബ്ലാസേ്റ്റഴ്സിന്റെ ആരാധക പിന്തുണ. രണ്ട് തവണ ഫൈനലില്‍ കളിച്ചെങ്കിലും കപ്പടിക്കാന്‍ ബ്ലാസേ്റ്റഴ്സിന് സാധിച്ചിട്ടില്ല. ''മഞ്ഞപ്പട'' ബ്ലാസേ്റ്റഴ്സിന്റെ പ്രധാന ആരാധക കൂട്ടായ്മയാണ്. ഇന്‍സ്റ്റഗ്രാമില്‍ മാത്രം 1.73 ദശലക്ഷം ആരാധകര്‍ ബ്ലാസേ്റ്റഴ്സിനുണ്ട്.

എ.ടി.കെ. മൂന്ന് തവണ കിരീടം നേടിയിട്ടുണ്ട്. എ.ടി.കെ. മോഹന്‍ ബഗാന്‍ എന്ന പേരില്‍ ഇറങ്ങുന്ന ടീമിനു സാമൂഹിക മാധ്യമങ്ങളില്‍ 1.78 ദശലക്ഷം ആരാധകരുണ്ട്. മോഹന്‍ ബഗാനുമായി ലയിച്ചതോടെ ഈ സീസണില്‍ ഇനിയും ടീമിന്റെ ആരാധക പിന്തുണ ഉയരും.

ആറു പുതിയ വിദേശ താരങ്ങളുമായാണ് ബ്ലാസേ്റ്റഴ്സ് ഒരുങ്ങിയത്. കഴിഞ്ഞ 2019-20 സീസണില്‍ ഏഴാമതും അതിനു മുമ്പ് (2018-19) ഒന്‍പതാമതും ഫിനിഷ് ചെയ്ത ബ്ലാസേ്റ്റഴ്സ് 2014, 2016 സീസണുകളില്‍ റണ്ണര്‍ അപ്പായിരുന്നു. ക്രിക്കറ്റ് ഇതിഹാസം സച്ചിന്‍ തെണ്ടുല്‍ക്കര്‍ സഹ ഉടമയായിരുന്ന കാലത്തെ പ്രതാപത്തിലേക്കു ടീമിനെ തിരിച്ചെത്തിക്കുകയാണു കോച്ച് കിബു വികുനയുടെ ലക്ഷ്യം.