യൂറോപ്പ്യൻ ഫുട്ബാളിൽ മുൻനിര ലീഗുകളിലെ വമ്പന്മാർ ഇന്ന് കളത്തിലിറങ്ങും. ഇംഗ്ലീഷ് പ്രീമിയർ ലീഗിൽ പോയിന്റ് ടേബിളിൽ ഒന്നാം സ്ഥാനക്കാരായ മാഞ്ചസ്റ്റർ സിറ്റി ലീഗിലെ നാലാം സ്ഥാനക്കാരായ വെസ്റ്റ് ഹാം യുണൈറ്റഡിനെ നേരിടും. ഇന്ത്യൻ സമയം വൈകിട്ട് ആറിന് സിറ്റിയുടെ തട്ടകമായ എത്തിഹാദ് സ്റ്റേഡിയത്തിൽ വെച്ചാണ് മത്സരം.

നിലവിൽ രണ്ടാം സ്ഥാനക്കാരായ മാഞ്ചസ്റ്റർ യൂണൈറ്റഡിനെക്കാൾ പത്ത് പോയിന്റ് ലീഡോടെയാണ് സിറ്റിയുടെ കുതിപ്പ്. പെപ് ഗാർഡിയോള പരിശീലിപ്പിക്കുന്ന സിറ്റി മികച്ച ഫോമിലാണ്. 25 മത്സരങ്ങൾ പൂർത്തിയാക്കിയപ്പോൾ പതിനെട്ട് ജയവും അഞ്ച് സമനിലയും രണ്ട് തോൽവിയുമായി അപരാജിതരായി മുന്നേറുകയാണ് സിറ്റി.

റൊട്ടേഷൻ വ്യവസ്ഥയിൽ തന്ത്രങ്ങൾ മെനയുന്ന ഗാർഡിയോളയുടെ സിറ്റി ടീമിൽ എല്ലാ കളിക്കാരും മികച്ച ഫോമിലാണ്.

പ്രീമിയർ ലീഗിലെ മറ്റു മത്സരങ്ങളിൽ വെസ്റ്റ് ബ്രോംവിച്ച് ബ്രൈറ്റനെയും ലീഡ്‌സ് യുണൈറ്റഡ് ആസ്റ്റൺ വില്ലയെയും നേരിടും.

യൂറോപ്യൻ ചാമ്പ്യന്മാരും നിലവിലെ ലീഗ് ചാമ്പ്യന്മാരുമായ ബയേൺ മ്യൂണിക്ക് ജർമ്മൻ ബുന്ദസ് ലീഗയിൽ എഫ്.സി കോളനെ നേരിടും. ബയേണിന്റെ മൈതാനമായ അലയൻസ് അരീനയിൽ വെച്ച് ഇന്ത്യൻ സമയം രാത്രി എട്ടു മണിയ്ക്കാണ് മത്സരം.

ലീഗിൽ കഴിഞ്ഞ രണ്ടു മത്സരങ്ങളിലായ് ബയേണിന് വിജയിക്കാൻ കഴിയാത്തതിന്റെ നിരാശ തീർക്കാൻ വേണ്ടിയാകും ഇന്ന് കോളനെതിരെ ഇറങ്ങുക. ഇക്കഴിഞ്ഞ ചാമ്പ്യൻസ് ലീഗ് മത്സരത്തിൽ ബയേൺ ഇറ്റാലിയൻ ക്ലബ്ബ് ലാസിയോയെ ഒന്നിനെതിരെ നാല് ഗോളുകൾക്ക് തകർത്ത ആത്മവിശ്വാസത്തിലാണ് ഇന്ന് ബൂട്ടണിയുക.

22 മത്സരങ്ങൾ പൂർത്തിയായപ്പോൾ രണ്ടാം സ്ഥാനത്തുള്ള ആർ.ബി ലെയ്‌പ്‌സിഗിനേക്കാൾ രണ്ടു പോയിന്റ് ലീഡോടെ ഒന്നാം സ്ഥാനത്താണ് ബയേൺ. ബൊറൂസ്സിയ ഡോർട്ട്മുണ്ട്, ആർ.ബി. ലെയ്‌പ്‌സിഗ്, ബൊറൂസ്സിയ മൊൻഷെൻ ഗ്ലാഡ്ബാക്ക് ടീമുകളും ഇന്ന് മത്സരത്തിനിറങ്ങും.

സ്പാനിഷ് ലാലിഗയിൽ മെസ്സിയുടെ ലാലിഗ ഇന്ന് സെവിയ്യയെ നേരിടും. സെവിയ്യയുടെ മൈതാനത്ത് ഇന്ത്യൻ സമയം രാത്രി 8:45 നാണ് മത്സരം. ലീഗിൽ ആദ്യം പതറിപ്പോയ ബാഴ്‌സ കഴിഞ്ഞ അഞ്ചു മത്സരങ്ങളിൽ തോൽവി അറിഞ്ഞിട്ടില്ല. നാല് ജയവും ഒരു സമനിലയുമായി റയൽ മാഡ്രിഡിന് തൊട്ട് പിറകിലായി മൂന്നാം സ്ഥാനത്താണ്. ഒന്നാം സ്ഥാനത്തുള്ള അത്‌ലറ്റിക്ക് മാഡ്രിഡിനെക്കാൾ അഞ്ചു പോയിന്റ് പിറകിൽ.

18 ഗോളുകൾ നേടി ലീഗിൽ ടോപ് സ്‌കോറർ ആയി മിന്നുന്ന ലയണൽ മെസ്സിയിൽ തന്നെയാണ് ബാഴ്‌സയുടെ എല്ലാ പ്രതീക്ഷയും.

ഇറ്റാലിയൻ സീരി എയിൽ ക്രിസ്റ്റിയാനോ റൊണാൾഡോയുടെ യുവന്റസ് വെറോണയെ നേരിടും. മെസ്സിയുടെ ബാഴ്‌സയെ പോലെ തന്നെ റൊണാൾഡോയുടെ യുവന്റസും ലീഗിൽ മൂന്നാമതാണ്. ഒരു കളി കുറവ് കളിച്ച യുവന്റസിന് ഒന്നാം സ്ഥാനത്തുള്ള ഇന്റർ മിലാനെക്കാൾ 8 പോയിന്റ് കുറവ്.

മെസ്സിയെപ്പോലെ തന്നെ ലീഗിൽ 18 ഗോളുകൾ നേടി ടോപ് സ്‌കോറർ ആണ് റൊണാൾഡോ. മത്സരം ഇന്ത്യൻ സമയം പുലർച്ചെ 1:15 ന് നടക്കും.