സംപ്രേഷണം ചെയ്ത ദൃശ്യങ്ങള് വേദനിപ്പിച്ചവരോട് മാപ്പു ചോദിക്കുന്നു! എറിക്സണ് കുഴഞ്ഞു വീണതിന്റെ 'എക്സ്ക്ലൂസീവ്': മാപ്പു ചോദിച്ച് ബി.ബി.സി രംഗത്ത്
ഫിന്ലാന്ഡുമായി യൂറോകപ്പ് മത്സരത്തിനിടെ ഡെന്മാര്ക്ക് താരം ക്രിസ്റ്റ്യന് എറിക്സണ് മൈതാനത്തു കുഴഞ്ഞു വീഴുന്നതിന്റെയും മെഡിക്കല് സംഘമെത്തി അടിയന്തര ചികിത്സ നല്കുന്നതിന്റെയും തത്സമയ ദൃശ്യങ്ങള് ഏറെ നേരം കാണിച്ചു പഴികേട്ട ബി.ബി.സി മാപ്പു പറഞ്ഞു.
മിനിറ്റുകളോളം ദൃശ്യങ്ങള് കാണിക്കുകയും ഇതേ കുറിച്ച് ചര്ച്ച നടത്തുകയും ചെയ്താണ് ചാനല് രംഗം കൊഴുപ്പിച്ചിരുന്നത്. ദൃശ്യങ്ങള് കാണാതിരിക്കാന് ഡെന്മാര്ക് താരങ്ങള് മനുഷ്യവലയം തീര്ത്തിരുന്നുവെങ്കിലും ഇതിനിടയിലൂടെ കാമറ ചലിപ്പിച്ചായിരുന്നു ബി.ബി.സി ചര്ച്ച.
''സംപ്രേഷണം ചെയ്ത ദൃശ്യങ്ങള് വേദനിപ്പിച്ചവരോട് മാപ്പു ചോദിക്കുന്നു. സ്റ്റേഡിയം ദൃശ്യങ്ങളുടെ കവറേജ് യുവേഫയാണ് നിയന്ത്രിക്കുന്നത്. കളി നിര്ത്തിവെച്ചതോടെ പരമാവധി വേഗത്തില് കാഴ്ചകള് നിര്ത്തിവെച്ചിട്ടുണ്ട്''- ബി.ബി.സി വാര്ത്ത കുറിപ്പ് പറയുന്നു.
സ്റ്റുഡിയോയില് മുന് ഇംഗ്ലീഷ് താരം ഗാരി ലിനേക്കറാണ് കമെന്ററി നയിച്ചിരുന്നത്. ചികിത്സ നല്കുന്നതിന്റെയും മൈതാനത്തെത്തിയ എറിക്സന്റെ പത്നിയെ ആശ്വസിപ്പിക്കുന്നതിന്റെയും ദൃശ്യങ്ങള് ബി.ബി.സി കാണിച്ചിരുന്നു.
കളിയുടെ ആദ്യ പകുതി അവസാനിക്കാനിരിക്കെയാണ് എറിക്സണ് ബോധരഹിതനായി മൈതാനത്തു വീണത്. ആശുപത്രിയിലെത്തിച്ച താരം അതിവേഗം തിരിച്ചുവരികയാണെന്ന് അധികൃതര് അറിയിച്ചു.
കരിയറിനിടെ ഒരിക്കല് പോലും ഹൃദയസംബന്ധമായ പ്രശ്നങ്ങള് നേരിടാതിരുന്ന താരം 11 വര്ഷത്തെ പരിശോധനകളിലൊക്കെയും ആരോഗ്യവാനായിരുന്നുവെന്ന് ബന്ധപ്പെട്ടവര് പറഞ്ഞു. എന്നിട്ടും, കളിക്കിടെ കുഴഞ്ഞുവീണത് എന്തുകൊണ്ടാണെന്നറിയാന് വിശദ പരിശോധന നടത്തിവരികയാണ്.
https://www.facebook.com/Malayalivartha
