ലോകചാമ്പ്യന്മാരെ സമനിലയില് കുരുക്കി ഹംഗറിയുടെ പോരാട്ടവീര്യം! ഫ്രാന്സിനെ സമനിലയില് തളച്ചത് ഹംഗറി, ആക്രമിച്ച് കളിച്ചിട്ടും അവസരങ്ങള് സൃഷ്ടിക്കാന് കഴിയാതെ ഫ്രഞ്ച് പട
ലോകചാമ്പ്യന്മാരായ ഫ്രാന്സിന് സമനില. യൂറോ കപ്പിലെ മരണ ഗ്രൂപ്പായി വിലയിരുത്തുന്ന ഗ്രൂപ്പ് എഫിലെ മത്സരത്തിലാണ് സമനില. ഗ്രൂപ്പിലെ ദുര്ബലരെന്ന് വിലയിരുത്തപ്പെട്ടു ഹംഗറിയാണ് ഫ്രാന്സിനെ സമനിലയില് തളച്ചത്. ഇരു ടീമുകളും ഓരോ ഗോളുകള് വീതമാണ് നേടിയത്.
ആദ്യ പകുതിയില് ഫിയോള നേടിയ ഗോളിന്റെ മികവില് ഹംഗറി മുന്നിട്ടു നിന്ന മത്സരം ഒരുപക്ഷെ ഫ്രാന്സിന് നാഷ്ടമാകുമെന്ന് തന്നെ തോന്നിയിരുന്നു. 66 മിനിറ്റിലാണ് ഫ്രാന്സിന് ഗോള് മടക്കി നല്കാന് കഴിഞ്ഞത്. വലത് വിങ്ങില് മുന്നേറിയ കിലിയന് എംബാപ്പെ ഹംഗറിയുടെ ബോക്സിലേക്ക് പാസ് കൊടുക്കുകയായിരുന്നു. ബോക്സിലേക്ക് പാഞ്ഞെടുത്ത ഗ്രീസ്മാന് പന്ത് ലക്ഷ്യത്തിലെത്തിച്ചു.
പിന്നീടുള്ള സമയം ആക്രമിച്ചു കളിച്ചെങ്കിലും അവസരങ്ങള് സൃഷ്ടിക്കാന് ഫ്രഞ്ചുപടയ്ക്ക് ആയില്ല. അച്ചടക്കത്തോടുള്ള പ്രതിരോധമാണ് ഹംഗറിയെ വിജയത്തിന് സമാനമായ സമനിലയിലെത്തിച്ചത്. ഹംഗറി അഞ്ച് ഷോട്ടുകള് തീര്ത്ത മത്സരത്തില് ഫ്രാന്സ് പതിനഞ്ച് ഷോട്ടുകള് കണ്ടെത്തി.
എംബാപ്പെ, ഗ്രീസ്മാന്, ബെന്സേമ എന്നിവരടങ്ങുന്ന ഫ്രാന്സിന്റെ ലോകോത്തര മുന്നേറ്റനിരയെ നിഷ്പ്രഭരാക്കുന്നതായിരുന്നു ഹംഗറിയുടെ പോരാട്ടവീര്യം. ജിറോഡ്, ഡെംബലെ, ലെമാര് തുടങ്ങിയ താരങ്ങളെ പകരക്കാരായി ഇറക്കി മത്സരത്തിന്റെ ഗതി അനുകൂലമാക്കാനുള്ള ഫ്രഞ്ച് പരിശീലകന് ദിദിയര് ദെഷാംപ്സിന്റെ ശ്രമവും ഫലം കണ്ടില്ല.
ഗ്രൂപ്പ് എഫിലെ ഇന്ന് നടക്കുന്ന മറ്റൊരു മത്സരത്തില് പോര്ച്ചുഗല് ജര്മനിയെ നേരിടും. ആദ്യ മത്സരത്തില് ഫ്രാന്സിനോട് പരാജയപ്പെട്ട ജര്മനിക്ക് ഇന്നത്തെ മത്സരം നിര്ണായകമാണ്. ഹംഗറിയെ മൂന്ന് ഗോളുകള്ക്ക് പരാജയപ്പെടുത്തിയ പോര്ച്ചുഗല് വിജയം ആവര്ത്തിക്കാമെന്ന ആത്മവിശ്വാസത്തിലാകും കളത്തിലിറങ്ങുക.
"
https://www.facebook.com/Malayalivartha