ആവേശകരമായ പോരാട്ടം.... കോപ്പ അമേരിക്കയിലെ സ്വപ്നഫൈനലില്‍ ആദ്യപകുതിയില്‍ അര്‍ജന്റീന മുന്നില്‍ . സ്വപ്ന ഫൈനലില്‍ ശക്തമായ സ്റ്റാര്‍ട്ടിംഗ് ഇലവനെയാണ് ഇരു ടീമും അണിനിരത്തിയത്. റിച്ചാര്‍ലിസണെയും നെയ്മറെയും എവര്‍ട്ടനെയും ആക്രമണത്തിന് നിയോഗിച്ച് 433 ശൈലിയിലായിരുന്നു ടിറ്റെയുടെ ബ്രസീല്‍.

മാരക്കാനയില്‍ 45 മിനുറ്റും ഒരു മിനുറ്റ് ഇഞ്ചുറിടൈമും പൂര്‍ത്തിയായപ്പോള്‍ 10ന് മെസിയും സംഘവും ലീഡ് ചെയ്യുകയാണ്. അതേസമയം 442 ശൈലിയാണ് കളത്തില്‍ സ്‌കലോണി സ്വീകരിച്ചത്.

സ്‌െ്രെടക്കര്‍മാരായി ലിയോണല്‍ മെസിയും ലൗറ്ററോ മാര്‍ട്ടിനസും ബൂട്ടുകെട്ടിയപ്പോള്‍ എഞ്ചല്‍ ഡി മരിയയും റോഡ്രിഗോ ഡി പോളും ലിയാന്‍ഡ്രോ പരേഡസും ജിയോവനി ലോ സെല്‍സോയും മധ്യനിരയില്‍ അണിനിരന്നു.


അതേസമയം പതിറ്റാണ്ടുകളായി തുടരുന്ന ഫൈനല്‍ വീഴ്ചകളുടേയും കിരീട വരള്‍ച്ചയുടെയും നിറം മങ്ങിയ ചരിത്രങ്ങള്‍ തിരുത്തിയെഴുതാന്‍ അര്‍ജന്റീനക്ക് മുന്നില്‍ മിനിറ്റുകളുടെ ദൂരം മാത്രം.

ഓര്‍ക്കാനാഗ്രഹിക്കാത്ത മാറക്കാന ദുരന്തങ്ങളുടെ പട്ടികയിലേക്ക് മറ്റൊരു മത്സരം കൂടി ചേര്‍ത്തുവെക്കാതിരിക്കാന്‍ അരയും തലയും മുറുക്കി ബ്രസീല്‍ പൊരുതുന്നുണ്ട്.ഒപ്പത്തിനൊപ്പം ഇരുടീമുകളും മുന്നേറിയ മത്സരത്തില്‍ 22ാം മിനിറ്റില്‍ ഏയ്ഞ്ചല്‍ ഡി മരിയ കുറിച്ച ഗോളാണ് അര്‍ജന്റീനയെ മുന്നിലെത്തിച്ചത്.

ഡി പോളിന്റെ സുന്ദരമായ പാസ് ബ്രസീല്‍ പ്രതിരോധത്തിന്റെ പഴുതിലൂടെ സ്വീകരിച്ച മരിയ പന്ത് ചിപ്പ് ചെയ്ത് വലയിലേക്ക് തിരിച്ചുവിടുകയായിരുന്നു.

ഇരു ടീമുകളും തുല്യ നിലയിലുള്ള മുന്നേറ്റം കാഴ്ചവെക്കുമ്പോഴും അധികം സുന്ദരമായ നീക്കങ്ങളൊന്നും ഇരുപക്ഷത്തുനിന്നുമുണ്ടായിട്ടില്ല. ആദ്യ പകുതി പിന്നിടുമ്പോഴേക്കും മത്സരത്തില്‍ 20ലേറെ ഫൗളുകള്‍ പിറഞ്ഞു കഴിഞ്ഞു. 1993ന് ശേഷമുള്ള ആദ്യകിരീടവുമായി അര്‍ജന്റീന ചരിത്രം എഴുതുമോ അതോ ശക്തമായ തിരിച്ചുവരവോടെ ബ്രസീല്‍ കിരീടം നിലനിര്‍ത്തുമോ കണ്ടറിയാം.