ലിവര്‍പൂളിനും സെനഗല്‍ ദേശീയ ടീമിനും വേണ്ടി തകര്‍പ്പന്‍ ഫോമില്‍ കളിക്കുന്ന സാഡിയോ മനേയെ വലയിലാക്കാന്‍ റയല്‍ മാഡ്രിഡും ബാഴ്‌സലോണയും ബയേണ്‍ മ്യൂണിക്കും രംഗത്ത്. എന്നാല്‍ മനേ ഇതുവരെ മനസ് തുറന്നിട്ടില്ല. തന്റെ മനസിലിപ്പോള്‍, വരാന്‍ പോകുന്ന യുവേഫാ ചാമ്പ്യന്‍സ് ലീഗ് ഫൈനലും അതിനു ശേഷം വരുന്ന ലോകകപ്പും മാത്രമാണുള്ളതെന്ന് താരം പറയുന്നു.

എത്രവലിയ വാഗ്ദാനങ്ങള്‍ മുന്നോട്ടുവച്ചാലും മനേ ലിവര്‍പൂള്‍ വിട്ടു പോകില്ലെന്ന വിശ്വാസമാണ് പരിശീലകന്‍ ക്ലോപ്പിനും ആരാധകര്‍ക്കുമുള്ളത്. ലിവര്‍പൂളില്‍ കളിക്കുന്ന തന്റെ സഹകളിക്കാര്‍ ഇല്ലെങ്കില്‍ താനൊന്നുമല്ലെന്ന് മനേ ആവര്‍ത്തിക്കുകയും ചെയ്യുന്നു. ഒരു സമ്പൂര്‍ണ വിംഗര്‍ എന്നാണ് പൊതുവേ മനേ വിശേഷിപ്പിക്കപ്പെടുന്നത്.

അദ്ദേഹത്തിന്റെ സ്‌കോറിംഗ് മികവും വിഷനും കളി പെട്ടെന്നു മാറ്റാനുള്ള അസാധാരണ കഴിവും ഇതിനകം ഫുട്‌ബോള്‍ ലോകം വാഴ്ത്തിക്കഴിഞ്ഞിട്ടുണ്ട്. മെസിയോടും റൊണ്‍ഡോയോടും തോള്‍ ചേര്‍ന്നു നില്‍ക്കാനുള്ള എല്ലാം പ്രതിഭാ വിശേഷങ്ങകളും മനേയില്‍ ഒത്തു ചേരുന്നുമുണ്ട്. പക്ഷേ കറുത്തവനായിപ്പോയി എന്നുള്ളതു മാത്രമായിരിക്കണം കുറവായി നിഴലിക്കുക. മുപ്പതുകാരനായ മനേയ്ക്കുമുന്നില്‍ ഇനിയും കാലം നിവര്‍ന്നു കിടപ്പുണ്ട്. ഒരിക്കല്‍ ബാലന്‍ ഡി ഓര്‍ നിര്‍ണയത്തില്‍ നാലാം സ്ഥത്തു വന്നിട്ടുണ്ട്.

2016-ല്‍ സതാംപ്ടണില്‍ നിന്നാണ് മനേ ലിവര്‍പൂളില്‍ എത്തുന്നത്. അവര്‍ക്കുവേണ്ടി 195 മല്‍സരങ്ങളില്‍ നിന്നായി 99 ഗോളും നേടി. 2019-ല്‍ ചാമ്പ്യന്‍സ് ലീഗു കിരീടവും 2020-ല്‍ പ്രീമിയര്‍ ലീഗ് കിരീടവും നേടിക്കൊടുത്തിട്ടുമുണ്ട്. സെനഗല്‍ ദേശീയ ടീമിനു വേണ്ടി 89 മല്‍സരങ്ങളില്‍ നിന്ന് 29 ഗോളും നേടി. ലോകത്തെ ഏതു ഒന്നാംകിട ടീമും കൊതിക്കുന്ന ഈ സൂപ്പര്‍ താരം ലിവര്‍പൂള്‍ വിടുമോ. അരാധകര്‍ ഉല്‍ക്കണ്ഠയോടെ കാത്തിരിക്കുന്നു.