മേജര്‍ ലീഗ് സോക്കറില്‍ തുടര്‍ച്ചയായ അഞ്ച് കളിയില്‍ ഇരട്ടഗോളുമായാണ് മുപ്പത്തെട്ടുകാരന്റെ കുതിപ്പ്. നാഷ്വില്ലെ എഫ്സിക്കെതിരെയും ഇരട്ടഗോള്‍ തൊടുത്ത മെസി ഇന്റര്‍ മയാമിക്ക് 2-1ന്റെ ജയമൊരുക്കി. 15 മത്സരങ്ങളില്‍ തോല്‍വിയറിയാതെ കുതിക്കുകയായിരുന്നു നാഷ്വില്ലെ. 19 കളിയില്‍ 38 പോയിന്റുമായി അഞ്ചാമതാണ് മയാമി. 22 കളിയില്‍ 41 പോയിന്റുള്ള നാഷ്വില്ലെ മൂന്നാമതും.

പതിനേഴാം മിനിറ്റില്‍ ഫ്രീകിക്കുമായാണ് അര്‍ജന്റീനക്കാരന്‍ തുടങ്ങിയത്. കളിജീവിതത്തിലെ 69-ാം ഫ്രീകിക്ക് ഗോള്‍. രണ്ടാംപകുതിയുടെ തുടക്കത്തില്‍ നാഷ്വില്ലെ തിരിച്ചടിച്ചെങ്കിലും മെസി വിട്ടുകൊടുത്തില്ല. സീസണില്‍ 16 കളിയില്‍ 16 ഗോളായി. ആറെണ്ണത്തിന് അവസരവുമൊരുക്കി.
മയാമിയില്‍ 66 കളിയില്‍ 55 ഗോളായി. കളിജീവിതത്തില്‍ ആകെ 872 എണ്ണം. അടുത്ത കളിയില്‍ രണ്ടാംസ്ഥാനക്കാരായ സിന്‍സിനാറ്റിയുമായാണ് മയാമി ഏറ്റുമുട്ടുന്നത്.