ഓസ്‌ട്രേലിയൻ ഓപ്പൺ ടെന്നീസ്‌ വനിതാ സിംഗിൾസ്‌ കിരീടം സ്വന്തമാക്കി കസാഖ്‌സ്ഥാൻ താരം എലേന റിബാകിന. ഫൈനലിൽ ലോക ഒന്നാം റാങ്കുകാരിയായ ബെലാറസിന്റെ അരീന സബലേങ്കയെ 6–4, 4–6, 6–4ന്‌ വീഴ്‌ത്തി.

രണ്ട്‌ മണിക്കൂറും 18 മിനിറ്റും നീണ്ട കലാശപ്പോരിൽ റിബാകിനയുടെ പൊള്ളുന്ന സർവുകൾ നിർണായകമായി മാറി. ഇ‍ൗ വേദിയിൽ ഇരുപത്താറുകാരിയുടെ ആദ്യ കിരീടമാണിത്. 2022ൽ വിംബിൾഡൺ നേടിയിട്ടുണ്ട്‌. തുടർച്ചയായി നാല്‌ തവണ ഫൈനലിലെത്തുകയും രണ്ട്‌ തവണ ചാമ്പ്യനാകുകയും ചെയ്‌ത സബലേങ്കക്കാണ്‌ മുൻതൂക്കം പ്രവചിച്ചിരുന്നത്‌.

എന്നാൽ കളി തുടങ്ങിയപ്പോൾ ചിത്രം മാറി. ആരംഭത്തിൽ സബലേങ്കയുടെ സർവ്‌ തകർത്ത്‌ റിബാകിന 2–0 ലീഡ്‌ നേടി. അതിൽ പിടിച്ച്‌ മുന്നേറി 37 മിനിറ്റിൽ സെറ്റ്‌ കരസ്ഥമാക്കി.

രണ്ടാം സെറ്റിൽ ചാമ്പ്യൻകളി കെട്ടഴിച്ച സബലേങ്ക തിരിച്ചുവന്നു. എന്നാൽ നിർണായകമായ മൂന്നാം സെറ്റിൽ സർവും ഷോട്ടും കൃത്യമാക്കി സബാകിന കളം ഭരിച്ചു. എയ്‌സ്‌ പായിച്ചാണ്‌ അഞ്ചാം റാങ്കുകാരി വിജയം നേടിയത്.