കൊടൈ എന്ന കൊടൈക്കനാലില്‍ കൊടും ചൂടിലും പരമാവധി താപനില 19.8 ഡിഗ്രി ല്‍ഷ്യസ്.കോടമഞ്ഞും ചാറ്റല്‍ മഴയും കൊടൈക്കനാലിന്റെ ബോഗി ഇരട്ടിപ്പിക്കുന്നു. വഴിയോരത്തിന് പിച്ചിയും മുല്ലയും ഇടകലര്‍ന്ന സൗരഭ്യമാണ്.വഴിയരികില്‍ ഓറഞ്ചു കൂട്ടിയിട്ടിരിക്കുന്നതും പതിവ് കാഴ്ചയാണ് .
തമിഴ്‌നാട്ടിലെ ദിണ്ടിഗല്‍ ജില്ലയിലാണ് കൊടൈക്കനാല്‍ . സമുദ്രനിരപ്പില്‍ നിന്നും 2133 മീറ്റര്‍ ഉയരത്തിലാണ് കൊടൈക്കനാല്‍ എന്ന മലനിരകളുടെ രാജകുമാരി .പഴനിമല അടിവാരത്തുനിന്ന് 65 കിലോമീറ്റര്‍ റോഡുമാര്‍ഗം സഞ്ചരിച്ചാല്‍ കൊടൈ മലമുകളിലെത്താം. കിഴക്കുഭാഗത്ത് താഴേ പളനി വരെ നീളുന്ന മലനിരകളും വടക്കുവശത്ത് വില്‍പ്പട്ടി, പള്ളങ്കി ഗ്രാമങ്ങള്‍ വരെ നീളുന്ന മലനിരകളുമാണ് കൊടൈക്കനാലിന്റെ അതിര്‍ത്തികള്‍. പടിഞ്ഞാറ് മഞ്ഞംപട്ടി, അണ്ണാമലൈ എന്നീ മലകളും തെക്ക് വശത്ത് കമ്പം താഴ്വരയും കൊടൈക്കനാലിന്റെ അതിര്‍ത്തികളാണ്.
കൊടൈക്കനാലിന് ചുറ്റും നിറയെ കാഴ്ചകളുണ്ട്. കോക്കേഴ്‌സ് വാക്ക്, ബിയര്‍ ഷോല വെള്ളച്ചാട്ടം, ബ്രയാന്റ് പാര്‍ക്ക്, കൊടൈക്കനാല്‍ തടാകം, ഗ്രീന്‍ വാലി വ്യൂ, ഷെബാംഗനൂര്‍ മ്യൂസിയം ഓഫ് നാച്ചുറല്‍ ഹിസ്റ്ററി, കൊടൈക്കനാല്‍ സയന്‍സ് ഒബ്‌സര്‍വേറ്ററി, പില്ലര്‍ റോക്ക്‌സ്, ഗുണ ഗുഹകള്‍, സില്‍വര്‍ കാസ്‌കേഡ്, ഡോള്‍ഫിന്‍സ് നോസ്, കുറിഞ്ഞി ആണ്ടവാര്‍ മുരുക ക്ഷേത്രം, ബെരിജാം തടാകം തുടങ്ങിയവയാണ് കൊടൈക്കനാലിലെ ചില കാഴ്ചകള്‍.
ബ്രയാന്റ്പാര്‍ക്ക് എന്ന സസ്യോദ്യാനം തടാകക്കരയിലാണ്. മെയ്മാസത്തില്‍ കൊടൈ ഫഌര്‍ഷോ ഈ പാര്‍ക്കിലാണ് നടക്കുക.കൊടൈ മലനിരകളുടെ ഏറ്റവുംമുകളില്‍ വാനനിരീക്ഷണ ദൂരദര്‍ശിനി സ്ഥാപിച്ചിട്ടുണ്ട്. 1893ല്‍ സ്ഥാപിച്ച ഈ കേന്ദ്രത്തിലെത്താന്‍ കൊടൈ നഗരത്തില്‍നിന്ന് 3.2 കിലോമീറ്റര്‍ വീണ്ടും കുന്നുകയറണം.
സാഹസികതനിറഞ്ഞ ഒരുകിലോമീറ്റര്‍ യാത്ര നടത്താന്‍ കോക്കേഴ്‌സ് വാക്കിലൂടെ നടക്കണം. പാതയുടെ ഒരുഭാഗം ചെങ്കുത്തായ മലയും മറുഭാഗം അഗാധഗര്‍ത്തവുമാണ്.
കൊടൈ മലയുടെ വടക്കുമേഖലയില്‍ പഴനി ദേവസ്ഥാനത്തിന്റെ നിയന്ത്രണത്തിലുള്ള കുറിഞ്ഞി ആണ്ടവര്‍ ക്ഷേത്രമുണ്ട്. നഗരത്തില്‍നിന്ന് മൂന്നേകാല്‍ കിലോമീറ്റര്‍ യാത്രചെയ്താല്‍ ക്ഷേത്രത്തിലെത്താം

മലകള്‍ക്കുമുകളില്‍ സ്തംഭംപോലെ 122 മീറ്റര്‍ ഉയരത്തില്‍ നില്‍ക്കുന്ന കല്‍ത്തൂണ്‍സമാനമായ പാറക്കൂട്ടങ്ങളുടെ ഭംഗി കാണാന്‍ കൊടൈ നഗരത്തില്‍ നിന്ന് ഏഴരകിലോമീറ്റര്‍ യാത്രചെയ്യണം. പില്ലര്‍ റോക്ക്‌സ് എന്ന പാറക്കൂട്ടങ്ങളുടെ സമീപദൃശ്യം അവിസ്മരണീയമാണ് .
കൊടൈക്കനാലിലെ ഏറ്റവും പ്രശസ്തമായ ടൂറിസ്‌റ് ആകര്‍ഷണ കേന്ദ്രങ്ങളില്‍ ഒന്നാണിത്. ഗ്രാനൈറ്റിലുള്ള മൂന്ന് കൂറ്റന്‍ തൂണുകളില്‍ നിന്നാണ് ഈ സ്ഥലത്തിന് പില്ലര്‍ റോക്ക്‌സ് എന്ന പേരുകിട്ടിയത്. 400 മീറ്ററോളം ഉയരമുണ്ട് ഇവയ്ക്ക്. ഈ കല്ലുകള്‍ക്കിടയിലുള്ള കൂറ്റന്‍ വിടവാണ് ഡെവിള്‍സ് കിച്ചന്‍ എന്ന് അറിയപ്പെടുന്നത്. തമിഴ്‌നാട് ഫോറസ്റ്റ് ഡിപ്പാര്‍ട്ട്‌മെന്റാണ് ഇത് സംരക്ഷിക്കുന്നത്.

സില്‍വര്‍ കാസ്‌കേഡ് വെള്ളച്ചാട്ടം 8 കിലോമീറ്റര്‍ അകലെയാണ്. പേര് പോലെത്തന്നെ വെള്ളികൊലുസു ചാര്‍ത്തി ആകാശത്തുനിന്നും ഇറങ്ങിവരുന്നതുപോലെയാണ് ഈ വെള്ളച്ചാട്ടം. ചരിത്ര പ്രസിദ്ധമായ ഡെവിള്‍സ് കിച്ചണിലേക്കു പോകുന്ന വഴിയില്‍ നിറയെ കാറ്റാടി മരങ്ങളാണ്.600 അടിയോളം താഴ്ചയുള്ള അഗാധ ഗര്‍ത്തത്തിലാണ് ഈ ഗുഹ അവസാനിക്കുന്നത് .അടിക്കടി അപകടങ്ങള്‍ ഉണ്ടാകാറുള്ളതുകൊണ്ട് ഗുഹക്കുള്ളില്‍ ഇപ്പോള്‍ പ്രവേശനം ഇല്ല .

ഡോള്‍ഫിന്‍ നോസ് എന്ന പാറമുനമ്പിലെത്തി പ്രകൃതിഭംഗി ആസ്വദിക്കാനും 8 കിലോമീറ്റര്‍
യാത്രചെയ്യണം.സമുദ്രനിരപ്പില്‍നിന്ന് 2,400 മീറ്റര്‍ ഉയരത്തിലുള്ള പെരുമാള്‍ കൊടുമുടിയിലെത്താന്‍ 10 കിലോമീറ്ററിലേറെ നടന്ന് മലകയറണം. പെരുമാള്‍ മലഗ്രാമത്തില്‍നിന്നാണ് കാട്ടിലൂടെയുള്ള സാഹസയാത്ര ആരംഭിക്കേണ്ടത്.
പന്ത്രണ്ട് വര്‍ഷത്തിലൊരിക്കല്‍ വിരുന്നിനെത്തുന്ന കുറിഞ്ഞിയാണ് കൊടൈക്കനാലിലെ വിശേഷപ്പെട്ട മറ്റൊരു കാഴ്ച.
തമിഴ്‌നാട് വിനോദസഞ്ചാര കോര്‍പറേഷന്‍േറതുള്‍പ്പെടെ നൂറോളം ഹോട്ടലുകള്‍ കൊടൈക്കനാലിലുണ്ട്. കൂടാതെ വഴിയോരക്കച്ചവടക്കാരും ഓറഞ്ചു വില്പനക്കാരും ധാരാളം ഉള്ളതിനാല്‍ ഭക്ഷണത്തിനും താമസത്തിനും ഇവിടെ എല്ലാസൗകര്യങ്ങളുമുണ്ട്.
120 കിലോമീറ്റര്‍ അകലത്തുള്ള മധുരയാണ് കാടൈക്കനാലിന് സമീപത്തുള്ള വിമാനത്താവളം. കോയമ്പത്തൂര്‍, ചെന്നൈ തുടങ്ങിയ സ്ഥലങ്ങളിലേക്ക് മധുരയില്‍ നിന്നും വിമാനങ്ങളുണ്ട്.  കൊടായ് റോഡാണ് സമീപ റെയില്‍വെ സ്‌റ്റേഷന്‍. ബാംഗ്ലൂര്‍, മുംബൈ, എറണാകുളം, തിരുവനന്തപുരം തുടങ്ങിയ നഗരങ്ങളിലേക്ക് ട്രെയിന്‍ കിട്ടണമെങ്കില്‍ കൊയമ്പത്തൂര്‍ ജംഗഷനില്‍ പോകണം. കേരളം, തമിഴ് നാട്, കര്‍ണാടകം തുടങ്ങിയ സംസ്ഥാനങ്ങളില്‍ നിന്നും നിരവധി ബസ്സുകളും ഇവിടേക്ക് ലഭ്യമാണ്.