പഴമയുടെ പെരുമ
കേരളത്തിന്റെ കെട്ടിടനിര്മ്മാണ കല ഇന്ത്യയില് മാത്രമല്ല ലോകമാകെ പേരെടുത്തതാണ്. ഈ പേരിനും പെരുമയ്ക്കും പുതിയ തലമുറക്ക് വിലയില്ലെന്നത് വേറെ കാര്യം. എന്നാല് മലയാളിയെപ്പോലെ ഗൃഹാതുരരായ മറ്റൊരു വിഭാഗമില്ലെന്നത് മറ്റൊരു രസകരമായ വസ്തുത. ലക്ഷങ്ങള് ചെലവാക്കി ഗൃഹാതുരതയുടെ പേരില് എട്ടുകെട്ടും, നാലുകെട്ടും, കല്ക്കുളവും നടുമുറ്റവും കെട്ടിയിടുന്നവര് അറിയേണ്ട ഒന്നുണ്ട്. കാഴ്ചയ്ക്ക് ഭംഗിയാണെന്നത് മാത്രമല്ല കേരളത്തിന്റെ തനതു കെട്ടിട നിര്മ്മാണ വിദ്യ പേരെടുക്കാന് കാരണം കാഴ്ചക്കപ്പുറം കാരണങ്ങള് ഒരുപാടുണ്ടതിന്.
ഉദാഹരണമായി പത്മനാഭപുരം കൊട്ടാരം തന്നെയെടുക്കാം. കേരളത്തിന്റെ തനതു വാസ്തുശില്പകലയുടെ മകുടോദാഹരണമാണ് പത്മനാഭപുരം. ക്രോസ് വെന്റിലേഷനുകള് അനേകം നടുമുറ്റങ്ങള് ജനലില്ലാതെ തന്നെ തടികൊണ്ടുള്ള ജാളികള് കൊണ്ടുള്ള ഡിസൈന് ലോകത്തെമ്പാടുമുള്ള എഞ്ചിനീയര്മാരെ അമ്പരപ്പിക്കുന്നതാണ് പത്മനാഭപുരം കൊട്ടാരത്തിലെ ഈ കാഴ്ചകള്.
പത്മനാഭപുരം കൊട്ടാരത്തില് തറയില് നിന്നാണ് ജാളികള് തുടങ്ങുന്നത്. വീടുപണിയുന്ന സമയത്ത് തറയില് ഇരിക്കുകയോ കിടക്കുകയോ ചെയ്യാന് സാധ്യതയുള്ള സ്ഥലങ്ങളില് തറനിരപ്പില് നിന്നുതന്നെ വെന്റിലേഷന് തുടങ്ങണം. അത്തരം മുറികളിലേക്കുള്ള വായുസഞ്ചാരം വെന്റിലേഷനുകളുപയോഗിച്ച് കൂട്ടുകതന്നെവേണം. ക്രോസ് വെന്റിലേഷന് സാധ്യമാവണമെങ്കില് കാറ്റിനകത്തേക്ക് പ്രവേശിക്കാനും പുറത്തേക്കിറങ്ങാനും സൗകര്യമുണ്ടാക്കണം. കാറ്റ് വീശുന്ന ദിശയിലും വീശുന്ന കാറ്റിന് പുറത്തിറങ്ങാന് എതിര്ദിശയിലും ജനാലകളോ, ജാളികളോ പോലുള്ള ഓപ്പണിങ്ങുകള് വേണം. രണ്ട് ഓപ്പണിങ്ങുകള്ക്കും ഒരേ വലിപ്പമായിരിക്കണം. പഴയ വീടുകള് ശ്രദ്ധിക്കൂ. ഒരു വാതിലിന് എതിര്വശത്തായി ഒരു ജനലോ മറ്റൊരു വാതിലോ തീര്ച്ചയായും ഉണ്ടാകും.
പഴയ വീടുകളിലാകട്ടെ വാതിലുകളും ജനലും മാത്രമല്ല നടുമുറ്റങ്ങളും ക്രോസ് വെന്റിലേഷന് സഹായകരമായിരുന്നു. ശുദ്ധവായു മാത്രമല്ല സ്വാഭാവിക വെളിച്ചം വീടിനകത്ത് പ്രവേശിക്കാനും നടുമുറ്റങ്ങള് സഹായിച്ചിരുന്നു. എന്നാല് നടുമുറ്റങ്ങള് സുരക്ഷിതമാണോ എന്ന കാര്യത്തില് പലരും ആശങ്കാകുലരാണ്താനും.
പണ്ടത്തെ കേരളീയ ഭവനങ്ങളിലെ മേല്ക്കൂരയില് ചെവികള് കണ്ടിട്ടില്ലേ. കളിയല്ല കാര്യം തന്നെ. അത്തരം ചെവികളായിരുന്നു മുഖപ്പുകള്. ചൂടുവായു പുറത്തേക്ക് കടക്കുകയും തണുത്തവായു അകത്തേക്ക് പ്രവേശിക്കുകയും ചെയ്യുമായിരുന്നു മുഖപ്പുകളിലൂടെ. മുഖപ്പുകള് വീടുകളുടെ അകത്തളങ്ങളില് വായുസഞ്ചാരം കൂട്ടുകയും വീടിനുള്ളിലെ താപനില നിയന്ത്രിക്കുകയും ചെയ്തിരുന്നു.
https://www.facebook.com/Malayalivartha