വിവാഹ രജ്‌സ്‌ട്രേഷന് ശേഷം ഭാര്യയെ വീട്ടിലാക്കി മടങ്ങിയ ഷെഫീക്കിനെ ഇന്നോവ ഇടിച്ച് തെറിപ്പിച്ചു; സംഭവസ്ഥലത്ത് തന്നെ മരിച്ചു
വിവാഹ രജിസ്ട്രേഷന് കഴിഞ്ഞ് മടങ്ങുന്നതിനിടെ വാഹനാപകടത്തില്‍ നവവരന്‍ മരിച്ചു. തിരൂരില്‍ ഇന്നോവ കാറും മോട്ടോര്‍ ബൈക്കും കൂട്ടിയിടിച്ച് പുതുപ്പറമ്പ് അരീക്കല്‍ താണു കുണ്ട് സ്വദേശി പെരിങ്ങോന്‍ ഇബ്രാഹീമിന്റെ മകന്‍ മുഹമ്മദ് ഷഫീക്ക് ( 23) ആണ് മരിച്ചത്. ഇന്നലെ വൈകുന്നേരം നാലരയോടെ പയ്യനങ്ങാടി ആലിന്‍ചുവട്ടിലായിരുന്നു അപകടം. കഴിഞ്ഞയാഴ്ചയായിരുന്നു തിരൂര്‍ ഇല്ലത്തപ്പാടത്തെ യുവതിയെ ഷഫീക്ക് വിവാഹം കഴിച്ചത്. വിവാഹ രജിസ്ട്രേഷന് നടപടികള്‍ക്കായി തിരൂര്‍ നഗരസഭ ഓഫീസില്‍ എത്തിയതായിരുന്നു.
രജിസ്ട്രേഷന് ശേഷം ഭാര്യയെ അവരുടെ വീട്ടിലാക്കി നാട്ടിലേക്ക് മടങ്ങുന്നതിനിടെ അമിതവേഗതയില്‍ എതിരെ വന്ന ഇന്നോവ കാര്‍ ഇടിച്ച് തെറിപ്പിക്കുകയായിരുന്നു. നിയന്ത്രണം വിട്ട ഇന്നോവ സമീപത്തെ ഇലക്ട്രിക് പോസ്റ്റിലിടിച്ചാണ് നിന്നത്. അപകടത്തെ തുടര്‍ന്ന് നാട്ടുകാര്‍ ഒരു മണിക്കൂറോളം റോഡ് ഉപരോധിച്ചു. അമിത വേഗത തടയാന്‍ സ്ഥാപിച്ചിരുന്ന ബാരിക്കേഡുകള്‍ ബസുകള്‍ എടുത്ത് മാറ്റിയതാണ് അപകടത്തിനിടയാക്കിയതെന്ന് നാട്ടുകാര്‍ പറഞ്ഞു. പൊലീസെത്തി നാട്ടുകാരെ അനുനയിപ്പിച്ച ശേഷമാണ് ഗതാഗതം പുനസ്ഥാപിച്ചത്. ഷഫീഖ് അടുത്ത ദിവസം ഗള്‍ഫിലേക്ക് മടങ്ങാനിരിക്കുകയായിരുന്നു. ഷഫീക്കിന്റെ മൃതദേഹം തിരൂര്‍ ജില്ലാ ആസ്പത്രി മോര്‍ച്ചറിയില്‍. മാതാവ്: ആമിന. സഹോദരന്‍. മുഹമ്മദ് റാഫി. ഖബറടക്കം പോസ്റ്റ്‌മോര്‍ട്ടത്തിന് ശേഷം ഇന്ന് ഞായത്തടം ജുമാ മസ്ജിദ് ഖബര്‍സ്ഥാനില്‍ നടക്കും.
https://www.facebook.com/Malayalivartha
