സഹകരണ മേഖലയിലെ പ്രതിസന്ധി അതീവ ഗുരുതരം, ജനങ്ങള് ബുദ്ധിമുട്ടുന്നു: സുപ്രീം കോടതി
നോട്ട് അസാധുവാക്കല് നടപടിയെ തുടര്ന്ന് സഹകരണ മേഖലയിലുണ്ടായ പ്രതിസന്ധി അതീവ ഗുരുതരമാണെന്ന് സുപ്രീം കോടതി. നോട്ട് പിന്വലിക്കല് മൂലം വലഞ്ഞിരിക്കുന്ന ജനങ്ങള്, സഹകരണ മേഖല സ്തംഭിച്ചതോടെ കഷ്ടപ്പെടുകയാണ്. പ്രശ്നപരിഹാരത്തിന് സര്ക്കാര് നടപടി എടുക്കണമെന്നും കോടതി നിര്ദേശിച്ചു. ഈ വിഷയത്തില് സമര്പ്പിക്കപ്പെട്ട ഹര്ജിയില് വാദം കേള്ക്കുകയായിരുന്നു സുപ്രീം കോടതി.
അടിസ്ഥാന സൗകര്യങ്ങളിലുള്ള കുറവാണു സഹകരണ ബാങ്കുകള്ക്കുമേല് നിയന്ത്രണം ഏര്പെടുത്താന് കാരണമെന്നു കേന്ദ്ര സര്ക്കാര് സുപ്രീം കോടതിയില് വിശദീകരണം നല്കി. സഹകരണ മേഖലയില് ബാങ്ക് ഇടപാടിനുവേണ്ട സൗകര്യം പരിമിതമാണ്.
ഇന്റര്നെറ്റ് ഉള്പെടെയുള്ള സൗകര്യങ്ങള് ബാങ്കുകളില് ലഭ്യമല്ലെന്നും വ്യാജനോട്ടുകള് കണ്ടെത്താന് മതിയായ സംവിധാനമില്ലെന്നും സര്ക്കാര് ചൂണ്ടിക്കാട്ടി.
മഹാരാഷ്ട്രയില്നിന്നുള്ള സഹകരണ ബാങ്കുകളാണ് സുപ്രീം കോടതിക്കു മുന്നില് പ്രതിസന്ധി അവതരിപ്പിച്ചത്. കേസ് തിങ്കളാഴ്ച വീണ്ടും പരിഗണിക്കും.
https://www.facebook.com/Malayalivartha