മുപ്പതിനായിരം രൂപയ്ക്ക് വേണ്ടി ഭാര്യയെ മര്‍ദ്ദിക്കുകയും തല മുണ്ഡനം ചെയ്ത ശേഷം വസ്ത്രയാക്കി നടത്തിക്കുകയും ചെയ്ത ഭര്‍ത്താവിനും ഭര്‍തൃ വീട്ടുകാര്‍ക്കുമെതിരെ പോലീസ് കേസെടുത്തു. പണം ലഭിക്കാതെ വന്ന ഭര്‍ത്താവും വീട്ടുകാരും യുവതിയെ പിന്നീട് കുഴിച്ച് മൂടാന്‍ ഒരുങ്ങിയെങ്കിലും സ്വന്തം വീട്ടുകാര്‍ വിവരമറിഞ്ഞെത്തിയത് യുവതിക്ക് തുണയായി. കൊല്‍ക്കത്തയിലെ ഉള്‍ ഗ്രാമത്തില്‍ തിങ്കളാഴ്ച നടന്ന സംഭവത്തില്‍ ഭര്‍ത്താവിനേയും പിതാവിനേയും പോലീസ് അറസ്റ്റ് ചെയ്തു.

ഭര്‍ത്താവിന്റെ മാതാവും മറ്റു രണ്ട് ബന്ധുക്കളും ഒളിവിലാണ്. രണ്ട് വര്‍ഷം മുമ്പ് വിവാഹിതയായ 10 മാസം പ്രായമായ കുഞ്ഞിന്റെ മാതാവാണ് പീഡനത്തിനിരയായത്. 30,000 രൂപക്ക് യുവതിയെ ഭര്‍ത്താവും വീട്ടുകാരും മര്‍ദ്ദിക്കുകയും വൃത്തികെട്ട ഭാഷയില്‍ ശകാരിക്കുകയും ചെയ്തതായി അയല്‍വാസികള്‍ പോലീസിന് മൊഴി നല്‍കി.

രണ്ടാം വിവാഹത്തിന് വേണ്ടി ഭര്‍ത്താവും വീട്ടുകാരും പണം ആവശ്യപ്പെട്ട് തന്നെ ഉപദ്രവിക്കുക പതിവാണെന്നും പണം കൊടുക്കാതെ വന്നതോടെ തന്നെ വസ്ത്രമില്ലാതെ നടത്തിച്ചതായും യുവതി പോലിസിനോട് പറഞ്ഞു. കുറ്റക്കാര്‍ക്കെതിരെ കര്‍ശന നടപടിയെടുക്കണമെന്നും ഇവര്‍ ആവശ്യപ്പെട്ടു. അതേസമയം സ്ത്രീകള്‍ക്കെതിരെയുള്ള അതിക്രമം ബംഗാളില്‍ അധികമാണ്. നാഷണല്‍ ക്രൈം റെക്കോര്‍ഡ്‌സ് ബ്യൂറോ യുടെ 2015 ല്‍ മാത്രം 33,218 കേസുകളാണ് ഇവിടെ രജിസ്റ്റര്‍ ചെയ്തിരിക്കുന്നത്.