രാഷ്ട്രപതിയുടെ നടപടി ഭരണഘടനാ വിരുദ്ധം;എംഎല്എമാരെ അയോഗ്യരാക്കിയ തീരുമാനം ജനാധിപത്യത്തിനു ഭീഷണിയെന്ന് എഎപി
എംഎല്എമാരെ അയോഗ്യരാക്കിയ രാഷ്ട്രപതിയുടെ തീരുമാനം ഭരണഘടനാ വിരുദ്ധമാണെന്ന് ആം ആദ്മി പാര്ട്ടി. 20 എംഎല്എമാരെ അയോഗ്യരാക്കാനുള്ള തെരഞ്ഞെടുപ്പ് കമ്മിഷന്റെ ശിപാര്ശയില് ഒപ്പുവച്ച രാഷ്ട്രപതി രാംനാഥ് കോവിന്ദിന്റെ നീക്കത്തോടു പ്രതികരിക്കുകയായിരുന്നു പാര്ട്ടി. രാഷ്ട്രപതിയുടെ തീരുമാനം ജനാധിപത്യത്തിനു ഭീഷണിയാണെന്നും ഇനി പ്രതീക്ഷകള് കോടതിയിലാണെന്നും അയോഗ്യരാക്കപ്പെട്ട എംഎല്എമാരില് ഒരാളായ മദന്ലാല് പറഞ്ഞു.
20 ആം ആദ്മി പാര്ട്ടി എംഎല്എമാരെ അയോഗ്യരാക്കാനുള്ള കേന്ദ്ര തെരഞ്ഞെടുപ്പു കമ്മീഷന്റെ ശിപാര്ശയില് രാഷ്ട്രപതി ഞായറാഴ്ച ഒപ്പുവച്ചിരുന്നു. ഇതോടെ ആം ആദ്മി പാര്ട്ടിയുടെ എംഎല്എമാരുടെ എണ്ണം 46 ആയി ചുരുങ്ങി. 70 അംഗ നിയമസഭയില് എഎപിക്ക് 66 എംഎല്എമാര് ഉണ്ടായിരുന്നു. 20 പാര്ട്ടി എംഎല്എമാരെ അയോഗ്യരാക്കിയതോടെ കേവല ഭൂരിപക്ഷത്തേക്കാള് (35) ഏറെമുന്നിലുള്ള കേജരിവാളിനു തത്കാലം ഭരണം നഷ്ടമാകില്ല. കോടതിയില്നിന്ന് ആം ആദ്മിക്ക് അനുകൂലമായി വിധിയുണ്ടായില്ലെങ്കില് 20 സീറ്റുകളില് ഉപതെരഞ്ഞെടുപ്പിനു കളമൊരുങ്ങും.
2015 മാര്ച്ച് 13ന് സംസ്ഥാന ഭരണം സുഗമമാക്കാന് ആം ആദ്മി സര്ക്കാര് എംഎഎല്എമാരെ പാര്ലമെന്ററി സെക്രട്ടറിമാരായി നിയമിച്ചിരുന്നു. ഭരണഘടന നിര്ദേശിക്കുന്നതനുസരിച്ച് പാര്ലമെന്റിലോ സംസ്ഥാന നിയമസഭകളിലോ അംഗമായിട്ടുള്ളവര് ആനുകൂല്യം പറ്റുന്ന മറ്റു സര്ക്കാര് പദവികളില് ജോലി ചെയ്യാന് പാടില്ല.
ഈ നിയമനങ്ങള് ചോദ്യം ചെയ്തു രാഷ്ട്രപതിയായിരുന്ന പ്രണാബ് മുഖര്ജിക്ക് പ്രമുഖ അഭിഭാഷകന് പ്രശാന്ത് പട്ടേല് കത്തു നല്കി. തെരഞ്ഞെടുപ്പു കമ്മിഷനും പരാതി നല്കി. ഇതേത്തുടര്ന്നാണ് ഇപ്പോഴത്തെ നടപടി.
https://www.facebook.com/Malayalivartha