ഒരു പിഞ്ചു ബാലന്‍ കൂടെയുള്ള തന്റെ കുഞ്ഞു സുഹൃത്തിന് ഭക്ഷണം വാങ്ങിച്ചുകൊടുക്കുന്ന തരത്തിലുള്ള വീഡിയോ കുറച്ച് ദിവസങ്ങളായി സമൂഹമാധ്യമങ്ങളിലൂടെ ശ്രദ്ധേയമായിരിക്കുകയാണ്. ഇറാന്‍-ഇറാഖ് ഭൂകമ്പത്തില്‍ നിന്ന് രക്ഷപ്പെട്ട കുട്ടികളാണ് ഇത് എന്ന തരത്തിലാണ് ഈ വീഡിയോ സമൂഹമാധ്യമങ്ങളില്‍ പ്രചരിച്ചത്.

എന്നാല്‍ ഇപ്പോള്‍ ഈ വീഡിയോയില്‍ കാണുന്ന കുട്ടികള്‍ ഭൂകമ്പത്തില്‍ രക്ഷപ്പെട്ട അഭയാര്‍ഥികളല്ലെന്നും ഇത് ഭൂകമ്പ ബാധിത പ്രദേശമായ കെര്‍മന്‍ശാ പ്രവിശ്യ അല്ലെന്നുമാണ് ഒരു വിഭാഗത്തിന്റെ അഭിപ്രായം. 530-ഓളം പേരാണ് ഇറാന്‍-ഇറാഖ് ഭൂകമ്പത്തില്‍ മരിച്ചത്. 8200 പേര്‍ക്ക് പരിക്കേല്‍ക്കുകയും ചെയ്തു. 30,000 വീടുകള്‍ നശിക്കുകയും ചെയ്തിരുന്നു.

ഏകദേശം 5 വയസ് പ്രായമുള്ള ബാലന്‍ ദുരിതാശ്വാസ പ്രവര്‍ത്തകരെ സമീപിച്ച് തന്റെ കൂടെയുള്ള കൂട്ടുകാരിക്ക് ഭക്ഷണം വാങ്ങികൊടുക്കുന്നതാണ് വീഡിയോയില്‍ കാണാന്‍ കഴിയുന്നത്. ഭക്ഷണം വിതരണം ചെയ്യുന്നവരോട് ഇവള്‍ക്ക് നിങ്ങള്‍ ഭക്ഷണം നല്‍കിയില്ലെന്ന് ആണ്‍കുട്ടി പറയുന്നുണ്ട്. ഇത് കേട്ട ഉടന്‍ അവര്‍ ഭക്ഷണവും കൊക്കകോളയും പെണ്‍കുട്ടിക്ക് കൈമാറുന്നതും വീഡിയോയില്‍ വ്യക്തമായി കാണാം. ശേഷം തിരിച്ചുപോരാന്‍ തയ്യാറാകുമ്പോള്‍ പ്രവര്‍ത്തകര്‍ ആണ്‍കുട്ടിയെ വിളിച്ച് അവനും ഭക്ഷണപൊതി നല്‍കുന്നതും വീഡിയോയില്‍ കാണാം.

ഒരു കൂട്ടം സാമൂഹ്യപ്രവര്‍ത്തകര്‍ ഭൂകമ്പബാധിത പ്രദേശത്ത് നടത്തിയ ചാരിറ്റിയുടെ ഭാഗമായുള്ള ഭക്ഷണവിതരണത്തിനിടെയുള്ള വീഡിയോ ആണെന്നാണ് ഒരു അന്തര്‍ദേശീയ മാധ്യമങ്ങളുള്‍പ്പടെയുള്ളവര്‍ വാദിക്കുന്നത്.

എന്നാല്‍ ടെഹ്‌റാനിലെ ശിയ വിഭാഗക്കാരുടെ പ്രാര്‍ത്ഥനാ കര്‍മ്മങ്ങളുടെ ഭാഗമായി ചിത്രീകരിച്ചതാണെന്നാണ് മറ്റൊരു വിഭാഗം അവകാശപ്പെടുന്നത്. അതിനാലാണ് പ്രവര്‍ത്തകര്‍ കറുത്ത വസ്ത്രം ധരിച്ചിരിക്കുന്നതെന്നും അഭിപ്രായമുണ്ട്. വീഡിയോയിലെ ശബ്ദങ്ങള്‍ക്ക് ടെഹ്‌റാന്‍ സംസാരശൈലിയുമായി സാദൃശ്യമുണ്ടെന്നും ഇവര്‍ വാദിക്കുന്നു.

കൂടെയുള്ള പെണ്‍കുട്ടി, അത് സുഹൃത്താണോ സഹോദരിയാണോ എന്ന കാര്യത്തില്‍ പോലും വ്യക്തതയില്ലെങ്കിലും കയ്യില്‍ മുറുക്കെ പിടിച്ച് ഭക്ഷണം വാങ്ങി നല്‍കാന്‍ കൊണ്ടുപോകുന്ന ആണ്‍കുട്ടിയുടെ കരുതലും സ്‌നേഹവും വീഡിയോയിലൂടെ ലോകമെമ്പാടും ശ്രദ്ധിച്ചുകഴിഞ്ഞു. വീഡിയോയ്ക്ക് പിന്നിലെ സത്യാവസ്ഥ പുറത്തുവന്നിട്ടില്ലെങ്കിലും ഇതിനോടകം സമൂഹമാധ്യമങ്ങളിലൂടെ നിരവധി പേരാണ് വീഡിയോ ഷെയര്‍ ചെയ്തിട്ടുള്ളത്.