മൈക്കിള്‍ ജാക്‌സണ്‍ മൃഗശാലയില്‍ ഏല്‍പ്പിച്ച ആന ചാടിപ്പോയി
ഫ്‌ളോറിഡയിലെ ജാക്‌സണ്‍വില്‍ മൃഗശാലയില്‍ നിന്നും പോപ് ഇതിഹാസം മൈക്കിള്‍ ജാക്‌സണിന്റെ വളര്‍ത്തുമൃഗമായിരുന്ന ആന ചാടിപ്പോയി. ആനയെ പാര്‍പ്പിച്ചിരുന്ന സ്ഥലത്തെ ഗേറ്റ് അബദ്ധത്തില്‍ ആരോ തുറന്നിടുകയായിരുന്നു. ഈ ഗേറ്റിലൂടെ പുറത്തിറങ്ങിയ അലി എന്ന ആന സമീപത്തുള്ള മൃഗങ്ങളെയെല്ലാം നടന്നു കണ്ടു.
ആന ചാടിപ്പോയെന്ന് മനസിലാക്കിയ മൃഗശാല അധികൃതര്‍ ഉടന്‍ തന്നെ ഭക്ഷണം കാട്ടി മയക്കി അലിയെ അതിന്റെ താമസസ്ഥലത്ത് തിരിച്ചെത്തിക്കുകയായിരുന്നു. ജീവിച്ചിരുന്ന സമയത്ത് മൈക്കിള്‍ ജാക്‌സണ്‍ അദ്ദേഹത്തിന്റെ വസതിയോട് ചേര്‍ന്ന് ഒരു സ്വകാര്യ മൃഗശാല സ്ഥാപിച്ചിരുന്നു.
കടുവയും ചിമ്പാന്‍സിയും അടക്കം നിരവധി മൃഗങ്ങള്‍ അവിടെയുണ്ടായിരുന്നു. 2009-ല്‍ മൈക്കിള്‍ ജാക്‌സണ്‍ മരിക്കുന്നതിന് മുമ്പ് തന്നെ ഇവയെ പൊതുമൃഗശാലകള്‍ക്ക് കൈമാറിയിരുന്നു. ഇത്തരത്തില്‍ ജാക്‌സണ്‍വില്‍ മൃഗശാലയില്‍ എത്തിയ ആനയാണ് അലി.
മൈക്കിള്‍ ജാക്‌സണിന്റെ പ്രിയപ്പെട്ട വളര്‍ത്തുമൃഗങ്ങളില്‍ ഒന്നായിരുന്നു ഈ ആന. മര്യാദക്കാരനായ അലി പുറത്തുചാടിയെങ്കിലും കുസൃതി ഒന്നും ഒപ്പിച്ചില്ലെന്ന് അലിയുടെ ട്രെയിനര്‍ പറഞ്ഞു.
https://www.facebook.com/Malayalivartha
