യുവനടിയെ തട്ടിക്കൊണ്ടു പോയ കേസില്‍ ദിലീപിന്റെ ജാമ്യാപേക്ഷ ഇന്ന് ഹൈക്കോടതി വിധി ഇന്ന് വരാനിരിക്കെ ആ സമയത്ത് അക്കൗണ്ടില്‍ ലക്ഷങ്ങളെത്തിയ ദിലീപിന്റെ നായികയും കുടുങ്ങും. നടി ആക്രമിക്കപ്പെട്ട സംഭവത്തിന് പിന്നാലെ നടിയുടെ അക്കൗണ്ടില്‍ വന്‍ തുക നിക്ഷേപിക്കപ്പെട്ടതായി കണ്ടെത്തിയ സാഹചര്യത്തിലാണ് അന്വേഷണം നടിയിലേക്ക് നീളുന്നത്. 

കേവലം രണ്ടു ചിത്രങ്ങളില്‍ മാത്രമാണ് ഈ നടി ദിലീപിന്റെ ചിത്രത്തില്‍ അഭിനയിച്ചത്. എന്നിരുന്നാലും നടിയ്ക്ക് ദിലീപുമായി അടുത്ത സൗഹൃദമുള്ളതായി പോലീസ് കണ്ടെത്തിയിട്ടുണ്ട്. നടിക്ക് പുറമേ ദിലീപിന്റെ വിദേശത്തുള്ള ഒരു ബന്ധുവിന്റെ സാമ്പത്തിക ഇടപാടുകളും നീക്കങ്ങളും പോലീസ് അന്വേഷിച്ചു തുടങ്ങിയിട്ടുണ്ട്. ദിലീപിന്റെ വിദേശത്തെ സാമ്പത്തിക ഇടപാടുകള്‍ ഇയാളാണ് കൈകാര്യം ചെയ്തിരുന്നതെന്നും പോലീസ് സംശയിക്കുന്നുണ്ട്. നടിയെ ഉപദ്രവിക്കാന്‍ ക്വട്ടേഷന്‍ നല്‍കിയ കേസില്‍ ദിലീപിന്റെ സാമ്പത്തിക ഇടപാടുകള്‍ പരിശോധിക്കുന്ന പോലീസ് നടന്മാര്‍ക്ക് കിട്ടുന്ന ഓവര്‍സീസ് റൈറ്റുമായി ബന്ധപ്പെട്ട് കിട്ടിയ തുക വിദേശനിക്ഷേപമാക്കി മാറ്റിയെന്നും ആരോപണവും അന്വേഷിക്കും. 

ഈ തുകയില്‍ ഒരു ഭാഗം താരം നികുതിവെട്ടിച്ച് കുഴല്‍പ്പണമായി നാട്ടില്‍ എത്തിച്ചെന്ന് സൂചനയുണ്ട്. കുറ്റം ബോദ്ധ്യപ്പെട്ടാല്‍ ഫോറിന്‍ എക്‌സ്‌ചേഞ്ച് മാനേജ്‌മെന്റ് ആക്റ്റ് പ്രകാരമായിരിക്കും കേസെടുക്കുക. ഇതിനുള്ള തെളിവെടുപ്പുകള്‍ അന്തിമഘട്ടത്തിലാണ്. ലഭ്യമായ രേഖകള്‍ ക്രൈംബ്രാഞ്ചിന്റെ സാമ്പത്തിക കുറ്റാന്വേഷണ വിഭാഗം പരിശോധിച്ചു തുടങ്ങിയിട്ടുണ്ട്. അതേസമയം കേസില്‍ ഗൂഡാലോചനയില്‍ പങ്കാളിയായി എന്ന് സംശയിക്കുന്ന ദിലീപിന്റെ മാനേജര്‍ അപ്പുണ്ണിയെ ഇതുവരെ കണ്ടെത്താന്‍ പോലീസിന് കഴിഞ്ഞിട്ടില്ല. ആദ്യ ഘട്ടത്തില്‍ ദിലീപിനൊപ്പം ചോദ്യം ചെയ്തു വിട്ടയച്ചിരുന്നു. 

ദിലീപിനെ പ്രതി ചേര്‍ത്തിരിക്കുന്ന ഗൂഡാലോചനക്കുറ്റത്തില്‍ തെളിവിനായി അപ്പുണ്ണിയെയും ദിലീപിനെയും ഒന്നിച്ചിരുത്തി ചോദ്യം ചെയ്യേണ്ടതുണ്ട്. എന്നാല്‍ ദിലീപിന് ജാമ്യം കിട്ടും വരെ ഒളിവില്‍ കഴിയാന്‍ അപ്പുണ്ണിക്ക് നിര്‍ദേശം കിട്ടിയിരിക്കാമെന്നാണ് പോലീസ് കരുതുന്നത്. അപ്പുണ്ണിയുടെ ജാമ്യാപേക്ഷയും ഇന്ന് പരിഗണിക്കന്നുണ്ട്. കേസില്‍ സുനില്‍കുമാറിന്റെ ആദ്യ അഭിഭാഷകന്‍ പ്രതീഷ് ചാക്കോയുമായി അപ്പുണ്ണി 40 തവണ ഫോണില്‍ വിളിച്ചതായി പോലീസ് കണ്ടെത്തിയിരുന്നു. ഏഴു തവണ ഇരുവരും നേരില്‍ കണ്ടിട്ടുണ്ടെന്നും പോലീസ് കണ്ടെത്തിയിരിക്കുകയാണ്.