കേരളത്തിലാദ്യമായി എംജിയില് ബിരുദത്തിനൊപ്പം മൈനര് ബിരുദം
കേരളത്തില് ആദ്യമായി എന്ജിനീയറിങ് ശാഖയിലെ ബിരുദത്തിനു പുറമേ ഒരു മൈനര് ബിരുദം കൂടി നേടാന് എംജി സര്വകലാശാലയുടെ തൊടുപുഴ യൂണിവേഴ്സിറ്റി കോളജ് ഓഫ് എന്ജിനീയറിങ്ങില് അവസരമൊരുക്കുന്നു. വിദേശരാജ്യങ്ങളില് മാത്രമേ ഇപ്പോള് ഇത്തരം അവസരമുള്ളൂ.
കംപ്യൂട്ടര് സയന്സ്, ഇലക്ട്രോണിക്സ് ആന്ഡ് കമ്യൂണിക്കേഷന്, ഇലക്ട്രിക്കല് ആന്ഡ് ഇലക്ട്രോണിക്സ്, ഇന്ഫര്മേഷന് ടെക്നോളജി, പോളിമര് എന്ജിനീയറിങ് ശാഖകളില് പഠിക്കുന്ന വിദ്യാര്ഥികള്ക്കു പ്രസ്തുത ശാഖയിലെ ബിടെക് ബിരുദത്തിനു പുറമേ മറ്റു നാലു ശാഖകളില് ഏതെങ്കിലും ഒന്നിലോ മാനേജ്മെന്റിലോ അധികമായി ഒരു മൈനര് ബിരുദമാണു സര്വകലാശാല വിഭാവനം ചെയ്യുന്നത്. ഇതിലേക്കായി മൂന്നു മുതല് ഏഴുവരെയുള്ള സെമസ്റ്ററുകളില് വിദ്യാര്ഥികള് അധികമായി ഒരു മൈനര് വിഷയംകൂടി പഠിക്കണം.
എന്ജിനീയറിങ് പാഠ്യപദ്ധതി പരിഷ്കരിക്കാനായി അക്കാദമിക്, വ്യാവസായിക, ഗവേഷണ മേഖലകളിലുള്ള പ്രമുഖര് ഉള്പ്പെടുന്ന വിദഗ്ധസമിതി യോഗത്തില് വൈസ് ചാന്സലര് ഡോ. ബാബു സെബാസ്റ്റ്യന് ഓപ്പണ്ബുക്ക് പരീക്ഷാ സംവിധാനം ഏര്പ്പെടുത്തണമെന്നു നിര്ദേശിച്ചു. ഒന്നും രണ്ടും സെമസ്റ്ററുകളില് അടിസ്ഥാന വിഷയങ്ങള്ക്കു തിയറിയും പ്രാക്ടിക്കലും സമന്വയിപ്പിച്ചുകൊണ്ടുള്ള പാഠ്യപദ്ധതി ഉടന് നിലവില് വരും. ഒന്നും രണ്ടും സെമസ്റ്ററുകളില് ഓരോ വിഷയങ്ങള്ക്കു പരീക്ഷണാടിസ്ഥാനത്തില് ഏര്പ്പെടുത്തുന്ന ഓപ്പണ് ബുക്ക് പരീക്ഷാരീതി വിജയകരമാണെന്നു കണ്ടാല് കൂടുതല് സെമസ്റ്ററുകളിലേക്കുകൂടി വ്യാപിപ്പിക്കും. വിദ്യാര്ഥികളുടെ തൊഴില്നൈപുണ്യം വര്ധിപ്പിക്കുന്നതിനായി എല്ലാ സെമസ്റ്ററുകളിലും അധികമായി ഓരോ കോഴ്സുകളും അനുവദിക്കും.
ഗേറ്റ് പരീക്ഷയ്ക്കു വിദ്യാര്ഥികളെ പ്രാപ്തരാക്കുന്നതിനായി ഏഴാം സെമസ്റ്ററില് പ്രത്യേക പരിശീലനം നല്കും. അവസാന വര്ഷ പ്രോജക്ട് വ്യവസായോന്മുഖമായ രീതിയിലേക്കു മാറ്റാന് എട്ടാം സെമസ്റ്ററിലെ 60% സമയം പ്രോജക്ടിനായി നീക്കിവച്ചു. സ്വയംസംരംഭകത്വ ശേഷി പ്രാവര്ത്തികമാക്കുന്നതിനായി ടെക്നോളജി ഇന്കുബേഷന് സെന്റര് കോളജില് സ്ഥാപിക്കാനും തയാറെടുക്കുകയാണു സര്വകലാശാല.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
