ബ്രെയില് ലിപിയില് ചോദ്യപേപ്പര് തയ്യാറാക്കി വിദ്യാഭ്യാസ വകുപ്പ് മാതൃകയായി
ചരിത്രത്തിലാധ്യമായി ബ്രെയില് ലിപിയില് ചോദ്യപേപ്പര് തയ്യാറാക്കി കേരള വിദ്യാഭ്യാസ വകുപ്പ് പുരോഗതിയുടെ ഒരു പടവുകൂടി കയറിയിരിക്കുന്നു. പരീക്ഷാഹാളില് ചോദ്യപേപ്പര് കൈയ്യില് കിട്ടുമ്പോഴുള്ള നെഞ്ചിടിപ്പും അതില് അറിയാവുന്ന ചോദ്യങ്ങള് കാണുമ്പോള് ഉണ്ടാകുന്ന സന്തോഷവും അനുഭവിക്കാത്തവര് ചുരുക്കമായിരിക്കും. എന്നാല് കാഴ്ചശക്തിയില്ലാത്ത വിദ്യാര്ത്ഥികള് ഇന്നലെയാണ് ആ സന്തോഷം തൊട്ടറിഞ്ഞത്.
സര്വശിക്ഷാ അഭിയാന് ആണ് വിദ്യാര്ത്ഥികള്ക്കായി ബ്രെയില് ലിപിയില് ചോദ്യപേപ്പര് തയ്യാറാക്കിയത്. ചോദ്യപേപ്പറിന്റെ കവര് തുറന്നപ്പോഴാണ് അധ്യാപകര്പോലും ഈ വാര്ത്ത അറിയുന്നത്. ഇതിനെ ചരിത്ര മുഹൂര്ത്തം എന്നു തന്നെ നമുക്കു വിശേഷിപ്പിക്കാം. പ്രാരംഭ ഘട്ടത്തില് ഒന്നുമുതല് ഏഴ് വരെയുള്ള ക്ലാസുകള്ക്കാണ് ഈ മാതൃകയില് ചോദ്യപേപ്പര് തയ്യാറാക്കിയത്.
കഴിഞ്ഞ വര്ഷം വരെ സാധാരണ രീതിയിലുള്ള ചോദ്യപേപ്പറുകളാണ് ഉണ്ടായിരുന്നത്. അധ്യാപകര് ചോദ്യങ്ങള് വായിച്ചു കൊടുക്കുകയും വിദ്യാര്ഥികള് ബ്രെയില് ലിപിയില് എഴുതുകയുമാണ് ചെയ്തിരുന്നത്. അറിയാവുന്ന ചോദ്യങ്ങള് ആദ്യം എഴുതുവാനോ ഉത്തരം കിട്ടാത്തവ പിന്നീട് ശ്രമിച്ചുനോക്കുവാനോ ഒന്നും കുട്ടികള്ക്ക് കഴിഞ്ഞിരുന്നില്ല. ഇത്തരം പോരായ്മകള്ക്കെല്ലാം ഇനി ഗുഡ്ബൈ പറയാം. വിദ്യാര്ഥികള്ക്ക് അധ്യാപകരുടെ സഹായമില്ലാതെ തന്നെ പരീക്ഷ എഴുതുവാനുള്ള അവസരമാണ് ഇത്തവണ വിദ്യാഭ്യാസ വകുപ്പ് ഒരുക്കിയത്.
ഒന്നുമുതല് ഏഴുവരെ ബ്രെയില് ലിപിയില് ചോദ്യപേപ്പര് വന്നതോടെ ഭാവിയില് എസ്.എസ്.എല്.സി. പരീക്ഷയും ബ്രെയില് ലിപിയില് എഴുതാനാകുമെന്ന് പ്രതീക്ഷിക്കുന്നു. ഇപ്പോഴും കാഴ്ചയില്ലാത്ത വിദ്യാര്ത്ഥികള് ചോദ്യം വായിച്ചുകേട്ട് മറ്റൊരാളെക്കൊണ്ട് സാധാരണ ലിപിയില് എസ്.എസ്.എല്.സി. പരീക്ഷ എഴുതിക്കുകയാണ് ചെയ്യാറുള്ളത്.
https://www.facebook.com/Malayalivartha