ലഹരിമരുന്ന് കേസ്; ആര്യന്‍ ഖാന് ഇന്നും ജാമ്യമില്ല; ഹര്‍ജിയില്‍ വാദം നാളെയും തുടരും
ലഹരി പാര്‍ട്ടി കേസില്‍ ആര്യന്‍ ഖാന് ഉള്‍പ്പെടെയുള്ള പ്രതികളുടെ ജാമ്യഹര്‍ജി പരിഗണിച്ച കോടതി വാദം കേള്‍ക്കുന്നത് നാളത്തേക്ക് മാറ്റി. ഷാരൂഖ് ഖാന്റെ മകന്‍ ആര്യന്‍, മുന്‍മുന്‍ ധമേച്ച, നടന്‍ അര്‍ബാസ് മെര്‍ച്ചന്റ് എന്നീ പ്രതികളുടെ ജാമ്യ ഹര്‍ജിയില്‍ ഇനി നാളെയാണ് വാദം തുടരുക.
പ്രതികളുടെ വാദങ്ങള്‍ ഇന്ന് കോടതിയില്‍ വിശദമാക്കിയെങ്കിലും എ.എസ്.ജി അനില്‍ സിംഗിന്റെ പ്രതിവാദം നാളെയാണ് ഉണ്ടാകുക. ഉച്ചയ്‌ക്ക് ശേഷം മൂന്ന് മണിയോടെ കേസില്‍ വാദം തുടരുമെന്നാണ് വിവരം. ജസ്റ്റീസ് നിതിന്‍ ഡബ്ല്യു സാമ്ബ്രെയുടെ ബെഞ്ചാണ് ജാമ്യാപേക്ഷ പരിഗണിക്കുന്നത്.
അര്‍ബാസിന് വേണ്ടി ഹാജരായ മുതിര്‍ന്ന അഭിഭാഷകന്‍ അമിത് ദേശായിയുടെയും അലി കാസിഫ് ഖാന് ദേശ്മുഖിന്റെയും വാദങ്ങളാണ് ഇന്ന് കോടതിയില്‍ നടന്നത്. ആവശ്യത്തിലധികം സമയം കസ്റ്റഡിയില്‍ പ്രതികള്‍ കഴിഞ്ഞുവെന്നും എന്‍സിബിക്കാവശ്യമെങ്കില്‍ മുംബൈ നിവാസികളായ പ്രതികള്‍ ജാമ്യം ലഭിച്ചതിന് ശേഷം ഏതുസമയവും അന്വേഷണ സംഘത്തിന് മുമ്ബില്‍ ഹാജരാകാന്‍ തയ്യാറാണെന്നും അമിത് ദേശായി കോടതിയില്‍ വ്യക്തമാക്കി.
അതേസമയം കേസില്‍ മറ്റു പ്രതികള്‍ക്ക് ചുമത്തിയ കുറ്റങ്ങള്‍ അതേപടി പകര്‍ത്തിയെഴുതുക മാത്രമാണ് മുന്‍മുന്‍ ധമേച്ചയുടെ കാര്യത്തില്‍ എന്‍സിബി ചെയ്തതെന്ന് ധമേച്ചയ്‌ക്കായി ഹാജരായ അഭിഭാഷകന്‍ കോടതിയില്‍ ആരോപിച്ചു. ചെയ്യാത്ത കുറ്റത്തിനാണ് ആര്യനും അര്‍ബാസും അറസ്റ്റിലായതെന്നും മൂന്ന് പ്രതികളുടെയും അറസ്റ്റ് നിയമവിരുദ്ധമാണെന്നും അമിത് ദേശായി വാദിച്ചു.
മൂന്ന് പ്രതികളുടെയും ജാമ്യാപേക്ഷ പരിഗണിച്ച കോടതി പ്രതിഭാഗം അഭിഭാഷകരുടെ വാദങ്ങളും വിശദമായി കേട്ടു. നാളെ എന്‍സിബിയുടെ മറുവാദമാണ് കോടതി കേള്‍ക്കാനിരിക്കുന്നത്. ഇതിന് ശേഷമാകും പ്രതികളുടെ ജാമ്യാപേക്ഷയില്‍ ഹൈക്കോടതി വിധി പറയുക. മുതിര്‍ന്ന അഭിഭാഷകനും മുന്‍ അറ്റോര്‍ണി ജനറലുമായ മുകുള്‍ റോത്തഗിയാണ് ആര്യന്‍ ഖാന് വേണ്ടി ഹാജരായത്. ഇദ്ദേഹത്തിന്റെ വാദം ഇന്നലെ പൂര്‍ത്തിയായിരുന്നു.
https://www.facebook.com/Malayalivartha
