21 ആം ദിനത്തിലെ ബിഗ് ബോസ് എപ്പിസോഡിൽ വളരെ സംഭവ ബഹുലമായ നിമിഷങ്ങൾക്കാണ് പ്രേക്ഷകർ സാക്ഷിയായത്. വലിയൊരു ബോംബ് തന്നെയെന്ന് അമരക്കാരനായ മോഹൻ ലാൽ മത്സരാർത്ഥികൾക്കിടയിൽ പൊട്ടിച്ചത്. ബിഗ് ബോസ് സീസൺ രണ്ടിലെ ആദ്യ വൈൽഡ് കാർഡ് എൻട്രി ആയിരുന്നു ഇന്നലെ സംഭവിച്ചത്. പ്രേക്ഷകർ ഒട്ടും പ്രതീക്ഷിക്കാത്ത രണ്ടു പെൺപുലികൾ ആയിരുന്നു അങ്കം കുറിക്കാനെത്തിയത്. എന്നാൽ ഇതിനോടൊപ്പം ഒരാൾ ബിഗ് ഹൗസിൽ നിന്നും വിട പറയുകയും ചെയ്തു. വളരെ നാടകീയ രംഗങ്ങളായിരുന്നു കഴിഞ്ഞ എപ്പിസോഡിൽ അരങ്ങേറിയത്. കണ്ണിന് അസുഖം ബാധിച്ച പരീക്കുട്ടിയുടെ കാര്യത്തിൽ ഇപ്പോഴും തീർച്ചയായിട്ടില്ല. പരീക്കുട്ടി ബിഗ് ബോസ്സിൽ തുടരുമോ അതോ അസുഖം മൂലം തിരികെ പോകേണ്ടി വരുമോ എന്നതിൽ തീർച്ചയായിട്ടില്ല. അങ്ങനെ രണ്ട് പേർ പുറത്തു പോയപ്പോൾ മറ്റു രണ്ടു പേർ ആ ഒഴിവ് നികത്താനെത്തിയിരിക്കുന്നു. രാജിനി ചാണ്ടി, സുരേഷ് കൃഷ്ണൻ എന്നിവരാണ് ബിഗ് ബോസ്സിൽ നിന്നും വിട പറഞ്ഞ രണ്ടുപേർ.

വൈൽഡ് കാർഡ് എൻട്രിയിലൂടെ എത്തിയത് രണ്ട് മാസ്സ് വ്യക്തികൾ തന്നെയായിരുന്നു . സോഷ്യല്‍ മീഡിയയിലെ അഭിപ്രായപ്രകടനങ്ങളിലൂടെ ശ്രദ്ധ നേടിയ ദയ അശ്വതിയാണ് ബിഗ് ബോസ് മലയാളം സീസണ്‍ രണ്ടിലെ ആദ്യ വൈൽഡ് കാർഡ് എൻട്രി. സോഷ്യല്‍ മീഡിയയിലൂടെ അഭിപ്രായങ്ങള്‍ തുറന്നുപറഞ്ഞുകൊണ്ട് പ്രശസ്തയായ ആള്‍' എന്ന വിശേഷണത്തോടെയാണ് മോഹൻ ലാൽ അശ്വതിയെ പ്രേക്ഷകർക്ക് മുന്നിൽ അവതരിപ്പിച്ചത്. പാലക്കാട് മുണ്ടൂര്‍ സ്വദേശിയായ ദയ അശ്വതി പ്രൊഫഷണല്‍ ബ്യൂട്ടീഷ്യൻ ആണ്. രണ്ട് വർഷമായി ബഹ്‌റിനിൽ ജോലി ചെയ്യുകയാണ് അശ്വതി. അമ്മയോ അച്ഛനോ കൂടപ്പിറപ്പുകളോ ഇപ്പോള്‍ തനിക്കൊപ്പമില്ലെന്നും അമ്മയുടെ അനിയത്തി മാത്രമാണ് അടുത്ത ബന്ധുവായി കൂടെ ഉള്ളതെന്നും അശ്വതി പരിചയപ്പെടുത്തലിനിടെ മോഹൻ ലാലിനോട് വെളിപ്പെടുത്തി. ബിഗ് ബോസിലൂടെ കുറച്ച് കാര്യങ്ങൾ തനിക്ക് ലോകത്തോട് പറയാനുണ്ടെന്നും അതുകൊണ്ടാണ് ബിഗ് ബോസ്സിലേക്ക് അവസരം ലഭിച്ചപ്പോൾ താൻ സ്വീകരിച്ചതെന്നും അശ്വതി വെളിപ്പെടുത്തി. പുറത്ത് നടത്തുന്ന കാര്യങ്ങള്‍ മറ്റ് മത്സരാര്‍ഥികളോട് പറയരുതെന്നും തന്നോട് ഇപ്പോള്‍ സംസാരിക്കുന്നത്പോലും അകത്തുപോയി പറയരുതെന്നും നിർദേശിച്ചാണ് മോഹൻ ലാൽ അശ്വതിയെ ബിഗ് ഹൗസിലേക്ക് അയച്ചത്.

എന്നാൽ അശ്വതി അകത്തേക്ക് പ്രവേശിച്ച ഉടൻ തന്നെ മോഹൻ ലാൽ അടുത്ത ഷോക്ക് നൽകുകയായിരുന്നു. രണ്ടാമത്തെ വൈൽഡ് കാർഡ് പ്രഖ്യാപിച്ചാണ് മോഹൻ ലാൽ പ്രേക്ഷകരെ വീണ്ടും ഞെട്ടിച്ചത്. ഒരാളെ കൂടി അകത്തേക്ക് വിടാമെന്ന് പറഞ്ഞാണ് മോഹൻ ലാൽ അടുത്ത ബോംബ് പൊട്ടിച്ചത്. ദയ അശ്വതി ബിഗ് ഹൗസിനുള്ളിലെത്തി മറ്റ് മത്സരാര്‍ഥികളുമായി പരിചയപ്പെടുമ്പോള്‍ മോഹന്‍ലാല്‍ അടുത്ത സര്‍പ്രൈസ് പുറത്തു വിടുകയായിരുന്നു. സോഷ്യല്‍ മീഡിയയിലൂടെത്തന്നെ അനേകം മലയാളികള്‍ക്ക് പരിചയമുള്ള ജസ്ല മാടശ്ശേരിയാണ് വൈല്‍ഡ് കാര്‍ഡ് വഴി ബിഗ് ബോസ്സിലെത്തിയ രണ്ടാമത്തെ മത്സരാർത്ഥി. സോഷ്യല്‍ മീഡിയയിലൂടെത്തന്നെ പ്രശസ്തയായ മറ്റൊരു വ്യക്തി എന്ന് പറഞ്ഞാണ് മോഹന്‍ലാല്‍ ജസ്ലയെ പ്രേക്ഷകർക്ക് പരിചയപ്പെടുത്തിയത്. ഹൗസിലെ ആരുമായും വ്യക്തിപരമായി പരിചയമില്ല എന്നതാണ് തന്നെ സംബന്ധിച്ച് ഏറ്റവും കൗതുകമുള്ള കാര്യമെന്ന് ജസ്ല വെളിപ്പെടുത്തി. ഒരു സ്വകാര്യ കമ്പനിയില്‍ മാര്‍ക്കറ്റിംഗ് മാനേജരായി ജോലി ചെയ്യുകയായിരുന്നു ജസ്ല.

ഏതായാലും രണ്ടു പുറത്തായപ്പോൾ രണ്ട് പേർ പകരമെത്തിയ അപൂർവ നിമിഷങ്ങളാണ് ബിഗ് ബോസ്സിൽ കഴിഞ്ഞ എപ്പിസോഡിൽ അരങ്ങേറിയത്. പുതിയ മത്സരാർത്ഥികളെ മറ്റ് മത്സരാർത്ഥികൾ എത്രത്തോളം സ്വീകരിക്കുമെന്നും ആരൊക്കെ ഇനി സുഹൃത്തുക്കളാകും ആരൊക്കെ ശത്രുക്കളാകും എന്ന് ഇനി വരും ദിവസങ്ങളിൽ കണ്ടറിയാം. ഇനി പുതിയ അടിപിടിക്കും വാക്കേറ്റത്തിനും തുടക്കം കുറിക്കുന്നതും ഇവരായിരിക്കുമോ എന്നുള്ള കാത്തിരിപ്പിലാണ് ആരാധകർ.