മീ ടു വെളിപ്പെടുത്തലുകള്‍ സിനിമാ ലോകത്തെ ഒന്നടങ്കം ഇളക്കി മറിക്കുകയാണ്. മലയാളി സംവിധായകന്‍ രാജേഷ് ടച്ച്‌റിവറും നേരത്തെ മീ ടു വിവാദത്തില്‍ കുടുങ്ങിയിരുന്നു. സിനിമയിലെ തുടക്കകാരിയായ രേവതി സമ്ബത്തായിരുന്നു സംവിധായകനെതിരെ ആരോപണങ്ങളുന്നയിച്ച് രംഗത്തെത്തിയിരുന്നത്.

രാജേഷില്‍ നിന്നും മാനസികമായ അധിക്ഷേപവും അപമാനവും ലൈംഗിക ചുവയുളള സംഭാഷണങ്ങളും നേരിടേണ്ടി വന്നുവെന്നായിരുന്നു നടി പറഞ്ഞിരുന്നത്. ഇതിനെയെല്ലാം ചോദ്യം ചെയ്ത് എത്തിയപ്പോള്‍ തന്നെ ബ്ലാക്ക് മെയില്‍ ചെയ്‌തെന്നും ഒറ്റപ്പെടുത്തിയെന്നും നടി പറഞ്ഞിരുന്നു. നേരത്തെ ഫേസ്ബുക്ക് പോസ്റ്റിലൂടെ രാജേഷിനെതിരെ രംഗത്തുവന്ന നടി ഫേസ്ബുക്ക് ലൈവിലും സംവിധായകനെതിരെ രംഗത്തുവന്നിരുന്നു.

രാജേഷ് ടച്ച്‌റിവറിന്റെ തന്നെ ബഹുഭാഷാ ചിത്രത്തിലൂടെ അരങ്ങേറ്റം കുറിച്ച നടിയാണ് രേവതി സമ്ബത്ത്. പട്‌നഗാര്‍ഹ് എന്ന പേരിട്ട ചിത്രത്തിലേക്ക് ഓഡീഷനിലൂടെയായിരുന്നു നടിക്ക് അവസരം ലഭിച്ചിരുന്നത്. തെലുങ്കിലും ഒറിയയിലുമായിരുന്നു ചിത്രം പൂര്‍ത്തികരിച്ചിരുന്നത്.

സിനിമയുടെ ഓഡീഷന്‍ സമയത്ത് നടന്ന ഒരു സംഭവമായിരുന്നു രേവതി ഫേസ്ബുക്ക് പേജിലൂടെ വെളിപ്പെടുത്തിയിരുന്നത്. സംവിധായകനില്‍ നിന്നും നേരിടേണ്ടി വന്ന മോശം അനുഭവങ്ങളായിരുന്നു നടി പങ്കുവെച്ചിരുന്നത്. ആദ്യമൊരു ഫേസ്ബുക്ക് പോസ്റ്റിലൂടെ എത്തിയ നടി പിന്നീടായിരുന്നു ഫേസ്ബുക്ക് ലൈവില്‍ വിശദീകരണവുമായി എത്തിയിരുന്നത്.

ഷൂട്ടിംഗിനിടെ തന്നെ ലൈംഗിക ചുവയുളള സംഭാഷണങ്ങള്‍ അയാള്‍ ഉപയോഗിക്കാറുണ്ടായിരുന്നു. ഇതിനെതിരെ ഞാന്‍ പ്രതികരിച്ചു. എന്തിനാണ് ഇത്തരം കാര്യങ്ങള്‍ പറയുന്നത് എന്ന് ഞാന്‍ ചോദിച്ചു. ആ പ്രതികരണമാണ് എന്നെ അഹങ്കാരിയാക്കി മാറ്റിയത്. അല്ലെങ്കില്‍ അവിടെ നിന്നും മുഴുവനായി മാറ്റിനിര്‍ത്തപ്പെട്ടത്.

അതിന്റെ ലോജിക്ക് എനിക്ക് ഇപ്പോഴും മനസിലാവുന്നില്ല.ഇയാള്‍ ഒരു ഉളുപ്പമില്ലാതെ ലൈംഗിക ചുവയുളള കാര്യങ്ങള്‍ പറയുന്നത് കേള്‍ക്കേണ്ടി വരുന്നത് പുച്ഛം തോന്നുന്ന ഒരു അവസ്ഥയായിരുന്നു. അതിനെതിരെ പ്രതികരിക്കുക എന്നത് തന്റെ അവകാശമാണെന്നും അങ്ങനെ ചെയ്യുമ്‌ബോള്‍ എങ്ങനെയാണ് അഹങ്കാരിയാവുന്നതെന്നും രേവതി ലൈവില്‍ ചോദിച്ചു.