സിനിമ ലോകത്ത് മീടുവിവാദം കൊഴുക്കുകയാണ്. കഴിഞ്ഞദിവസം ചെന്നൈയില്‍ ചിന്മയി ശ്രീപാദ, ലീന മണിമേകലൈ, ശ്രീരഞ്ജിനി, ലക്ഷ്മി രാമകൃഷ്ണന്‍ എന്നിവര്‍ നടത്തിയ വാര്‍ത്താസമ്മേളനം അതിന്റെ തെളിവായിരുന്നു. ഇവര്‍ക്ക് പിന്തുണയുമായി എത്തിയിരിക്കുകയാണ് നടി പാര്‍വ്വതി. ചിന്മയി ഉള്‍പ്പെടെയുള്ളവര്‍ കടന്നുപോയ അവസ്ഥകള്‍ തന്റെ ഹൃദയത്തെ തകര്‍ത്തുവെന്ന് പാര്‍വ്വതി പറഞ്ഞു.

'തങ്ങളുടെ അനുഭവങ്ങള്‍ തുറന്നുപറഞ്ഞു കൊണ്ട് ചില സ്ത്രീകളെങ്കിലും മുന്നോട്ടുവരുന്ന സമയമാണ്. ഞങ്ങള്‍ക്കോരോരുത്തര്‍ക്കും പറയാന്‍ കഥകളുമുണ്ട്. ഞങ്ങള്‍ ആക്രമിക്കപ്പെട്ടിട്ടുണ്ട്. ഈ ലോകത്തെ പുരുഷന്മാരെല്ലാം മോശക്കാരാണെന്ന് പറയാനല്ല ഞങ്ങള്‍ ശ്രമിക്കുന്നത്. നിങ്ങളുടെ പിന്തുണയും ഞങ്ങള്‍ക്ക് ആവശ്യമുണ്ട്,' പൊട്ടിത്തെറിച്ചുകൊണ്ട് ചിന്മയി പറഞ്ഞിരുന്നു.

ഏതാനും ദിവസങ്ങള്‍ക്ക് മുമ്ബ് സമാനമായ സംഭവങ്ങള്‍ തന്നെയാണ് കേരളത്തിലും നടന്നത്. വിമണ്‍ ഇന്‍ സിനിമാ കളക്ടീവ് അംഗങ്ങള്‍ നടത്തിയ വാര്‍ത്താ സമ്മേളനത്തില്‍ മാധ്യമപ്രവര്‍ത്തകര്‍ പ്രതികരിച്ച രീതി ശരിയായില്ലെന്ന് വിമര്‍ശനങ്ങള്‍ ഉയര്‍ന്നിരുന്നു. പാര്‍വ്വതി, രേവതി, പത്മപ്രിയ തുടങ്ങിയവരായിരുന്നു താരസംഘടനയായ എഎംഎംഎയില്‍ നിന്നും തങ്ങള്‍ നേരിട്ട തുടര്‍ച്ചയായ നീതിനിഷേധങ്ങളെക്കുറിച്ച് തുറന്നടിച്ചത്. ഇതിനെ ഓര്‍മ്മിപ്പിക്കുന്നതായിരുന്നു കഴിഞ്ഞദിവസം ചെന്നൈയില്‍ നടന്ന വാര്‍ത്താ സമ്മേളനവും. ഇക്കാര്യവും പാര്‍വ്വതി തന്റെ ട്വീറ്റില്‍ പറഞ്ഞു.

വൈരമുത്തുവിനെതിരെ കടുത്ത ആരോപണങ്ങളായിരുന്നു ചിന്മയി ഉന്നയിച്ചിരുന്നത്. സഹകരിക്കണം എന്ന് ആവശ്യപ്പെട്ട് വൈരമുത്തു തന്നെ ഹോട്ടലിലേക്ക് വിളിപ്പിച്ചതായി ചിന്മയി നേരത്തേ പറഞ്ഞിരുന്നു. 2005ലോ 2006ലോ ആണ് സംഭവം നടന്നതെന്നാണ് ചിന്മയി പറഞ്ഞത്.

സ്വിറ്റ്‌സര്‍ലന്‍ഡില്‍ ഒരു ആല്‍ബത്തില്‍ പാടാനായി പോയപ്പോഴായിരുന്നു സംഭവം. 'എല്ലാവരേയും പറഞ്ഞയച്ച് എന്നോടും അമ്മയോടും മാത്രം നില്‍ക്കാന്‍ പറഞ്ഞു. വൈരമുത്തുവിനെ ഹോട്ടലില്‍ ചെന്ന് കാണാനായി സംഘാടകനാണ് വന്ന് പറഞ്ഞത്.

സഹകരിക്കണമെന്ന് പറഞ്ഞപ്പോള്‍ എന്തിനു സഹകരിക്കണം എന്ന് ഞാന്‍ ചോദിച്ചു. അവരുടെ ആവശ്യം ഞാന്‍ നിരാകരിച്ചു. ഇന്ത്യയിലേക്ക് തിരിച്ച് അയയ്ക്കണമെന്ന് ഞാന്‍ ആവശ്യപ്പെട്ടു. 'നിങ്ങളുടെ കരിയര്‍ ഉണ്ടാവില്ല' എന്നാണ് അയാള്‍ പറഞ്ഞത്. കരിയറും വേണ്ട ഒരു മണ്ണും വേണ്ടെന്ന് പറഞ്ഞാണ് ഞങ്ങള്‍ ഇന്ത്യയിലേക്ക് വിമാനം കയറിയത്,' ചിന്മയി പറഞ്ഞു.