സാന്ത്വന പരിചരണ ദിനത്തോടനുബന്ധിച്ച് ആലുവ ജില്ലാ ആശുപത്രിയുടെ നേതൃത്വത്തിൽ നടന്ന കിടപ്പുരോഗികളുടെ രോഗി- ബന്ധു സംഗമത്തിൽ അതിഥികളായി ചലച്ചിത്രതാരം പേളി മാണിയും, ശ്രീനിഷുമെത്തി. പാട്ടുപാടിയും രോഗികളുമായി സംസാരിച്ചും ഏറെ നേരം ചെലവഴിച്ചാണ് ഇരുവരും മടങ്ങിയത്. സാന്ത്വന പരിചരണ ദിനത്തോടനുബന്ധിച്ച് ആലുവ ജില്ലാ ആശുപത്രിയുടെ ഓപ്പൺ എയർ സ്റ്റേഡിയത്തിലാണ് രോഗി-ബന്ധു സംഗമവും സ്നേഹവിരുന്നും വിവിധ കലാപരിപാടികളും നടന്നത്.

ബിഗ് ബോസ് മലയാളം സീസണ്‍ ഒന്നില്‍ മത്സരാര്‍ത്ഥിയായി എത്തിയതോടെയാണ് അവതാരകയും നടിയുമായ പേര്‍ളി മാണിയ്ക്ക് കേരളത്തില്‍ ഏറ്റവുമധികം ആരാധകരെ ലഭിച്ചത്. ഒരുവിധം പ്രേക്ഷകരു പേര്‍ളിയെ പിന്തുണയ്ക്കുന്നവരായിരുന്നു. ശ്രീനിഷ് അരവിന്ദുമായി പ്രണയത്തിലായതോടെ ബിഗ് ബോസിലെ തേപ്പുക്കാരിയാണെന്ന് വരെ പേര്‍ളിയ്ക്ക് പഴി കേള്‍ക്കേണ്ടി വന്നിരുന്നു.

പുറത്ത് വന്നാല്‍ ഇരുവരും വേറെ വഴിക്ക് പോവുമെന്നും മത്സരത്തില്‍ ജയിക്കാന്‍ വേണ്ടിയുള്ള നാടകമാണിതെല്ലാമെന്നും ചിലര്‍ മുന്‍വിധിയെഴുതി. എന്നാല്‍ അത്തരം തെറ്റിദ്ധാരണകളെല്ലാം മാറ്റി മറിച്ചിരിക്കുകയാണ് താരജോഡികള്‍. ഉടന്‍ തന്നെ ശ്രീനിഷ് അരവിന്ദും പേര്‍ളിയും തമ്മിലുള്ള വിവാഹം നടക്കുമെന്നാണ് റിപ്പോര്‍ട്ടുകള്‍. സമൂഹമാധ്യമങ്ങളിൽ ആരാധകരോട് സംവദിക്കാറുള്ള ഇരുവരും തങ്ങളുടെ വിശേഷങ്ങളും പങ്കുവയ്ക്കാറുണ്ട്. ഇപ്പോൾ തന്റെ പ്രിയതമന്റെ നല്ല ഗുണങ്ങളെ കുറിച്ച് പേര്‍ളി തുറന്ന് പറഞ്ഞത് സോഷ്യൽ മീഡിയയിൽ വൈറലായിരിക്കുകയാണ്.

ഓണ്‍ലൈനില്‍ ആരാധകരുമായി സംസാരിക്കവേയാണ് ശ്രീനിഷിന്റെ ചില നല്ല ഗുണങ്ങളെ കുറിച്ച് ഒരു ചോദ്യം വന്നത്. അതിന് പേര്‍ളിയുടെ കൈയില്‍ കിടിലന്‍ ഉത്തരങ്ങളുണ്ടായിരുന്നു. ശ്രീനി എന്നോട് സംസാരിക്കുമ്പോള്‍ എന്റെ കണ്ണുകളിലേക്ക് നോക്കിയാണ് സംസാരിക്കുക. എനിക്ക് തോന്നുന്നു അത് നല്ലൊരു കാര്യമാണെന്ന്. അടുത്ത ചോദ്യം 2019 ല്‍ സാക്ഷാത്കരിക്കണമെന്ന് ആഗ്രഹിക്കുന്ന കാര്യമെന്താണ് എന്നതായിരുന്നു. ശ്രീനിയ്‌ക്കൊപ്പമുള്ള ചിത്രം പങ്കുവെച്ച് കൊണ്ട് ശ്രീനിയെ എന്റേതാക്കണമെന്നായിരുന്നു പേര്‍ളി മറുപടി പറഞ്ഞത്.

ശ്രീനി-പേര്‍ളി വിവാഹത്തിന് വീട്ടുകാര്‍ സമ്മതം മൂളിയതോടെ വിവാഹമെന്നാണെന്ന് അറിയാനുള്ള കാത്തിരിപ്പിലാണ് ആരാധകര്‍. അധികം വൈകാതെ വിവാഹമുണ്ടാവുമെന്ന് പലപ്പോഴായി ഇരുവരും തുറന്ന് പറഞ്ഞെങ്കിലും കൃത്യമായൊരു ദിവസം പ്രഖ്യാപിച്ചിട്ടില്ല. എന്നാല്‍ ഈ ജനുവരിയില്‍ വിവാഹനിശ്ചയം കഴിയാന്‍ സാധ്യതയുള്ളതായി നേരത്തെ വാര്‍ത്തകള്‍ പ്രചരിച്ചിരുന്നു. ഔദ്യോഗികമായൊരു പ്രഖ്യാപനമാണ് ഇനി വേണ്ടത്.

ബിഗ് ബോസില്‍ 24 മണിക്കൂറും ഒന്നിച്ചുണ്ടായിരുന്നതിനാല്‍ പുറത്ത് വന്നതോടെ ഇരുവര്‍ക്കും ഒരുപാട് മിസ് ചെയ്യുന്നുണ്ടായിരുന്നു. ഇക്കാര്യം സോഷ്യല്‍ മീഡിയ അക്കൗണ്ടിലൂടെ താരങ്ങള്‍ വ്യക്തമാക്കിയിരുന്നു. പൊതുവേദികളില്‍ വിവിധ പാരിപാടികള്‍ക്കായി ഇരുവരും ഒന്നിച്ചെത്താറുണ്ട്. ഇതിന്റെ ഫോട്ടോസ് ഇന്‍സ്റ്റാഗ്രാം വഴി ആരാധകര്‍ക്കായി പങ്കുവെക്കാറുണ്ട്. പുറത്ത് വരുന്ന ചിത്രങ്ങളെല്ലാം അതിവേഗം സോഷ്യല്‍ മീഡിയയില്‍ വൈറലായി മാറാറുണ്ടെന്നുള്ളതാണ് ശ്രദ്ധേയം.

ഇരുവരുടെയും വിവാഹത്തിന് കുടുംബങ്ങൾ പച്ചക്കൊടി കാണിച്ചതിന് പിന്നാലെ പൊതുചടങ്ങുകളിൽ ഒരുമിച്ചാണ് പങ്കെടുക്കാറുള്ളത്. നേരത്തെ തന്നെ ആതുരസേവനകളിൽ ആക്റ്റീവ് ആയ പേർളി തന്റെ പ്രതിശ്രുത വരനെയും ആ വഴിയിലേയ്ക്ക് കൊണ്ടുവന്നിരിക്കുകയാണെന്നായിരുന്നു സാന്ത്വന പരിചരണ ദിനത്തോടനുബന്ധിച്ച് ഒരുമിച്ചെത്തിയ പേർളിയെയും ശ്രീനിഷിനെയും കുറിച്ച് ഫാൻസുകാർ കമന്റ് ചെയുന്നത്.