സംഗീത് പ്രതാപും മമിതാ ബൈജുവും കേന്ദ്ര കഥാപാത്രങ്ങളായി എത്തുന്ന പുതിയ റൊമാന്റിക് കോമഡി ചിത്രം 'ഹലോ ഡിയർ' ഔദ്യോഗികമായി പ്രഖ്യാപിച്ചു. ആഷിക് ഉസ്മാൻ പ്രൊഡക്ഷൻസിന്റെ ബാനറിൽ ആഷിക് ഉസ്മാൻ നിർമ്മിച്ച്, ഡിനോയ് പൗലോസ് തിരക്കഥ രചിച്ച് സംവിധാനം ചെയ്യുന്ന ചിത്രത്തിന്റെ ടൈറ്റിലും ഫസ്റ്റ് ലുക്ക് പോസ്റ്ററും അണിയറപ്രവർത്തകർ പുറത്തുവിട്ടു. യുവതലമുറയെ ലക്ഷ്യമിട്ടുള്ള കൗതുകകരമായ ഫസ്റ്റ് ലുക്കിന് സമൂഹമാധ്യമങ്ങളിൽ വലിയ സ്വീകാര്യതയാണ് ലഭിക്കുന്നത്.

ഒരു മെട്രോ നഗരത്തിന്റെ പശ്ചാത്തലത്തിൽ യൂത്തിന്റെ വികാര വിചാരങ്ങൾക്കനുസരിച്ചാണ് ചിത്രത്തിന്റെ കഥ വികസിക്കുന്നത്. 'തണ്ണീർമത്തൻ ദിനങ്ങൾ', 'മജോ പത്രോസിന്റെ പടവുകൾ' തുടങ്ങിയ വിജയചിത്രങ്ങളുടെ തിരക്കഥാകൃത്തായ ഡിനോയ് പൗലോസ് തന്നെയാണ് ഈ സിനിമയും ഒരുക്കുന്നത്. ആഷിക് ഉസ്മാൻ പ്രൊഡക്ഷൻസിന്റെ ഇരുപതാമത്തെ ചിത്രം കൂടിയാണിത്. കൊച്ചിയിൽ ചിത്രീകരണം പുരോഗമിക്കുന്ന സിനിമയുടെ ക്ലൈമാക്സ് ഷൂട്ടിംഗ് ഉൾപ്പെടെയുള്ള അവസാന ഘട്ട ജോലികൾ മാത്രമാണ് ഇനി ബാക്കിയുള്ളത്. ഓണത്തിന് ശേഷം ചിത്രത്തിന്റെ മുഴുവൻ ഷൂട്ടിംഗും പൂർത്തിയാകും.

സംഗീത് പ്രതാപ്, മമിതാ ബൈജു എന്നിവർക്കൊപ്പം സുരേഷ് കൃഷ്ണയും ചിത്രത്തിൽ ഒരു പ്രധാന വേഷത്തിൽ എത്തുന്നുണ്ട്. ഇവരെ കൂടാതെ നിരവധി പ്രമുഖ താരങ്ങളും ചിത്രത്തിൽ അണിനിരക്കുന്നുണ്ട്. അഖിൽ ജോർജ് ക്യാമറ ചലിപ്പിക്കുന്ന ചിത്രത്തിന്റെ എഡിറ്റിംഗ് നിർവ്വഹിക്കുന്നത് ചമൻ ചാക്കോയാണ്. നിമിഷ് എം. താനൂർ കലാസംവിധാനവും റോണക്സ് സേവ്യർ മേക്കപ്പും നിർവ്വഹിക്കുന്നു. മഷർ ഹംസയാണ് കോസ്റ്റ്യൂം ഡിസൈനർ. സെൻട്രൽ പിക്ചേഴ്സ് തിയേറ്ററുകളിലെത്തിക്കുന്ന ഈ ചിത്രത്തിന്റെ പി.ആർ.ഒ വാഴൂർ ജോസ് ആണ്.

ഇതിനിടയിൽ, ആഷിക് ഉസ്മാൻ പ്രൊഡക്ഷൻസിന്റെ ബാനറിൽ തരുൺ മൂർത്തിയുടെ സംവിധാനത്തിൽ മോഹൻലാൽ നായകനാകുന്ന ബിഗ് ബജറ്റ് ചിത്രത്തിന്റെ ചിത്രീകരണവും സമാപനത്തോട അടുത്തുകൊണ്ടിരിക്കുകയാണ്. വൻ പ്രതീക്ഷയോടെ കാത്തിരിക്കുന്ന ഈ ചിത്രം ഈ വർഷം ക്രിസ്മസ് റിലീസായി തിയേറ്ററുകളിൽ എത്തും.