ഏറെ നാളത്തെ കാത്തിരിപ്പിനൊടുവില്‍ തന്റെ പ്രണയിനിയെ വെളിപ്പെടുത്തി തമിഴ് സൂപ്പര്‍ താരം വിശാല്‍. തെലുങ്ക് നടി അനിഷ അല്ല റെഡ്ഡിയെയാണ് വിശാല്‍ വിവാഹം കഴിക്കുന്നത്. 'അതെ, സന്തോഷമുണ്ട്. ഒരുപാട് സന്തോഷമുണ്ട്. അങ്ങേയറ്റം സന്തോഷമുണ്ട്. അവളുടെ പേര് അനിഷ അല്ല എന്നാണ്. അതെ അവള്‍ 'യെസ്' പറഞ്ഞു. അങ്ങനെ അതുറപ്പിച്ചു. ജീവിത്തതിലെ അടുത്ത വലിയൊരു മാറ്റം. തിയ്യതി പെട്ടെന്നു തന്നെ അറിയിയ്ക്കാം. ദൈവം അനുഗ്രഹിക്കട്ടെ, വിശാല്‍ കുറിച്ചു.

ഏറെ നാളായി വിശാലിന്റെ വിവാഹമാണെന്ന തരത്തില്‍ പല വാര്‍ത്തകളും പ്രചരിക്കുന്നുണ്ടായിരുന്നു. നടി വരലക്ഷ്മി ശരത്്കുമാര്‍, ഹൈദരാബാദില്‍ നിന്നുള്ള യുവതി തുടങ്ങി നിരവധി പേരുടെ പേരുകള്‍ വിവാഹ വാര്‍ത്തയ്‌ക്കൊപ്പം വന്നിരുന്നു. എന്നാല്‍ ഇതെല്ലാം വിശാല്‍ തന്നെ തള്ളുകയും, എന്റെ വിവാഹ വാര്‍ത്ത ഞാന്‍ തന്നെ അറിയിക്കാമെന്നു പറയുകയും ചെയ്തിരുന്നു. ഒടുവില്‍ വിശാല്‍ തന്നെ സന്തോഷ വാര്‍ത്ത അറിയിച്ചു.

അതിന്റെ പുറകെ അനിഷ വിശാലിനൊപ്പമുള്ള ചിത്രം ഇന്‍സ്റ്റഗ്രാമില്‍ പോസ്റ്റ് ചെയ്തു. പുതിയ ഒന്നിന്റെ തുടക്കം. നീ ചെയ്ത എല്ലാത്തിനും നന്ദി. എന്റെ വളര്‍ച്ചയുടെ, പഠനത്തിന്റെ, നിരീക്ഷണങ്ങളുടെ, എന്റെ പ്രചോദനങ്ങളുടെ, സത്യത്തിന്റെ, വേദനയുടെ, ശക്തിയുടെ ഭാഗമായതിന്, ഞാന്‍ ഇന്ന് എവിടെയാണോ അവിടെ എത്താന്‍ എന്നെ സഹായിച്ചതിന് നന്ദി, എന്ന വരികളോടെയാണ് അനിഷ ഇന്‍സ്റ്റഗ്രാം പോസ്റ്റ് ആരംഭിച്ചത്.

അര്‍ജുന്‍ റെഡ്ഡി, പെല്ലി ചൂപ്പുലു എന്നീ ചിത്രങ്ങളില്‍ അനിഷ അഭിനയിച്ചിട്ടുണ്ട്. എന്നാല്‍ അഭിനയത്തോടല്ല അനിഷയ്ക്ക് താത്പര്യം എന്നാണ് പല മാധ്യമങ്ങളിലെയും റിപ്പോര്‍ട്ടുകള്‍.