കേരളത്തിലെ പത്തോളം ജീവികാരുണ്യ പ്രവര്ത്തനങ്ങളുടെ അമരത്ത് ഈ മനുഷ്യനെന്ന് വെളിപ്പെടുത്തി ബിഷപ്പ്: ബിഷപ്പിന് മമ്മൂട്ടിയുടെ മറുപടി
ഓര്ത്തഡോക്സ് സഭ ബിഷപ്പ് ഡോ. മാത്യൂസ് മാര് സേവേറിയോസ് കഴിഞ്ഞ ദിവസം ഒരു പരിപാടിയില് നടത്തിയ പ്രസംഗം സോഷ്യല് മീഡിയ ഏറ്റെടുത്തിരുന്നു. കേരളത്തില് നടക്കുന്ന പത്തോളം ജീവകാരുണ്യ പദ്ധതികളുടെ അമരത്ത് മമ്മൂട്ടിയാണെന്ന് പലര്ക്കും അറിയാത്ത വിഷയമാണ്. അതെല്ലാം ബിഷപ്പ് എണ്ണിപ്പറഞ്ഞത് കേരളം കൈയടികളോടെയാണ് കേട്ടത്. ഇപ്പോഴിതാ അതേ വേദിയില് മമ്മൂട്ടി നടത്തിയ മറുപടി പ്രസംഗം സമൂഹമാധ്യമലോകത്ത് ചര്ച്ചയാകുന്നു.
മമ്മൂട്ടിയുടെ വാക്കുകളിങ്ങനെ: ബിഷപ്പ് ഈ വിവരങ്ങളൊക്കെ എവിടെ നിന്നോ സംഘടിപ്പിച്ചതാണ്. ഈ പറഞ്ഞതെല്ലാം മുഴുവന് തെറ്റാണെന്ന് ഞാന് പറയുന്നില്ല. ശരികളാണ്. പക്ഷേ ഇതൊക്കെ ഇത്ര വലിയ കാര്യമായിട്ട് എനിക്ക് തോന്നിയിട്ടില്ല. സിനിമ കണ്ട് വിജയിപ്പിക്കുന്നവരെ, എനിക്ക് കഴിയും വിധം സഹായിക്കണം. അതിനുവേണ്ടി ചിലതൊക്കെ െചയ്യണം അത്രമാത്രം. പെയിന് ആന്ഡ് പാലിയേറ്റീവ് എന്ന ജീവകാരുണ്യ സംഘടനയുടെ തുടക്കം വര്ഷങ്ങള്ക്ക് മുന്പാണ്. കോഴിക്കോട് ഒരു ചിത്രത്തിന്റെ ഷൂട്ടിങ് പുരോഗമിക്കുന്ന സമയം. ഷൂട്ടിങ് കഴിഞ്ഞെത്തിയ എന്നെ കാത്ത് രണ്ടു ഡോക്ടര്മാര് കാത്തിരിപ്പുണ്ടായിരുന്നു. ഡോ.രാജഗോപാലും ഡോ. സുരേഷും. കാര്യം തിരക്കിയപ്പോള് അവര് പറഞ്ഞു. കഷ്ടത അനുഭവിക്കുന്ന രണ്ടുപേരുടെ ചികില്സാ സഹായത്തിനാണ് വന്നത്. സാറിന് അത് ചെയ്തുതരാമോ എന്ന്.
അപ്പോഴാണ് പെയിന് ആന്ഡ് പാലിയേറ്റീവ് എന്ന സെസൈറ്റിയെ പറ്റി ഞാനറിയുന്നത്. ഇനി ചികില്സിച്ചിട്ട് കാര്യമില്ല എന്ന അവസ്ഥയിലുള്ള രോഗികള്ക്ക് പിന്നീടുള്ള പരിചരണമാണ് ഈ സംഘടനയുടെ ലക്ഷ്യം. വേദനയില് നിന്നും അവര്ക്ക് ആശ്വാസമാകുന്നതൊക്കെ ചെയ്യാനുള്ള ഒരു കൂട്ടായ്മ. അവരുടെ വാക്കില് നിന്നും മഹത്തായ ഈ ആശയം എനിക്ക് വല്ലാതെ ഇഷ്ടമായി. അവര് പറഞ്ഞ ആ രോഗികളുടെ ചികില്സ ഞാന് ഏറ്റെടുക്കാമെന്ന് സമ്മതിക്കുകയും ചെയ്തു. അതിനൊപ്പം അവരോട് ഞാന് ചോദിച്ചു. ഇതിനപ്പുറം ഞാന് എന്തെങ്കിലും ചെയ്യണോ എന്ന്.
അവര് അതിന് നല്കിയ മറുപടിയാണ് ബിഷപ്പ് ഈ പറഞ്ഞ കാര്യങ്ങള്ക്കൊക്കെ അടിസ്ഥാനം. അവരെന്നോട് ചോദിച്ചു. സാറിന് ഈ സംഘടനയുടെ രക്ഷാധികാരി ആകാമോ എന്നാണ്. സന്തോഷത്തോടെ ഞാന് ആ ആവശ്യം സ്വീകരിച്ചു. സൊസൈറ്റിയുടെ പ്രവര്ത്തനത്തിന് പണം കണ്ടെത്താന് കോഴിക്കോട് വച്ച് 'ഡിന്നര് വിത്ത് മമ്മൂട്ടി' എന്ന പേരില് ഒരു പരിപാടിയും സംഘടിപ്പിച്ചു. ആ പരിപാടിയിലൂടെ അന്ന് 12 ലക്ഷത്തോളം രൂപയാണ് പിരിഞ്ഞുകിട്ടിയത്. ഇതായിരുന്നു തുടക്കം. പിന്നീട് അതിങ്ങനെ വളര്ന്നു. എന്നെ കൊണ്ട് പറ്റുന്നതൊക്കെ ഞാന് ചെയ്തുപോരുന്നു. ഇതൊന്നും ഞാനാരോടും പറഞ്ഞുനടന്നില്ല. ഇപ്പോള് ബിഷപ്പ് ഇത്രയും പറഞ്ഞതിന്റെ പേരിലാണ് ഞാന് ഈ പറഞ്ഞത് തന്നെ..' മമ്മൂട്ടി പറഞ്ഞു.
https://www.facebook.com/Malayalivartha
