ബോളിവുഡ് ഇതിഹാസ നായകന്‍ അമിതാഭ് ബച്ചന്‍ സുഖം പ്രാപിച്ച് വരികയാണ്. കോവിഡ് ബാധിതനായി ആശുപത്രിക്കിടക്കയിലാണെങ്കിലും തന്റെ ബ്ലോഗിലൂടെ നിരന്തരം ബച്ചന്‍ ആരാധകരോട് സംവദിക്കാറുണ്ട്.

സമൂഹമാധ്യമങ്ങളില്‍ കണ്ടുവരാറുള്ള ട്രോളുകളോട് പൊതുവേ പ്രതികരിക്കാത്ത ബച്ചന് പക്ഷേ താന്‍ കോവിഡ് ബാധിച്ച് മരിക്കണമെന്ന് ആശംസിച്ച ഒരാളോട് പ്രതികരിക്കാതിരിക്കാന്‍ സാധിച്ചില്ല. അജ്ഞാതനായ വ്യക്തിക്ക് ഒരു തുറന്ന കത്തിലൂടെയായിരുന്നു 77കാരനായ ബച്ചന്റെ വായടപ്പിക്കുന്ന മറുപടി.
'അവര്‍ എനിക്കായി ഇങ്ങനെ എഴുതി... നിങ്ങള്‍ കോവിഡ് ബാധിച്ച് മരിക്കുമെന്നാണ് കരുതുന്നത്' മെഗാതാരം മുംബൈയിലെ നാനാവതി ആശുപത്രിയില്‍ നിന്നും എഴുതിത്തുടങ്ങി.
'ഹേയ് അജ്ഞാതാ... നിങ്ങള്‍ സ്വന്തം അച്ഛന്റെ പേര് പോലും എഴുതിയില്ല. നിങ്ങളുടെ ജന്മത്തിന് ഉത്തരവാദിയാരാണെന്ന കാര്യം പോലും നിങ്ങള്‍ക്കറിയില്ല. ഇവിടെ രണ്ട് കാര്യങ്ങള്‍ മാത്രമാണ് നടക്കാന്‍ സാധ്യത.... ഒന്നുകില്‍ ഞാന്‍ മരിക്കും അല്ലെങ്കില്‍ ഞാന്‍ ജീവിക്കും.. ഞാന്‍ മരിച്ചാല്‍ നിങ്ങള്‍ക്ക് ഈ അധിക്ഷേപം തുടരാനാകില്ല' ബച്ചന്‍ പറഞ്ഞു.
'നിങ്ങളുടെ എഴുത്ത് ശ്രദ്ധിക്കപ്പെടാനുണ്ടായ കാരണം നിങ്ങള്‍ അമിതാഭ് ബച്ചനെതിരെ തിരിഞ്ഞു എന്നതിനാലാണ്. ദൈവകൃപയാല്‍ ഞാന്‍ രോമുക്തനായാല്‍ ഇതിന്റെ പ്രഹരം എന്നില്‍ നിന്ന് മാത്രമായിരിക്കില്ല മറിച്ച് ഒമ്ബത് കോടിയിലധികം വരുന്ന എന്റെ ഫോളോവേഴ്‌സിന്റെ അടുക്കല്‍ നിന്നു കൂടിയായിരിക്കും' ബച്ചന്‍ എഴുതി.
ട്രോളിനെതിരെ പ്രതികരിക്കേണ്ടെന്നാണ് തന്റെ ആരാധകരോടായി ബച്ചന്‍ അഭ്യര്‍ഥിക്കുന്നത്. രോഗമുക്തനായാല്‍ താന്‍ തന്നെ അക്കാര്യം നോക്കിക്കോളാമെന്നാണ് അദ്ദേഹം പറയുന്നത്.
രോഗമുക്തരായി ആശുപത്രി വിട്ട പേരമകള്‍ ആരാധ്യയെയും മരുമകള്‍ ഐശ്വര്യ റായ്‌യെയും കുറിച്ച് ബച്ചന്‍ വികാര നിര്‍ഭരമായി ട്വീറ്റ് ചെയ്തിരുന്നു.
'എന്റെ മരുമകളും പേരക്കുട്ടിയും ആശുപത്രിവിട്ടു, എനിക്ക് എന്റെ കണ്ണുനീര്‍ പിടിച്ചുനിര്‍ത്താനാകുന്നില്ല. നിങ്ങളുടെ പ്രാര്‍ഥനകള്‍ വിലമതിക്കാനാവാത്തതാണ്. എന്നോട് കരയരുതെന്നാണ് ആരാധ്യ പറഞ്ഞത്. ഞാന്‍ ഉടന്‍ വീട്ടിലെത്തുമെന്നായിരുന്നു അവളുടെ വാക്കുകള്‍. അവളെ ഞാന്‍ വിശ്വസിക്കണം' ബച്ചന്‍ ട്വീറ്റ് ചെയ്തു.