നാളുകള്‍ക്ക് ശേഷം ഇപ്പോള്‍ മാനസികമായും ശാരീരികമായും ഞാന്‍ കരുത്താര്‍ജിച്ചു വരികയാണെന്ന് പറയുകയാണ് പൂനം പാണ്ഡെ. ഗാര്‍ഹിക പീഡനത്തിന് ഇരയായ സമയത്ത് സെറിബ്രല്‍ ഹമറേജ് ഉണ്ടായതായും തുടര്‍ന്ന് ഘ്രാണശേഷി നഷ്ടപ്പെട്ടതായും താരം വെളിപ്പെടുത്തി. 'എനിക്ക് വസ്തുക്കളുടെ ഗന്ധം അറിയുന്നില്ല. ചുറ്റിലുമുള്ള ആളുകളോട് ചോദിച്ചാണ് ഗന്ധം എന്താണെന്ന് അറിയുന്നത്.

എനിക്ക് അനുഭവിക്കേണ്ടി വന്ന ഗാര്‍ഹിക പീഡനത്തെ തുടര്‍ന്നാണ് ഘ്രാണശേഷി നഷ്ടമായത്. ബ്രെയിന്‍ ഹമറേജും സംഭവിച്ചു. മുന്‍ഭര്‍ത്താവില്‍ നിന്നും അനുഭവിക്കേണ്ടി വന്ന ക്രൂരപീഡനങ്ങളാണ് പൂനം തുറന്നുപറഞ്ഞ്. സാം ബോംബെയുടെ ക്രൂരതകള്‍ സഹിക്കാന്‍ കഴിയാതെ താന്‍ നിരവധി തവണ ആത്മഹത്യക്ക് ശ്രമിച്ചിരുന്നെന്നും താരം പറഞ്ഞു.

വിവാഹം കഴിഞ്ഞ് ആഴ്ചകള്‍ക്കകം പൂനം മുന്‍ഭര്‍ത്താവിനെതിരെ ഗാര്‍ഹിക പീഡനത്തിനു പരാതി നല്‍കി. 2020 സെപ്റ്റംബറിലായിരുന്നു ഇവരുടെ വിവാഹം. സാമിന്റെ മര്‍ദനത്തെ തുടര്‍ന്നാണ് സെറിബ്രല്‍ ഹമറേജ് ഉണ്ടായതെന്നും പൂനം വെളിപ്പെടുത്തി.

'ഞാന്‍ എന്റെ വളര്‍ത്തു നായയെ സ്‌നേഹിക്കുകയും അതിനോടൊപ്പം കിടന്നുറങ്ങുകയും ചെയ്താല്‍ അയാളെക്കാള്‍ എനിക്കു സ്‌നേഹം നായയോടാണെന്ന് പറയും. അതെന്ത് പ്രസ്താവനയാണ്. വളര്‍ത്തു മൃഗങ്ങളെ സ്‌നേഹിച്ചതിനു കൂടി ഞാന്‍ അയാളില്‍ നിന്നും മര്‍ദനമേല്‍ക്കേണ്ടി വന്നു. അതായിരുന്നു എന്റെ സെറിബ്രല്‍ ഹെമറേജിന്റെ കാരണം. അങ്ങനെയൊരു ബന്ധം എനിക്ക് ആവശ്യമില്ല.' പൂനം വ്യക്തമാക്കി.

തലച്ചോറിനേറ്റ ക്ഷതം ഇപ്പോഴും പൂര്‍ണമായും ശരിയായിട്ടില്ലെന്ന് പൂനം പറഞ്ഞു. അടിച്ച സ്ഥലത്തു തന്നെ അയാള്‍ വീണ്ടും അടിക്കുമായിരുന്നു. 'ഞാന്‍ നന്നായി മേക്കപ്പ് ചെയ്ത് ചിരിച്ച് എല്ലാവര്‍ക്കും മുന്നില്‍ എത്തി. എല്ലാവര്‍ക്കും മുന്‍പില്‍ എനിക്ക് ഒരു പ്രശ്‌നവും ഇല്ലെന്ന് ഞാന്‍ അഭിനയിച്ചു. അടിയേറ്റ സ്ഥലത്തു തന്നെ എനിക്ക് വീണ്ടും വീണ്ടും അടിയേറ്റു.' പൂനം പറഞ്ഞു.