ബിഗ്ഗ് ബോസ് സീസൺ 4 ഫിനാലെയ്ക്ക് ഇനി ദിവസങ്ങൾ മാത്രമാണുള്ളത്. പ്രേക്ഷകരും അതിന്റെ കാത്തിരിപ്പിലാണ്. ഇനി വരാനുള്ള ദിവസങ്ങൾ മത്സരാർഥികളായ ആറുപേർക്കും ഒരു വന്‍ സര്‍പ്രൈസ് ആണ്.ബിഗ്ഗ് ബോസിൽനിന്നും പുറത്താക്കപ്പെട്ടവര്‍ വീണ്ടും തിരിച്ച് കയറുന്നു. കുറച്ച് ദിവസങ്ങളായി മുംബൈയില്‍ വന്ന് ഹോട്ടലില്‍ താമസമായിരുന്നു എവിക്ഷനായി പോയ മുന്‍ മത്സരാര്‍ത്ഥികള്‍. ഏറ്റവും ആദ്യം പോയ ജാനകി സുധീര്‍ മുതല്‍ 92 ആം ദിവസം പുറത്താക്കപ്പെട്ട റോണ്‍സണ്‍ വിന്‍സന്റ് വരെ എല്ലാവരും ഉണ്ട്. വീണ്ടും എല്ലാവരെയും കണ്ടതിന്റെയും മറ്റും സന്തോഷം ഓരോ താരങ്ങളും തങ്ങളുടെ ഇന്‍സ്റ്റഗ്രാമിലൂടെ അറിയിച്ചിരുന്നു. ഇപ്പോഴിതാ മറ്റൊരു സന്തോഷമാണ് മുന്‍ മത്സരാര്‍ത്ഥികള്‍ പങ്കുവയ്ക്കുന്നത്. ഇന്ന് മുതല്‍ അവരുടെ മുംബൈ ഡെയ്‌സിന്റെ വീഡിയോകള്‍ ഉണ്ടായിരിയ്ക്കില്ല. അതെ അവര്‍ ബിഗ്ഗ് ബോസ് ഹൗസിലേക്ക് തിരികെ കയറുന്നു. ഇക്കാര്യം ഹൗസിന് അകത്ത് നിലവിലുള്ള മത്സരാര്‍ത്ഥികള്‍ക്ക് അറിയില്ല. അവര്‍ക്കൊരു സര്‍പ്രൈസ് ആയിട്ടാണ് ബിഗ്ഗ് ബോസ് ടീം പുറത്താക്കപ്പെട്ടവരെ വീണ്ടും കയറ്റുന്നത്. മറ്റെല്ലാ ഭാഷകളിലും ഫൈനലില്‍ എല്ലാ മത്സരാര്‍ത്ഥികളും പഴയത് പോലെ ബിഗ്ഗ് ബോസ് ഹൗസില്‍ ഒത്തു ചേരും. അവരില്‍ നിന്ന് ഫൈനലിലെ രണ്ട് പേരെയും കൂട്ടി ഹോസ്റ്റ് പുറത്ത് കടക്കും. അതാണ് പതിവ്. എന്നാല്‍ മലയാളത്തില്‍ കഴിഞ്ഞ രണ്ട് സീസണുകളിലും ഷോ പൂര്‍ത്തീകരിക്കാന്‍ സാധിച്ചിരുന്നില്ല. കോവിഡ് ഒന്നും രണ്ടും തരംഗങ്ങള്‍ക്ക് ഇടയില്‍ അവസാനമെത്തിയ മത്സരാര്‍ത്ഥികളെ വോട്ടിങിലൂടെ പ്രേക്ഷകര്‍ തിരഞ്ഞെടുത്ത് പ്രഖ്യാപിയ്ക്കുകയായിരുന്നു. ഇത്തവണ ഫുള്‍ 'ആചാരങ്ങളോടെ' തന്നെയാണ് ഫൈനല്‍ നടക്കുന്നത്. ഇനി ആ എപ്പിസോഡ് കാണാനുള്ള ആവേശത്തിലാണ് ആരാധാകരും.